Read Zou EZEKIEL 4 Bible Online

EZEKIEL 4 - Zou bible

EZEKIEL 4

¹Tuale nang, “Mihing aw, tehlei khat la-in na mai-ah koi in. A tungah Jerusalem khuopi lim suoi in;

²tuale a sim nadingin kui-imnate koi inlen, tuami sim nadingin gal nanna kul bawlin leicien cieng in; tua khuopi do nadingin galphuolte bawl inlen, a kimvelah kulpi suhkhap nading phawhbulte phut in.

³Tua ciengin sia pheng khat la inlen nang le khuopi kikalah sia kulpi bangin tung in; na mai tua lam ngat inlen, tua khuopi a ki-imtawm danin omsah inlen sawn citahin sawn in. Tam pen Israel innkuonte dinga lim khat ahi hi.

⁴Tua ciengin na veilam netpha-in lum inlen, tua tungah Israel innkuon dan kipiehna koi in; khum sunga na lup ni tantan amate dan kipiehna teng na puo ding hi.

⁵Azieh pen nang tungah amate dan kipiehna ding kum phaza tawh a kikim, ni zathum le ni sawmkuo kang pie hi. Tuaci’n nang in Israel innkuonte dan kipiehna na puo ding hi.

⁶Tam teng na man zaw ciengin a ni veina na zietlam netpha-in na lumkia ding a, Judah innkuonte’ dan kipiehna na puo ding hi. Ni sawmli sung kang sepieh a, ni khat pen kum khat tang bang ahi hi.

⁷A ki-imtawm Jerusalem lam na mai ngat ding a, na puonah ban zielin tua khuopi in a tuo ding thu mavang na gen ding hi.

⁸En in, na khuopi imtawmna hun a man masangsie langkhat panin langkhatah na kihei thei lo nadingin khauhuol tawh kang kanbawm ding hi.

⁹Tuale mangbu, mangbuham, belawi le besan, tang le tangman la in; kuong sung khatah tuate koi inlen, nangma adingin moh bawl in. Na sih lup hun ahi ni zathum le ni sawmkuo sung tua moh na ne ding hi.

¹⁰Na neh ding an pen ni khatin shekel sawmni gih hi ding hi; a kise hunin tua an na ne ding hi.

¹¹Tuale na tui dawn ding zong kite ding a, hin khat’ seguh-suo-sekhat hi ding hi; a kise hunin na dawn ding hi.

¹²Nang in mihing’ eh tunga a ki-em moh pen a muna vuah mangbuham-moh bangin na ne ding hi.

¹³TOPA in, “Israel mite in amate ka delmang nading minamte lahah tam bangin a sieng lo moh a ne ding uhi,” a ci hi.

¹⁴Tua ciengin keima in, “Ah TOPA Pasien! Bangma cihin kei le kei ka kibuasah ngai sih hi; ka neu lai panin tu dongin ama thu-a a si ahi a, gamsate in a tha sa ahi zongin ka ne ngai sih a, ka kam sungah sa uithante zong tum kha ngai nai lo hi,” ka ci hi.

¹⁵Tua ciengin ama in ka kungah, “En in, mihing-eh tangin bawng-eh kang hisah ding a, tua tungah na moh na em ding hi,” ei ci hi.

¹⁶Tua ciengin ama in ka kungah, “Mihing aw, Jerusalem ah an le tui ka tawpsah ding hi; amate in a zau kawmun a kitesa an le tui a ne ding uhi; amate in a lunggim kawmun a kitesa tui a dawn ding uhi.

¹⁷An le tui a kitasap ziehin a lunggim kawmun amate khatlekhat ki-enin, gimna dan a thuoh ziehun a gawngtam ding uhi.