Read Zou EZEKIEL 23 Bible Online

EZEKIEL 23 - Zou bible

EZEKIEL 23

²Mihing aw, nu khat sunga a pieng unau numei ni a om hi;

³ama gel in Egypt ah pahtatna a bawl uhi; a ngahnut lai-un ama gel a pahtat uhi; khum munah a nawi uh kimehpiehin ngahnu siengtho ahina uh kithampieh hi.

⁴A unu’ min Oholah ahi a, a naunu’ min Oholibah ahi hi. Ama gel kei-a’ ahi a, ama gel in tanu le tapate a nei uhi. A min uh ahile, Oholah pen Samaria a cinopna ahi a, Oholibah pen Jerusalem a cinopna ahi hi.

⁵Kei-a’ ahi laipi ma-in Oholah na pahtat a, ama in a kingaipi ahi Assyria-te a na lunggul mama hi.

⁶Amate ahile puondum a sil galhangte,[64] gam uhte le galkapmangte ahi vua, a unpi-un tangval melhoi sakol tung tuon siem vive ahi uhi.

⁷Amate tungah tua nu a na kipumpieh a, amate a unpi-un Assyria mi kituomtelte ahi uhi; tuale ama in a lunggul mi zosie’ milimte tawh ama le ama kibuasah hi.

⁸Egypt gama a oplai-a kipanin a na gamtatnasa ahi a pahtatna ama nu in a khie tuom sih hi; azieh pen a ngahnut cil lai-in pasalte in ama na luppi-in a nawi a na mepieh vua, ama nu tungah amau’ huana zosie a na bunghla uhi.

⁹Tua ahi ziehin keima in a kingaipi a lunggul Assyria-te’ khut sungah ama nu ka pie ta hi.

¹⁰Tua mite in ama nu’ puon a hawmang pieh uhi; amate in a tanu le a tapate a man uhi; tuale amate in namsau tawh tua nu a that uhi. Tua nu tungah thu kikhen a, numeite lahah thu gentena khat a suoh hi.

¹¹A naunu Oholibah in tua khu mu napi, ama sangin a huasanna le a pahtatnate siezaw a, a unu sangin a khawhzaw sem lai hi.

¹²Ama nu in Assyria-te, gam uhte, galkapmangte, lum le phaw tawh a kivon galhangte,[65] sakol galkapte, sakol tuon a siemte nah lunggul mama a, amate pen a unpi-un tangval melhoi vive ahi uhi.

¹³Tuale keima in tua nu a bua lam ka mu hi; ama gel in lampi kibang a zui tuoh uhi.

¹⁴Hizongle tua nu in a pahtatnate zomsuoh lai a, kawm tunga pasal lim kisuoite le a san tawh a kizem Chaldea-te’ limte,

¹⁵a kawnga kawnggah gahsa, a lu pan vua a diel mong uh a kaisuh, a unpi-vua uliente tawh a kibang- a pienna gam uh Chaldea ahi Babylon mite’ milim a mu hi.

¹⁶Ama nu in tuate a mu bepin lunggul pailien a, Chaldea gama amate kungah kamtai a sawl hi.

¹⁷Ama kunga a om ki-itna lupna tungah Babylon mite a pei vua, amau’ huasanna ziehin tua nu a buasah uhi; tuale amate tawh a kibuasah zaw ciengin tua nu in amate kidahin amate kung panin a kilekia hi.

¹⁸Tua nu in a pahtatna langtang tahin zom suoh a, a guohtanga a opna ang pholah ciengin ken zong a unu kidahin ka kiheisan bangin tua nu zong kidahin ka kiheisan hi.

¹⁹Hizongnanle tua nu in a ngahnut lai-in Egypt gamah a pahtat laite ang phawhkia a, a pahtatnate a uongsah semsem a,

²⁰tuale ama nu in a neihtah uh laa-a’ cie a pha, a bawtui uh sakoltang lante-a’ za a pha khum sunga a kingaipite a nah lunggul mama hi.

²¹Tua hi a, nang in na neu lai-a na huasanna, Egypt-te[66] in na awm hing tham piehin a bawcil na nawi ang kimepiehnate[67] na hlagul lai hi.

²²Tua ahi ziehin Oholibah aw, TOPA Pasien in tam bangin gen hi: Na kidah zieha na kiheisan na lawm ngaite nang ang do dingin ka hantawh ding a, amate hing zawpi-in muncin teng panin nang ang do ding uhi:

²³Tuate pen Babylon-te le Chaldea-te zosie, Pekod-te, Shoa-te, Koa-te le Assyria-te zosie tawh, tangval melhoite, gam uhte le galkapmang zosie, uliente le galhangte[68] le sakol tuon a siemte zosie ahi uhi.

²⁴Amate in sakol leengte, vanpuo leengte le mihon tampite tawh nang ang do dingin leilu[69] lam panin ang kuon ding uhi; nang ang do dingin muncin tengah lum le phaw le sia lukhute khusa-in amate in panmun a la ding uhi; tuale keima in amate tungah thukhenna ka ap ding a, amate in a ngaina utawh kituohin nang tungah thu ang khen ding uhi.

