Read Zou EZEKIEL 28 Bible Online

EZEKIEL 28 - Zou bible

EZEKIEL 28

¹TOPA’ thu ka kungah ang tung hi:

²Mihing aw, Tyre kumpipa kungah TOPA Pasien in tam bangin ci hi, ci-in gen in: Na lungsim a kilietsah ziehin, “Kei pasien ka hi hi; pasien-te’ tona tuipi laikimah ka to hi,” na ci hi. Hinanle nangma’ lungsim le pasien’ lungsim na tekah vangin, nang pen pasien na hi sih a, mi maimai na hi bo hi.

³Daniel[94] sangin na pilzaw sam a, nang kung panin phuolsel kici bangma om lo hi;

⁴na pilna le na theitelna tawh neisa na kikhol a, na sum koina ah kham le ngun na kholvum hi.

⁵Summet bawl na siem ziehin na neisa na pungsah a, tua na neisate ziehin na lungsim a kiliensah hi.

⁶Tua ahi ziehin TOPA Pasien in tam bangin ci hi: Nang in na lungsim le Pasien’ lungsim na tekah ziehin,

⁷minamte lahah nang ang do dingin a giinhuoi pen gamdang mite kang sawl ding hi; amate in a etlawm na pilna do dingin namsau a dawh ding vua, na thupina a suthang ding uhi.

⁸Amate in Hankhuh sungah ang sawnsuh ding vua, note, tuipite laikimah sisie-in na si ding hi.

⁹Nang ang sat liemte’ khut sungah nang pen pasien hi loin mi maimai khat na hi vangin, “Kei pasien ka hi hi,” na ci lai lai diei mah?

¹⁰Nang pen gamdang mite’ khut tawh tep kitan lote si bangin na si ding hi; bangzieh ahei cile keima TOPA Pasien in ka gensa ahi hi.

¹¹Tua banah TOPA’ thu ka kungah ang tung hi:

¹²Mihing aw, Tyre kumpipa adingin kaateng lo inlen TOPA Pasien in tam bang ci hi, ci-in ama kungah gen in: Nang a bucing suoikaina khutsip na hi a, pilna tawh na kidim a, na hoina a bucing hi.[95]

¹³Pasien’ Eden um ah nang na om a, carnelian, chrysolite, suongkang, beryl, onyx, jasper, sapphire,[96] turquoise, le emerald suongmanpha namcin teng khu nangma kituomna ahi hi; na kizepna le na kikhuohnate kham tawh kibawl ahi a, tuate khu nang ang kipiensah ni-a kisiemkhol ahi ta bo hi.[97]

¹⁴Keima in nang ang cing dingin sathau kinusa cherub ka koi hi.[98] Pasien’ muol siengtho tungah na om a, meisuongte lahah na vah kawikawi hi.

¹⁵Ang kipiensah ni-a kipanin na sungah khielna a kimu cieng dong, na gamtatna paubanna om lo hi.

¹⁶Na sumbawl a tam ziehin tatsietna tawh na kidim a, mawna na bawl hi; tuaci’n a bua na khat bangin Pasien’ muol panin kang paimang ta a, tuale nang ang cing cherub in meisuongte lah panin ang notdawh ta hi.

¹⁷Na mel a hoi ziehin na lungsim a kiliensah hi; na minthan ding na deina lamin na pilna na susie gawp hi. Keima in tuol sena-in kang nei a, kumpite in munop ang sah dingun a mai vuah kang pholah hi.

¹⁸A thuman lo sum na bawlna ziehin, na khielna a tam seng ta a, nangma in munsieng zosie na buasah ta hi. Tuaci’n na sung panin mei ka kuongsah hi; tua mei in nang hing katumin ang mu mi zosie mai lei lahah vut kang suohsah hi.

¹⁹Mite lahah nang ang thei mite a ciza sieng gawp ding uhi; a zauhuoi-in na mangthai ta a, na omkia ngai nawn sih ding hi.

²⁰TOPA’ thu ka kungah ang tung hi:

²¹Mihing aw, Sidon lam kinga-in ama langkhatah thu phuong inlen,

²²TOPA in tam bangci hi, ci-in gen in: Sidon khuopi aw, nang kang langpan ding a, keima in note lahah minthanna ka nga ding hi. Ama sungah ka siengthona lahin a sungah thu ka khen ciengin, keima TOPA ka hi lam amate in ei thei ding uhi;

²³azieh pen a sungah pul natna ka tungsah ding a, a lampi tengah sisan ka luongsah ding hi; muncin tengah namsau tawh ang kido-in, na khuo laizangah mite pua-in a si ding uhi. Tuale amate in keima TOPA ka hi lam ei thei ding uhi.

²⁴Israel innkuonte in a innvengte lahah amate a simmaw bawl, ling le khau banga a sun thei koima a mu nawn sih ding uhi. Tuale amate in keima TOPA Pasien ka hi lam ei thei ding uhi.

²⁵TOPA Pasien in tam bangin ci hi: Minamte lahah a kithetangna panun Israel innkuonte ka kaikhop ciengin minamte muna ah ka siengthona ka talang ding hi, tua ciengin ka nasem Jacob tunga ka piehsa amau’ leitangah a teng ding uhi.

²⁶Tua sungah amate lungmuong tahin a teng ding vua, amate in inn lamin lengga umte a bawl ding uhi. Amate a simmaw bawl a vengte zosie tungah thu ka khen ciengin amate lungmuong tahin a teng ding vua, keima TOPA a Pasien uh ka hi lam ei thei ding uhi.