Read Zou EZEKIEL 24 Bible Online

EZEKIEL 24 - Zou bible

EZEKIEL 24

¹A kum kuona, a hla sawmna, a nisawmna ni-in TOPA’ thu ka kungah ang tung hi.

²Mihing aw, tuni mama-in, tuni’ min ciemte in. Babylon kumpipa in tuni mama-in Jerusalem imtawm zo hi.

³Tuale a ledo innkuonte kungah thugentena khat gen inlen, amate kungah TOPA Pasien in tam bangin ci hi, ci-in gen in: Beel khat suong in, beel suong inlen, a sungah tui zong sung in;

⁴tua beel sungah sabate, a pheisa le a liengsa, saba tuituoh zosie bua inlen, a gu tuituohte a dimin bua in.

⁵Ganhonte lahah a tuituoh pen la inlen, beel nei-ah sing[71] bop in; a satelte[72] huon inlen, a sungah a gute huonmin[73] in.

⁶Tua ahi ziehin TOPA Pasien in tam bangin a gen hi: Sisan a luongsah khuopi, a sunga sam-eh kaisa, a sam-ehte a kawh lo beel in gimna a thuoh ding hi! Saba teeltuom nei loin bakhat zaw ba khatin beel panin thua in.[74]

⁷Azieh pen tua sungah ama nu’ luonsah sisan om hi; leivui in tua sisan a vua nadingin lei lahah a sung sih a, suong tungah a sung hi.

⁸Phu ka lah thei nadingin ka lung a thah nadingin, tua sisan a kivuamang lo nadingin, keima in suong tungah ka koi hi.

⁹Tua ahi ziehin TOPA Pasien in tam bangin gen hi: Sisan a luongsah khuopi in gimna a thuoh ding hi! Keima in sing ka tawbe ding hi.

¹⁰Singtun bopin mei phat un; sa hoitahin huonso unlen, beel sungah a namtuite hlah unlen, a gute kagepsah un.

¹¹Meikam tungah beel hawm suong un. Tuaci’n beel ang sa ding a, a sumsante hing kuongin a nieh teng ang zungmang ding a, sam-ehte ang nemang ding hi.

¹²Phattuomna om loin kei le kei ka kigimsuo hi; a sam-eh sasopi teng kawh zo loin, sam-ehte mei in kawhsah zo lo hi.[75]

¹³Na huasanna a nieh teng kang sawpsieng vangin, na niehna panin na sieng thei tuom sih hi; na tungah ka thangpaina ka daisah masangsie nang na siengthokia sih ding hi.

¹⁴Keima TOPA in ka gensa ahi hi; a hun ang tung ta a, ka sem ta ding hi. Ka onton sih ding a, hen zong nei loin ka lungsim ka khiem sih ding hi. Na gamtatna le na sepnate dung zui-in na tungah thu ka khen ding hi, TOPA Pasien in ci hi.

¹⁵TOPA’ thu ka kungah ang tung hi:

¹⁶Mihing aw, na et nop penpen mi khat na kung pan khatvei satin ka lamang ding hi; hinanle kap le mau-in na om sih ding a, na hlitui zong na luongsah sih ding hi.

¹⁷Khuisa inlen, ahi vangin gingsah sin. Tua misi ziehin tau sin. Na diel khim inlen na kengah kedap bun in; na nephu tunglam khu sinlen a kapte’[76] an zong nehpieh sin.

¹⁸Tuaci’n keima in zingmawngin mipite kungah thu ka gen a, a nitah ciengin ka zi a si hi. Tuale keima in a zingni zingmawngin ei kithupieh bangin ka bawl hi.

¹⁹Tua ciengin mipite in keima kungah, “Na hici gamtat pen ko adinga bang na deina ahei, ei gen lo ding na mah?” ei ci uhi.

²⁰Tua ciengin amate kungah ka gen hi. TOPA’ thu ka tungah ang tung hi:

²¹Israel innkuonte kungah TOPA in tam bangin ci hi, ci-in gen in: Na lungsim vua na hlangai uh, na mit vua na et nuom uh, na kilietsahpi na hatna uh ahi ka biehinn ka buasah ding hi; tuale note in na nuasie uh na tanu le na tapate uh namsau-in a si ding uhi.

²²Keima in ka bawlsa bangin note in zong na bawl ding uhi; note in na nephu uh a tunglam khu loin, a kapte’ an zong na ne sih ding uhi.

²³Na lu tung vuah na dielkhim uh om ding a, na keng vuah na kedap uh om ding hi; note kap le mau-in na om sih ding vua, hizongle na na khielnate uh ziehin na hingkiem ding vua, khatlekhat na kitaupi ciet ding uhi.

²⁴Tua bangin Ezekiel pen note adingin lim khat ahi ding hi; ama’ bawl bangin no zong na bawl ding uhi. Tami thu ang tun ciengin note in keima TOPA ka hi lam nei thei ding uhi.

²⁵Nang, mihing aw, keima in a mun muonhuoite uh, a kipahna ule a minthanna uh, a mit vua a etcim lo uh, a lungsim vua a hlagul uh a tanu a tapate uzong amate kung panin ka lah ni cieng,

²⁶tuami ni-in a suohta mi khat na kungah hing pei-in thu ang puoh ding hi.

²⁷Khum ni ciengin na kam kihongin a suohta mipa tawh na kiho ding a, na kamsip ngai nawn sih ding hi. Tuaci’n nang pen amate adingin lim khat na hi ding hi; tuale amate in keima TOPA ka hi lam ei thei ding uhi.