Read Zou EZEKIEL 33 Bible Online

EZEKIEL 33 - Zou bible

EZEKIEL 33

¹TOPA’ thu ka kungah ang tung hi:

²Mihing aw, na mite hopi inlen amate kungah tam bangin gen in. Keima in gam khatah namsau ka kuonsah a, tua gam mite in amate lah panin a galvil dingun mi khat se uhi;

³tuale galvil pa in gam sunga ang tung namsau mu-in pengkul mutin mite kungah a hilkhol a;

⁴tua ciengin mi khatpo in pengkul ging za napi-in hilkholna a thudon sih a, tuale namsau hing kuonin amate a thagam sieng leh, amau’ sisan amau’ lu tungah tu ding hi.

⁵Amate in pengkul ging za napi-in tua hilkholna a thudon sih uhi; amau’ sisan amate tungah a tu ding hi. Ahi vangin amate in tua hilkholna a thudon vua ahile a hinna uh a hundam zo ding uhi.

⁶Ahi vangin galvil pa in namsau ang kuon mu napi pengkul mut loin mite a hilkhol sih a, tuale namsau hing kuonin amate lahah mi khatpo a tha leh, amau’ khielna zieha si ahi vua, hizongle keima in galvil pa tungah amau’ sisan ka phul ding hi.

⁷Tuaci’n mihing aw, keima in Israel innkuonte’ galvil pa dingin nang kang koi zo hi; ka kam sung panin thu na zah popo ciengin, kei kung pana pataukonate amate na hilsawn ding hi.

⁸Keima in migilote kungah, “Migilote aw, na si valon ding uhi,” ka ci a, tuale a lampi panun migilote ang kihei nadingin amate na galgih sih leh, amau’ khielna sungah migilote si ding a, ahi vangin nang kungah amau’ sisan kang phul ding hi.

⁹Ahi vangin nang in a lampi panun migilote ang kiheikia nadingin na hilkhol a, tuale a lampi panun amate ang kihei nop sih uleh, a khielna sung vuah migilote si ding a, ahi vangin nang na hileh na hinna na hundam zo ding hi.

¹⁰Mihing aw, tu-in Israel innkuonte kungah note in tam bangin na genzo uhi, ci-in gen in: “Eite in i tatkhielnate ule i mawnate uh i puola vua, amate ziehin i tha zawngkhal uhi; tua ahile eite bang i ci hinzo ding uh ahei?” na ci uhi.

¹¹Amate kungah tam bangin gen in, TOPA Pasien in ci hi. Kei a hing ka hi ma bangin, migilote’ sina ah ka kipah sih hi, tua sangin a gitlona panun migilote hing kinuale-in a hin ding uh ka deizaw hi; na gitlonate panun hing kinuale un, hing kinuale un; Israel innkuonte aw, bang dinga si ding na hi uh ahei?

¹²Tuale nang mihing aw, na mite kungah tam bangin gen in: Midihte in khielna a bawl uleh amau’ dihna[126] in amate hundam lo ding hi; migilote a gitlona panun a kinuale uleh amau’ gitlona in amate puasah lo ding hi; tuale midihte a maw ciengin zong a amau’ dihna in amate a hingsah sih ding hi.

¹³Midihte kungah pel loin na hing ding uhi, ka ci vangin amate in a dihna uh muongin khielna a bawl uleh a dih amau’ gamtatna khat zong kiphawpieh lo ding hi.

¹⁴Tua banah keima in migilote kungah, “Note na si valon ding uhi,” ka ci vangin a mawna uh panin kinuale-in thuman thutangin a gamtat vua,

¹⁵migilote in vankhap lekia-in, a guhsa uh vante piekia-in hinna a pie thukhamte a zui vua, khielna a bawl nawn sih uleh, amate a hing valon ding a, a si sih ding uhi.

¹⁶Amate’ bawlsa mawnate khat zong amau’ siet nadingin kiphawkhah pieh nawn lo ding hi; amate thuman thutang tawh a gamta ahi vua, amate a hing valon ding uhi.

