Read Zou EZEKIEL 25 Bible Online

EZEKIEL 25 - Zou bible

EZEKIEL 25

¹TOPA’ thu ka kungah ang tung hi:

²Mihing aw, Ammon-te lam kinga inlen amate langkhatah thu gen in.

³Ammon-te kungah, TOPA Pasien’ thugen za un, ci-in gen in: TOPA Pasien in tam bangin gen hi: Note in ka mun siengtho kibuasahin Israel gam ten thei lona-in kikoi a, sal dingin Judah innkuonte a pei uh ciengin, “Awi sam ing ei!” na ci se uhi;

⁴tua ahi ziehin keima in nisuona gam mite tungah note kang pie ding hi. Amate in note lahah giephuol satin na laikim vuah puonbuh a lam ding uhi; amate in na singga uh ne-in na bawngnawi uh zong a dawn ding uhi.

⁵Keima in Rabbah khuo pen kalaohte’ an maina mun ka suohsah ding a, Ammon, tuukhumna mun ka suohsah ding hi. Tua ciengin note in keima TOPA ka hi lam nei thei ding uhi.

⁶Bangzieh ahei cile TOPA Pasien in tam bangin ci hi: Note in Israel gam langbawlin na khut na keng utawh tuol sia-in, na sung vuah thangsietna zosiepi teng tawh kipahin na dieng uhi,

⁷tua ahi ziehin note langkhatah ka khut zahin minamte’ tomgam dingin note kang pie ding hi. Keima in minamte sung panin note kang sumaimang ding a, gam tuomtuomte panin kang susie ding hi. Tua ciengin note in keima TOPA ka hi lam nei thei ding uhi.

⁸TOPA Pasien in tam bangin gen hi: Azieh pen Moab-te[77] in Judah innkuonte pen minam dangte tawh kibang uhi, a ci vua,

⁹tua ahi ziehin Moab muolpang, a gamgi dunga khuopite[78] panin a gam a kisahtheipi munte ahi Beth-jeshimoth, Baal-meon, le Kiriathaim-te ka hawhkhie ding a, a awngin ka omsah ding hi.

¹⁰Nisuona lam mite’ tan dingin Ammon-te tawh ka pie ding hi. Tua bangin minamte lahah Ammon-te kiphawhkha nawn lo ding a,

¹¹tuale Moab-te tungah keima in thukhenna ka bawl ding hi. Tua ciengin amate in keima TOPA ka hi lam ei thei ding uhi.

¹²TOPA Pasien in tam bangin gen hi: Edom in Judah innkuon tungah nasie tahin phu la a, amate tunga a phulahna ziehin nah khiel mama hi,

¹³tua ahi ziehin TOPA Pasien in tam bangci hi: Edom langkhatah ka khut ka zah ding a, a mite le a ganhingte sumaimangin gamkhing suohsahin Teman khuo panin Dedan khuo cieng dong nangawnin namsau tawh amate a si ding uhi.

¹⁴Edom tungah ka mi Israel-te zangin phu ka la ding a, ka lungthahna le ka thangpaina tawh kituohin amate in Edom gamah a bawl ding uhi; amate in ka phulahna ahi lam a thei ding uhi, TOPA in ci hi.

¹⁵TOPA Pasien in tam bangin gen hi: Azieh pen a tawp thei lo kigalneina ziehin Philistia-te in phu la-in thangsietna lungsim ziehin suhsiet nading phu a la uhi;

¹⁶tua ahi ziehin TOPA Pasien in tam bangin ci hi: Keima in Philistia-te langkhatah ka khut ka zah ding a, Kereth-te sumaimangin tuipi panga a omlaite ka susie ding hi.

¹⁷Keima in thangpaina tawh a kidim danpiehna tawh amate tungah nahpi tahin phu ka la ding hi. Amate tungah phu ka lah ciengin amate in keima TOPA ka hi lam ei thei ding uhi.