Read Zou EZEKIEL 32 Bible Online

EZEKIEL 32 - Zou bible

EZEKIEL 32

¹A kum sawm le nina, a hla sawm le ni, a ni masa ni-in TOPA’ thu ka kungah ang tung hi:

²Mihing aw, Egypt kumpipa Pharaoh tungah kaateng lo inlen tam bangin ci in: Minamte lahah nang le nang humpi-in na kingaisun a, ahi vangin nang pen tuipite sunga gulhiempi tawh na kibang lel hi; nang in na luidung teng na tawhnawi a, na keng tawh tui lawhgawpin luidung teng na niehsah[116] hi.

³TOPA Pasien in tam bangin ci hi: Mihon tampite tawh na tungah ka len ka khu ding hi; keima[117] in ka len sungah nangma kang kainal ding hi.

⁴Keima in nang tuol sena-in hing nei-in, gamlahah kang pai ding a, na tungah vana leng vate hing khawlsahin, leitunga gamsa zosie in a kham tahun kang nesah ding hi.

⁵Muoltung tengah na sa ka thethang ding a, kuom sung teng na siluong[118] tawh ka kidimsah ding hi.

⁶Keima in na sisan luongte tawh gamlah le muoltung dong ka pahsah ding a, tui pulna teng zong na sisan tawh kidim ding hi.

⁷Nang kang phietmai cieng in vante lia-in aasite ka mielsah ding hi; meii in ni ka liesah ding a, hla zong tang lo ding hi.

⁸Vantunga khuovah tang zosie na tungah ka mielsah ding a, na gam sungah mutzin ka tungsah ding hi, TOPA Pasien in ci hi.

⁹Na thei ngai nai lo gama minamte lahah sal[119] dinga kang kai ciengin, mi tampite’ lungsim ka buoisah ding hi.

¹⁰Nangma ziehin mi tampi in lamdang ka sasah ding hi; amate mai-ah ka namsau ka vih ciengin nang ziehin kumpite zau-in citun ding uhi. Nang na pua ni ciengin a hin nading uh ngaisunin, a tatna popo vuah amate zau-in a citun ding uhi.

¹¹Bangzieh ahei cile TOPA Pasien in tam bangin ci hi: Nangma ang do dingin Babylon kumpipa’ namsau ang kuon hi.

¹²Minamte lahah amate zosie in a giin pen uh ahi mi thahatte’ namsau tawh na mihonte ka thatsah ding hi. Egypt’ kisahtheipi teng amate in a kisiesah ding vua, a mihon zosie uzong a sigam sieng ding uhi.

¹³Keima in tui nienna gei-a om a ganhonte uh ka susie ding a, mihing’ keng le ganhing’ kecin in tua tui a niehsah ngai ta sih ding uhi.

¹⁴Tua ciengin amau’ tui ka cimsah ding a, sathau bangin a luidungte uh ka luongsah ding hi, TOPA Pasien in ci hi.

¹⁵Keima in Egypt gam khu gamkhing ka suohsah ding a, a sunga om zosie hawhkhie-in tua sunga teng zosie ka thagam ciengin, amate in keima TOPA ka hi lam ei thei ding uhi.

¹⁶Tami khu kaala ahi a, kaateng a kilo ding ahi hi. Minamte’ numeite in kaatengin a lo ding uhi. Egypt tung le a mihonte tungah tam bangin kaateng kilo ding hi, TOPA Pasien in ci hi.

¹⁷A kum sawm le nina, a hla masa[120], a ni sawm le nga ni-in TOPA’ thu ka kungah ang tung hi:

¹⁸Mihing aw, Egypt[121] mihonte adingin kap inlen, Hankhuh sunga a peisuh Egypt mite le minam thupite’ tanute tawh leinei gamah amate sawlsuh ta’n.

¹⁹“Melhoina lamah koi na khupzo uh ahei? Kumsuh un! Tep kitan lote tawh kivui ton ta un!” ci in.

²⁰Namsau-a kithatte lahah amate a si ding uhi. Namsau-a si dingin Egypt[122] kipie zo hi; ama le a mihonte a ni-un kaiphit un.

²¹Misikhuo laikim panin a thahat uliente in a kithuopi teng utawh amate thu a gen ding uhi: “Amate ang peisuh zo ta vua, namsau-a kithat tep kitan lote tawh a lumton lai uhi,” a ci uhi.

²²Namsau-a kithat misi zosie a opna khum munah Assyria le a kithuopi zosie a om vua, a kimvel vuah a hankhuhte uzong a om hi.

²³A hante uh Leihawm thuhpi sungah a om hi. A han kimvel vuah a kithuopite uh a om a, amate a unpi-un namsau-a kisatlia ahi uhi. Amate in gam sunga a hinglaite a patausah uhi.

²⁴Khum mun a han kimvela a om mihon zosie tawh Elam a om hi; amate a unpi-un namsau-a site ahi vua, tep zong kitan loin leinei gamah peisuhin gam sunga a hinglaite a patausah uhi. Leihawm sunga peisuhte tawh amate a maizum ton uhi.

²⁵A mihon zosie utawh a kithat tonte lahah amate in Elam[123] ading lupna khat a bawl vua, a kimvel vuah a amau’ hante omin, amate pen a unpi-un tep tan lo namsau-a a site ahi uhi; azieh pen amate in a hingte’ gamah patauna omsahin Leihawm sunga a peisuhte tawh zumna a thuohton uhi; a kithat mite lahah amate kikoi hi.

²⁶Khum munah Meshech, Tubal, le a mihonte a om vua, a kimvel vuah a hankhuhte uh omin, amate a unpi-un tep tan lo namsau-a kithatte vive ahi uhi; azieh pen amate in a hingte’ gam a patausah uhi.

²⁷Amate pen Misikhuo ah a galvante utawh a peisa, a namsau uh a kitangkhapsah, a gute uh tunga a lumte uh[124] a kikoipieh, tanglai-a a sisa galhangte tawh a kivui ton sih uhi.

²⁸Tuaci’n nang ang kisat guoi ding a, tep kitan lote le namsau-a kithatte lahah ang kivui ding hi.

²⁹Edom zong a thahat ziehin namsau-a kithat a kumpite le a gam uhte tawh khum munah kivui ton a, Leihawm sunga a peisa tep kitan lote tawh a lumton uhi.

³⁰Tua sungah leilu lam ulien zosie le Sidon mite zosie a om vua, a kithatte tawh maizum thuohin a peiton uhi, azieh pen a thahat ziehun amate in tam bang patauna zosie a piengsah uhi; tep kitan lo namsau-a kithatte tawh amate kivui tonin Leihawm sunga a peisuhte tawh zumna a thuoh ton uhi.

³¹Pharaoh in amate a mu ciengin ama le a mihonte- Pharaoh le a galkap zosie- a kihenem zo tuom ding uhi, TOPA Pasien in ci hi.

³²Bangzieh ahei cile ama[125] in a hingte gamah patauna a piengsah hi; tua ahi ziehin Pharaoh le a mihon zosie, namsau-a kithatte tawh tep kitan lo mite lahah kivui ton ding uhi, TOPA Pasien in ci hi.