Read Zou EZEKIEL 22 Bible Online

EZEKIEL 22 - Zou bible

EZEKIEL 22

¹TOPA’ thu ka kungah ang tung hi:

²Nang mihing aw, sisan luonna khuopi tungah thu khen ding na mah, thu khen ding na mah? Tua ciengin tua khuopi kungah sil mudahuoi a bawl zosie pulah in.

³TOPA Pasien in tam bangin ci hi, ci-in na gen ding hi: Khuopi khat! Ama sungah sisan suohsahin milimte bawl a, tuate tawh ama le ama a kibuasah khuopi, a ni ang tung ta hi.

⁴Sisan na suosah ziehin mi mawpa na tang ta a, na milim bawlte tawh na kibuasah hi; na nite na naisah tehteh a, a kisesa na kumte ang tung ta hi. Tua ahi ziehin minamte’ simmaw bawl, gam zosie’ ciemmui nopna kang hisah ding hi.

⁵A nai, a gamla-a a om mite in ciemmui nopna-in ang nei ding vua, nang pen a minsie le buoina tawh a kidim na hi ta hi.

⁶Na sunga om Israel uliente in amau’ thuneina bang cietin sisan suosah ding beh tupin a nei uhi.

⁷Nangma sungah pate le nute kisimmaw bawl hi; na sunga teng pemtate’ sum kimawhlahpieh a, na sunga a teng tagate le meigongte kibawlsie hi.

⁸Ka na siengthote na thuse sih a, ka sabbath-te na buasah hi.

⁹Nangma sungah sisan suosah nadinga miholtuo pawl, muol tunga an ne pawl, le na laizang vuah a huasan mama mi pawl zong a om hi.

¹⁰Nang sungah amate in a pate uh’ zi a mawpi uhi; nangma sungah amate in numeite a nin nei laitahin a buon uhi.

¹¹Khat pa in a vengpa’ zi tawh sil mudahuoi a bawl hi; adang khat in a mo zumhuoipi-in buasah a, adang khat in a pa’ tanu, a sanggamnu a buasah hi.

¹²Na sungah amate in sisan suosah nadingin guhgol a la uhi; khamkholna sum le a met tawh sum na leitawisah a, na innvengte sum mawhlahpiehin na haulaw hi; tuale nang in kei nei mangngil ta hi, TOPA Pasien in ci hi.

¹³En in, na sungah thuman lo-a na nga hauna le na sisan suosahna ziehin ka khuttum ka ziel hi.

¹⁴Nangma tunga kang thuh ding ni ciengin na hanna in thuoh zo-in, ahi sihle na khut tegel khau den zo ding amah? Keima TOPA in ka gensa ahi a, ka sem ding hi.

¹⁵Minamte lahah hing thezahin gam cintengah kang thethang ding a, note lahah na sientho lona uh ka hemkhie ding hi.

¹⁶Tuale minamte muna-ah note ziehin keima[61] ei kibuasah ding hi; tuale kei pen TOPA ka hi lam nei thei ding hi.

¹⁷TOPA’ thu ka tungah ang tung hi:

¹⁸Mihing aw, kei adingin Israel innkuonte sia-eh a suoh ta uhi; amate a unpi-un sia haltuina meikhuh sunga a om ngun,[62] sumngo, langva, sia, hangeh kihal ahi a, sia-eh a suoh sieng uhi.

¹⁹Tua ahi ziehin TOPA Pasien in tam bangin ci hi: Note na unpi-un sia-eh suoh sieng ta na hi ziehun, Jerusalem laikimah note kang khawmtuo ding hi.

²⁰Mi khat in ngun, sumngo, sia, hangeh, le langvate haltui dingin sia haltuina meikhuh sungah kholin a zunmang nadingin a tungah meikuong tawh a zap bangin, keima in ka lungthahna le ka thangpaina tawh note kang khawmtuo ding a, khuopi sungah hing koi-in kang haltui ding hi.

²¹Note hing khawmtuo-in na tung vuah ka thangpaina meikuong kang sem ding a, khuopi sungah na zungmang ding uhi.

²²Sia haltuina meikhuh sungah ngun a zunmang bangin, tua khuopi sungah note na zungmang sieng ding uhi; tuale na tung vuah keima TOPA in ka thangpaina kang sunsuh lam note in na thei ding uhi.

²³TOPA’ thu ka tungah ang tung hi:

²⁴Mihing aw, ama kungah gen in: Nang pen ka thangpai ni-a ama tungah guo a zu lo, a sieng lo gam na hi hi.

²⁵A sunga a uliente[63] uh pen a samat a ehbal humpi hawh tawh a kibang uhi; amate in mihing’ hinna a that zo uhi; amate in a goute ule a van manphate uh lahpiehin a sungah mi tampi a meigongsah uhi.

²⁶Ka thuhilna tungah a siempute uh ngongtatin ka sil siengthote buasah uhi; amate in sil sieng le sil maimai khen loin, sil sieng le sil sieng lo a kilamdanna zong a hil sih uhi. Ka sabbath-te a thudon sih vua, tuaci’n amate lahah ei buasah uhi.

²⁷A sunga om a kumpi uliente uh pen a sa matsa a ehbal ngiehon tawh a kibang vua, sisan luongsahin thuman lo-a sum nga thei nadingin mihing hinna a that uhi.

²⁸A kamsangte un amate tangin kulpi leikang vui zut bangin thu a imcip vua, amate adingin a dih lo mangmuna le zuou aisannate bawlin, TOPA gen lo pi-in, “TOPA in tam bangin gen hi,” a ci uhi.

²⁹Gam sung mite in mite’ na mawh lahpiehin mi’ na a gu uhi; amate in mizawngte le tasam mite bawlsie-in bangma lokia loin pemtate’ na a mawh lahpieh uhi.

³⁰Tuale keima in tua gam ka suhsiet lo nadingin kulpi bawlpha ding le tua gam tangin kulpi hawm sungah ka mai-ah a ding ding mi ka sui kawikawi hi; ahi vangin mi khat zong ka mu sih hi.

³¹Tua ahi ziehin amate tungah ka thangpaina ka sungsuh hi; keima in ka thangpaina meikuong tawh amate ka haltum hi; amau’ gamtatna teng a luzang vuah ka tusahkia hi, TOPA Pasien in ci hi.