¹⁷Hinanle na mite in amau’ gamtat dan a man lo ciengin, “TOPA’ gamtat dan man lo hi,” a ci uhi.

¹⁸Midihte amau’ dihna panin kinuale-in khielna a bawl uleh, khumi[127] ziehin amate a si ding uhi.

¹⁹Migilote in a gitlona panun kinuale-in thuman le thutanga a gamtat uleh, khumi[128] ziehin amate a hing ding uhi.

²⁰Hizongle note in, “TOPA gamtat dan a man sih hi,” na ci uhi. Israel innkuonte aw, note zosie tungah na gamtatna uh tawh kituohin thu kang khen ding hi!

²¹Ka saltan sung uh kum sawm le ni kum, a hla sawmna, a ni nga ni-in Jerusalem pana ang suohta mi khat ka kungah ang pei a, “Khuopi pua ta,” ei ci hi.

²²Tua galtai pa ang tun masang a nitahin ka tungah TOPA’ khut ang om hi; hinanle zingmawngin ka kungah tua galtai pa ang tun hun tahin ama in ka kam ei honpieh zo ta hi; tuaci’n ka kam ang kihongin ham thei loin ka om nawn sih hi.

²³TOPA’ thu ka kungah ang tung hi:

²⁴Mihing aw, Israel gam sunga tenna lo-a a kinuasie tam mun tenga a teng mite in, “Abraham mi khat beh hi napi-in ama in tam gambup na luo hi; eite tampi i hizaw vua, tami gam i luo ding vua ei kipie tahtah ahi hi,” a ci den uhi.

²⁵Tua ahi ziehin amate kungah TOPA Pasien in tam bangin ci hi, ci-in gen in: Note in a si pumin sa na ne vua, na milimte uh ento-in sisan na luongsah uhi; tua ahile tam bangpi ma tawh gam na luo thei ding uh amah?

²⁶Note in na namsaute uh na suong vua, micin in na innvengte ciet uh’ zi na buasah uhi; tua ahile tam bangpi-in gam luo thei ding na hi uh amah?

²⁷Amate kungah TOPA Pasien in tam bangin ci hi, ci-in tami thu gen in: Keima a hing ka hi ma bangin, koima’ tenna lo-a a kinuasie mun tenga om mite namsau-in a si valon ding uhi; tuale gamlahah a omte gamsate neh dingin ka pie ding a, mun muonhuoite le suonghawm sunga omte pen pulnatna tawh a si ding uhi.

²⁸Tua gam pen a kinuasie gamkhing ka suohsah ding a, ama’ kisahtheipi a thahatna a tawp sieng ding hi; Israel muolte gamdai luo ahi ziehin koima in a nawh kha nawn sih ding hi.

²⁹Tua ciengin keima in a gam uh tenna lo gamkhing ka suosah ciengin a sil mudahuoi bawl zosie ziehun amate in keima TOPA ka hi lam ei thei ding uhi.

³⁰Mihing aw, kawm gei le inn kotkhah tengah nang tungtang thu na gam mite khatlekhat a kiholim vua, a innvengte ciet uh kungah, “Hing pei unlen, TOPA kung pana ang tung thu ngai va vui,” a kici uhi.

³¹Mite pei bangin amate zong ang pei-in ka mite bangin na mai-ah ang to uhi. Tuale na thute a ngai vua, ahi vangin amate in a mang sih ding uhi. Azieh pen a kampi utawh mi a pawh vua, ahi vangin a lungsim sung vuah amau’ nga nading beh a ngaisun uhi.

³²Amate dingin nang pen a awngai mama, tumging khat hoitahin tumin zawllate[129] a mau hiuhiau mipa khat tawh na kibang hi; amate in na thugente a zah bangun a zui tuom sih uhi.

³³Tami thu ang tangtun ciengin- tuale ang tangtung ding hi! -tuaci’n amate in note lahah kamsang khat a om zo ahi lam ang thei ding uhi.