²⁵Keima in nang tungah ka lungthahna ka tungsah ding a, amate in lungso tahin ang bawl ding uhi. Amate in na nahkuo le na bilte ang tansan ding vua, a hingsun teng zong namsau tawh a si ding uhi. Amate in na tanu na tapate uh manin a hingsun na mi teng zong mei in a katum ding hi.

²⁶Amate in na puonte hing sutpiehin a manpha na kizepnate ang lahpieh ding uhi.

²⁷Tuaci’n keima in Egypt pana na ken na huasanna le na pahtatnate ka tawpsah ding hi; nangma in tuate hlangai nawn loin, Egypt zong na phawhkha ngai nawn sih ding hi.

²⁸Bangzieh ahei cile TOPA in tam bangin ci hi: Keima in na muda na kiheisan mite’ khut sungah nangma kang pie ding hi;

²⁹tuale amate in mudana tawh hing huotbawlin, na thalawsa na zosie ang lahpieh ding vua, na guohtangin puonsil loin ang nuasie ding vua, mi tawh na luptonna na tahsa pumguoh ang kipholah ding hi. Na huasanna le na pahtatnate in

³⁰na tungah tam bang ang tunsah ahi hi, azieh pen minamte tawh na pahtat a, amau’ milimte tawh na kibuasah hi.

³¹Na sanggam nu’ lampi ma na tawn hi, tua ahi ziehin keima in na khut sungah ama’ hai kang pie ding hi.

³²TOPA Pasien in tam bangin gen hi: A gol le a thuh na sanggam nu’ hai nangma in na dawn ding hi; ang kisimmaw-in ang kinuisan ding a, tua in tampitah taa hi.

³³Zu khamin dana tawh na kidim ding hi. Zauna le manthaina hai pen na sanggam nu Samaria’ hai ahi hi;

³⁴tua hai dawnin na tawpkang ding a, hai themkehte haizanin na nawite na kuikeh ding hi. Azieh pen ka gensa ahi hi, TOPA Pasien in ci hi.

³⁵Tua ahi ziehin TOPA Pasien in tam bangin gen hi: Bangzieh ahei cile kei ei mangngilin nei nua ngatsan ziehin na huasanna le na pahtatnate a paat thuoh na hi hi.

³⁶TOPA in ka kungah thu ang gen hi: Mihing aw, Oholah le Oholibah tungah thu na khen diei mah? Tua ciengin nangma in ama gel kungah a mudahuoi a gamtatnate uh gen in.

³⁷Azieh pen ama gel in angkawmin a khut gelah sisan a baang hi; a milimte utawh angkawmin keima tawh a nei a tate nangawn uh milim pasien-te neh dingin a pie uhi.

³⁸Tua tham loin ka tungah tam teng a bawl uhi: ama gel in tua ni ma-in ka biehinn buasahin ka sabbath-te a niehsah uhi.

³⁹Azieh pen ama gel in a milimte adingin a tate a gaw ciengun tua ni ma-in ka biehinn ah ama gel hing pei-in a buasah uhi. Ka biehinn sungah a gamtatna uh tam bang ahi hi.

⁴⁰Ama gel in a gamlapi panin pasalte ang pei nadingin kamtai nangawn a sawl vua, tuale amate ang pei uhi. Amate adingin nang le nang na kipumsil a, mitmul za kinu-in, kizepna manphate tawh na kizem hi;

⁴¹lupna hoitah tungah a to vua, tua lupna mai-ah ka gimnamtui le ka sathau kikoina sabuoi kipha hi.

⁴²Tua nu kimvelah mihonpi gamlum valuoi a, gamlah panin zukham mi mawhmawh tampi kipeipi hi; amate in numei gel’ khutah[70] tau bunsahin a lutang vuah kumpi lukhu a khusah uhi.

⁴³Tua ciengin keima in, “Kadei, a angkawmkawmna-in tua nu a paatgawp ahi ta hi, hinanle amate in a mawpi lai veve uhi.

⁴⁴Azieh pen numei pahtat khat kungah mite a pei bangin tua nu kungah amate a pei uhi. Tua bangin numei huasan Oholah le Oholibah kungah amate a pei uhi.

⁴⁵Ahi vangin a dih thukhente in angkawmna le sisan suosahna tawh ama gel tungah thu a khen ding uhi; bang ding ahei cile ama gel angkawm ahi a, a khut vuah sisan a baang hi.

⁴⁶TOPA Pasien in tam bangin ci hi: Ama gel a do dingin mihonpi kuonsah in, zausisah inlen ama gel’ na lahpiehsah in.

⁴⁷Mihonpi in ama gel suong tawh sepin, a namsau utawh vatgawp ding uhi; amate in a tanu le a tapte uh thatin a innte uh haltum ding uhi.

⁴⁸Tam bangin gam sungah huana le lanna ka kamsah ding hi, tua khu numei zosie in thuhilkholna-in sangin nang gamtat bangin amate a huasan nawn sih ding uhi.

⁴⁹Na huasanna uh dan na thuoh kia ding gel a, na mawna uh ahi na milim biehna uh ziehin note in dan na thuoh ding uhi; tuale note in keima TOPA Pasien ka hi lam nei thei ding uhi.