Read Zou EZEKIEL 31 Bible Online

EZEKIEL 31 - Zou bible

EZEKIEL 31

¹A kum sawm le khatna, a hla thumna, a ni masa ni-in TOPA’ thu ka kungah ang tung hi:

²Mihing aw, Egypt kumpipa Pharaoh le a mihonte kungah tam bangin gen in: Na liet dan koi pen tawh na kibang bep ei?

³Assyria ngaisun in, ama pen a bazam hoi-in, a hlim in gamsung teng dielsah a, a kung sang mama-in meiilum[110] lahah a dawn a kidawh to, Lebanon taamtah sing ahi hi.

⁴Tui in ama tapnom dildel a, a thuhna sunga om tui in ama a sangsah hi. A pona mun kimvelah a guntui kiluongsah[111] a, gamlah singkung zosie ah a luituite a luongsah hi.

⁵Tuaci’n gamlah sing zosie sangin tua khu ang sangzaw a, a phungzungah tui a tam ziehin a bate ang golin ang sau hi.

⁶Vana leng vate in a ba lahah bu tomin a bazam nei-ah gamsate a nosang vua, ama’ hlim nei-ah minam lien zosie a teng uhi.

⁷A huite in tui tamna munah zung hlasuh ahi ziehin a kung golin bazau a, a etlawm mama hi.

⁸Pasien’ um sunga tamtaahte in ama demzo loin, taasingte in zong ama a demzo sih hi. A bate tawh tekah dingin thei kungte bangma ahi sih hi; Pasien’ um sunga singpote tawh zong a hoina a kibang sih hi.

⁹A bazam tampitah tawh a melhoi dinga ka bawl ahi a, Pasien’ um sung, Eden-a singpo zosie in tua khu a eng uhi.

¹⁰Tua ahi ziehin TOPA Pasien in tam bangin ci hi: Tua[112] pen sang tahin kitungdawh a, a dawn in meiilum[113] banto-in, a sanna ziehin a lungsim zong ang kiliensah pai hi.

¹¹Minamte’ uhpa khut sungah ama ka pie hi; tua pa in a gitlona tawh kituohin a bawlsie hi. Ama pen ka paimangsa ahi hi.

¹²Gamdang mi, minamte lahah a giinhuoi pente in tua sing phua-in a nuasie uhi. Muoltung teng le kuomcin tengah a bate kie a, gam sunga tui pulna cintengah a nabawh teng a tawngsa-in a kiemang hi; tuale leitung mi zosie in a hlim nei panin hing pei-in a peisan ta uhi.

¹³Tua a pua sing tungah vana leng va zosie tuong a, tua a ba kawmte lahah gamsa namcin a gieh uhi.

¹⁴Tam teng zosie pen tui gei-a a po singkungte khat beh in khanpha-in tua tanin a san lo nading, ahi sihle a dawnte in meilum[114] a bat zo lo nading, le tui a kham singkung khat beh tuate tana a san lo nading ahi hi. Bangzieh ahei cile amate, a unpi-un mihingte zosie tawh, leinei gam le Hankhuh sunga kumsuhte tawh a kipieton ta hi.

¹⁵TOPA Pasien in tam bangin gen hi: Misikhuo ah a kumsuh ni-in, ama tunga a om tua a thuhna mun pen khahin ka tuom hi; keima in a guntuite luongsah nawn loin a tuihuolte ka khahtan hi. Khuomiel in Lebanon gam ka khusah a, tua ziehin gamlahah a po sing zosie a vul sieng hi.

¹⁶Hankhuh sunga a peisuhte tawh ama Misikhuo ah ka khiehsuh ciengin, ama’ puana ging ziehin keima in minamte ka kilingsah hi; Eden-a a po sing zosie, Lebanon-a a hoipen kiteelte, tui a kicing taha a nga zosiete leinei ah nuomtahin a om ding uhi.

¹⁷Minamte lahah ama’ hlim nei-a a teng a kipawlpite[115] namsau-a a kithatte tawh Misikhuo ah a kumsuh uhi.

¹⁸Na thupi dan le na liet dan Eden um sunga singkungte lahah bang singkung tawh na kisun ei? Tu-in nang pen Eden singkungte tawh leinei ah ang kikhiesuh ding hi; nang pen namsau tawh a kithat tep kitan lo mite lahah na lum ding hi. Tam pen Pharaoh le ama’ mihonte ahi hi, TOPA Pasien in ci hi.