Read Zou EZEKIEL 37 Bible Online

EZEKIEL 37 - Zou bible

EZEKIEL 37

¹TOPA’ khut ka tungah ang om a, TOPA’ hlagau tawh ama in ei peipi-in kuom laikimah ei tutsuh hi; tua kuom pen misi gute tawh kidim hi.

²Ama in tua kimvel tengah ei peipi kawikawi hi; tua kuom sungah gu le tang tampitah om leulo a, tua gute gawta thei mama hi.

³Ama in keima kungah, “Mihing aw, tami gute a hing thei diei mah? ei ci hi. Keima in, “TOPA Pasien aw, nangma in na thei hi,” ci-in ka dawng hi.

⁴Tua ciengin ama in keima kungah, “Tami gute tungah thu phuong inlen amate kungah, “A gawta gute aw, TOPA’ kammal za un.

⁵TOPA Pasien in tami gute kungah tam bangin a gen hi: Note sungah naahu[133] hing lutsahin note na hing ding uhi.

⁶Note tungah thagui koi-in na tung vuah tel le vo kang omsah ding a, vun in kang tuomsah ding hi. Note sungah naahu[134] koi-in na hing ding uhi; tuaci’n keima TOPA ka hi lam note in nei thei ding uhi,” ei ci hi.

⁷Tuaci’n kei in zong ei kisawl bangin thu ka phuong hi; ka thu phuon ka gen hun sungin sil kigawi valuoi ging khat ka za a, tuale husa khat thakhatin ang omin, tuale gute in amau’ gu ciet ang zuon uhi.

⁸Keima in ka en leh amate tungah thagui ang om a, satel ang omkia-in vun in tuate ang tuom hi; hizongle amau’ sungah naahu om nai lo hi.

⁹Tua ciengin ama in keima kungah, “Mihing aw, naahu[135] tungah thu phuong in, thu phuong inlen naahu kungah tam bangin gen in: TOPA Pasien in tam bangin ci hi: Naahu[136] aw, hui ningli panin hing pei-inlen amate a hin thei nadingin tam mi kithatte tungah na hu sang in,” ei ci hi.

¹⁰Ama’ ei sawl bangin thu ka phuong a, amate sungah naahu lutin ang hing vua, a keng utawh ang din ciengun a hon tampitah ang pha uhi.

¹¹Tua ciengin ama in keima kungah, “Mihing aw, tami gute pen Israel innkuon buppi ahi uhi. Amate in, ‘Ka gute uh a gawta sieng ta a, ka kinepna uh om nawn loin ei kisumaimang ta hi,’ a ci uhi.

¹²Tua ahi ziehin nang in thu phuong inlen, TOPA Pasien in tam bangin ci hi, ci-in amate kungah gen in: Ka mite aw, na hankhuhte uh hongin na hankhuh panun note kang lakhie to ding hi; tuale keima in note Israel gamah kang peipikia ding hi.

¹³Ka mite aw, na hankhuhte uh hongin na hankhuhte panun note kang lahkhiet to ciengin note in keima TOPA ka hi lam nei thei ding uhi.

¹⁴Note sungah ka hlagau guongin na hing ding vua, keima in na leitang vuah note kang koikia ding hi; tua ciengin ka gensa ahi a, ka bawl ding hi, a ci keima TOPA ka hi lam note in nei thei ding uhi,” TOPA in ci hi.

¹⁵TOPA’ thu ka kungah ang tung hi:

¹⁶Mihing aw, cieng khat la inlen tua tungah, “Judah le a kipawlpi Israel-te ading,” ci-in giel in; tua ciengin cieng adang khat la leuleu inlen tua tungah, “Joseph (Ephraim’ cieng) le a kipawlpi Israel innkuon zosie ading,” ci-in giel in;

¹⁷na khut sungah tua tegel cieng khat a suo thei nadingin cieng khat tungah a khat zom in.

¹⁸Tuale na mite in na kungah, “Tamte bang na cinopna ahei, kote ei gen lo ding na mah?” ang ci ciengun,

¹⁹nangma in amate kungah TOPA Pasien in tam bangin ci hi, ci-in gen in: Keima in Joseph’ cieng (Ephraim khut sunga om ) le a kipawlpi Israel minamte’ cieng ka la ding a, ka khut sungah ama gel khat a suo thei nadingin tua[137] tungah Judah cieng ka koi ding hi.

²⁰Amate muna-ah a tunga lai na giel ciengte na khut sungah ang op ciengin,

²¹amate kungah TOPA Pasien in tam bangin ci hi, ci-in gen in: Keima in amate peina minamte lahah Israel mite ladawhin ka peipi ding hi.

²²Keima in gamsung Israel muoltung tengah amate minam khatin ka bawl ding hi; tuale amate zosie tungah kumpi khat in a uh ding hi. Amate minam ni ahi ngai nawn sih ding vua, kumpi gam ni-in zong a kikhen ngai nawn sih ding uhi.

²³A milimte ule a sil mudahuoite utawh ahi a, a tatkhielnate utawh ahi zongin amate kibuasah ngai nawn lo ding hi. Amate a nuatolna ziehun amau’ puana[138] panin keima in hundamin ka siensuo ding hi. Tua ciengin amate keima’ mite hi ding a, kei, amau’ Pasien ka hi ding hi.

²⁴Amate tungah ka nasempa David in kumpi sem ding hi; tuale amate in a unpi-un tuucing khat nei ding uhi. Amate in ka ngaina kipte zui-in ka thukhamte zong limtahin a tang ding uhi.

²⁵Keima in ka nasempa Jacob ka piehsa na pu na pate uh’ tenna gamah amate a teng ding uhi; khum munah amate le a tate ule a tute uh a teng zing ta ding uhi; tuale ka nasempa David in amate a uh zing ta ding hi.

²⁶Keima in amate tawh kilemna thuciemna ka bawl ding hi; tua pen amate tawh ka bawl kumtawn thuciemna hi ding hi. Keima in amate thupha[139] pie-in ka pungsah ding a, amate lahah kumtawnin ka mun siengtho ka koi ding hi.

²⁷Amate tawh ka tenna mun a omton ding hi; kei amau’ Pasien ka hi ding a, amate keima’ mi ahi ding uhi.

²⁸Tua ciengin amate lahah kumtawnin ka mun siengtho a op ciengin keima Israel a siensuo TOPA ka hi lam amate in ei thei ding uhi.