Read Zou EZEKIEL 26 Bible Online

EZEKIEL 26 - Zou bible

EZEKIEL 26

¹Kum sawm le kum khat kum, tua hla a ni masa ni-in TOPA’ thu ka kungah ang tung hi:

²Mihing aw, Tyre in Jerusalem tawh kisai-in, “Aha, mite tunkot tawngsan ta hi; kei adingin golpi tahin kihong zo hi; tu-in tua khuopi kisiegawp ta a, kei kungah mi a dimin ang teng ding hi,” a ci hi.

³Tua ahi ziehin TOPA Pasien in tam bangin gen hi: En in, Tyre aw, nang kang langpang hi! Tuipi in tuihuolte a naw bangin nang ang langpang dingin minamte kang not ding hi.

⁴Amate in Tyre kulpi susie-in a tausangte satcim ding uhi. A gam panin leitang khuot dawhin suongtum beh ka dawhsah ding hi.

⁵Tua khuopi pen tuipi laikima om len phona mun a suoh ding hi. Keima in ka gen zo hi, TOPA Pasien in ci hi. Tua khu minamte’ tomgam khuopi suoh ding a,

⁶namsau tawh a gam sunga a khuotate kithat ding hi. Tua ciengin amate in keima TOPA ka hi lam ei thei ding uhi.

⁷Azieh pen TOPA Pasien in tam bangin ci hi: Keima in Tyre khuopi sim dingin leilu lam panin kumpite’ kumpi ahi Babylon Kumpipa Nebuchadnezzar, a sakolte, a sakol leengte, a lei galkapte, le a thahat galkap honpite tawh kang kuonsah ding hi.

⁸Ama in gam sunga na khuotate namsau tawh that ding hi. Ama in nang langkhatah kulpi bawlin leicien a cieng ding hi. Ama in nang langkhatah innkhum bangin lum a cieng ding hi.

⁹Ama in a moltum tawh na kulte satcim ding a, a heite tawh na tausangte phuamat ding hi.

¹⁰A sakolte a tam sengin a tuol totna uh leivui in tuomcip ding hi. A kiphuvang khuopi kulpi sungah mi a lut vapual bangin, na tunkotah ama ang lut ciengin sakol galkap, lengkangte, le sakol leengte’ huging ziehin na kulte a kiling ding hi.

¹¹Ama in a sakol kecinte tawh na gawldung zosie uh a tuoncil ding hi. Namsau tawh na mite a satlia ding vua, a khau mama na khuomte uzong tuolah puamat ding hi.

¹²Amate in na neisate uh a tomgam ding vua, na sumbuh vante uzong a lamang ding uhi. Amate in na kulte uh a satkeh ding vua, na innhoite a susie ding uhi. Amate in tui sungah na suongte, na inn singte le na leisiette a pai ding uhi.

¹³Keima in a lasahna uh ahi tumgingte ka sipsah ding hi; na lyre gingte uzong kiza nawn lo ding hi.

¹⁴Keima in nang suong gawta kang suohsah ding hi; nang pen len phona mun na hi ta ding hi. Keima TOPA in ka gensa ahi ziehin nang ang kilamkia nawn lo ding hi, TOPA Pasien in ci hi.

¹⁵TOPA Pasien in Tyre khuopi tungah tam bangin gen hi: Nang sungah kithana kizom suohin a liem a baite tau vangutin, amate in na puana awging a zah uh ciengin tuikul gamte kiling lo ding uh amah?

¹⁶Tua ciengin tuipi sunga gam uhte zosie a kumpi topha tung uh panin a kumsuh ding uhi; amate in a puontuolte uh sutdawhin a kizem a puonsilte uh a hawhdawh ding uhi. Amate zau-in a kithin kawmun puon a sil ding vua, tuolah a to ding uhi; a peisuh a peitona vuah nang ziehin amate a citun ding uhi.

¹⁷Amate in nang tungah kaateng loin tam bangin ang gen ding uhi: Aw khuopi minthang, nang le na sunga tengte,[79] tuipi tunga a hatpen ahi ngaisa khuopi, gam thupi zosie tungah[80] nangma’[81] giinhuoina a tungsah khuopi, bang a cile tuipite pana hici manthai[82] va-ia na diei!

¹⁸Nang na pua ni-in tuikul gam teng a citun uhi; nang na manthaina ziehin tuikul gam teng lungkie uhi.

¹⁹Bangzieh ahei cile TOPA Pasien in tam bangin gen hi: Ten lo gie lona khuopite bangin a daidam khuopi kang suohsah ding a, na tungah tui thuhpi hing sawlin tui huolpite in ang tuom ciengin,

²⁰nidanglai-in Hankhuh sunga a kumsuh mite tawh kang sawnhla suh ding a, tangtawnga sietna a thuoh Hankhuh sunga a kumsuh mite kung leinei-ah kang tengsah ding hi. Tuaci’n mihingte tenna leitangah ang kitengsah sih ding a, tenna ding mun[83] zong na nga sih ding hi.

²¹A lipkhap huoi-in kang maimangsah ding a, na om nawn sih ding hi; ang kisui vangin ang kimukia ngai ta sih ding hi, TOPA Pasien in ci hi.