Read Zou EZEKIEL 40 Bible Online

EZEKIEL 40 - Zou bible

EZEKIEL 40

¹Khuopi a kisuhsiet zaw a kum sawm le lina kum, ka saltan zaw uh a kum sawmni le ngana kum kipat cil tua hla a ni sawmni, khum ni lien ma-in keima tungah TOPA’ khut ang om a, ama in khum sungah keima ei peipi hi.

²Ama in Pasien’ mangmuna ziehin Israel gam ei tutin muolsang mama tung khatah ei koi hi. Khum muolsang’ leitaw lamah khuopi tawh kibang khat a om hi.

³Ama in khum sungah ei tut ciengin a mel puohdan sumngo-a kisiem tawh a kibang pasal khat na om a, ama in a khut sungah pikhau khat le picieng khat a tawi hi; tuale tunkot lutna lampi-ah ama na ding hi.

⁴Tua pa in keima kungah, “Mihing aw, hoi tahin enin limtahin ngai inlen, keima in kang lah ding zosie na lungsim sungah koi in, azieh pen tami thu nangma kunga kang lah thei nadinga tam sunga kang peipi ahi hi,” ei ci hi.

⁵Biehinnpi huong a pulam kimvel zosie ah kulpi a om hi. Tua mi pa’ khuta a tawi picieng pen tong guh sau a, a tena khat ta pen tong khat le zabeh sau hi; tuaci’n ama in kulpi te a, kulpi a sana picieng tan khat pha a, picieng khat ma sang hi.

⁶Tua ciengin nisuona lam a kinga tunkot lutna lampi ah lutin a kaleite ah kato a, tunkot lutna a te leh picieng tan khat a pha hi.[154]

⁷Tuanah inndante om a, inndan khat a vailam picieng khat cie pha a, a dunglam zong picieng khat cie ma pha hi; inndante kikal tong nga kihal hi; tuale a sungtawng talaap gei-a a om tunkot vang pen picieng khat cie pha hi.

⁸Tua ciengin ama in tunkot lutna talaap a sung lam a te leh tong khat pha hi.

⁹Tua ciengin ama in tunkot lutna talaap te a, tong giet pha-in a khuomte tong ni sa hi; tuale tunkot talaap pen a sung tawng lamah a om hi.

¹⁰Nisuona lam tunkot pang tuohah inndan thum tuoh om hi; a thumin a golna kikimin a kikala khuomte zong a golna kibang ciet hi.

¹¹Tua ciengin lutna tunkot a vang laitah a te leh tong sawm pha hi; tuale tunkot vailam pen tong sawm le thum pha hi.

¹²Inndante’ mai ah thaw kikai a, alang ni-in tong khat tuoh ahi hi; alangni-a inndante zong tong guh ciet pha hi.

¹³Tua ciengin ama in inndan nualam[155] panin adang inndan nualam[156] dongin tunkot a te leh a kawm khat panin a kawm khat dong a golna tong sawmni le nga pha hi.[157]

¹⁴Ama in talaap zong te[158] a, tong sawmni a pha hi; tuale ama in inntuol pang zosie-a om tunkot khuompi bana tunkot zong a te hi.[159]

¹⁵Tunkot lutna mai panin a sunglam tunkot talaap sungnung dong tong sawmnga ahi hi.

¹⁶Inndante le a khuomte in tawlette nei a, tunkot lutna lampi in a sung lam kimvelah a vang neute[160] nei hi; tuale talaapte in zong a sunglam kimvel zosie ah tawlette nei a, khuomte tungah lutu kung lim kizem hi.

¹⁷Tua ciengin ama in leituol pulam ah ei peipi hi; tua sungah inndante le leituol kimvelah suongpha na om hi; tuale inndan sawmthumte in tua suongpha tung lam a kinga uhi.

¹⁸Tua suongpha pen tunkot pang tengah tunkot dung tantan a kipha ahi a, tam pen suongpha neinung pen ahi hi.

¹⁹Tua ciengin tunkot neinung a sunglam mai[161] panin leituol sungnung pulam mai dong a gamlatna a te leh tong zakhat a pha hi.[162]

²⁰Tua ciengin ama in leilu lam kinga a pulam leituol peina tunkot adung avai te hi.

²¹A pang tuohah inndan thum tuoh om a, a khuomte le a talaap a gol dan pen amasa tunkot tawh kikim hi; adung tong sawmnga pha a, avai tong sawmni le nga pha hi.

²²A tawlette, a talaap, le a lutu kungte a gol dan pen nisuona lam kinga tunkotte tawh kikim hi. Tua tunkot kato nadingin ciel sagi a nei kalei khat kidaw a, a sungah[163] a talaap a om hi.

²³Nisuona lama ma bangin, leilu lama tunkot tawh kigalsai-ah leituol sungnung lutna tunkot a om hi; ama in tunkot khatlekhat kikal a te leh tong zakhat pha hi.

²⁴Tua ciengin ama in leitaw lam manaw-in ei peipi a, leitaw lamah tunkot khat na om hi; ama in a khuomte le a talaap a te leh a gol dan pen tunkot dangte tawh kikim hi.

²⁵Adangte ah tawlet a op ma bangin a sung kimvel le a talaap sung lamah tawlette om hi; adung tong sawmnga pha a, avai tong sawmni le nga pha hi.

²⁶Tua tunkot kato nadingin ciel sagi a nei kalei khat kidaw a, a sungah a talaap a om hi. A langkhat tuohah lutu kunga kizem khuom khat tuoh a om hi.

²⁷Leituol sungnung leitaw lamah tunkot khat om hi; tunkotte kikal a te leh tong zakhat pha hi.

²⁸Tua ciengin ama in leitaw lam tunkot gei-a om leituol sungnung lamah ei peipi a, leitaw lam tunkot a te hi; a gol dan pen adangte ma tawh kikim hi.

²⁹A inndante, a khuomte, le a talaapte pen adangte tawh a golna kikim hi; tuale a sung kimvel le a talaap sungah tawlette a om hi; adung tong sawmnga pha a, avai tong sawmni le nga pha hi.

³⁰A kimvelah talaapte om a, adung tong sawmni le nga pha a, avai tong nga pha hi.

³¹A talaap pen leituol pulam kinga a, a khuomte tungah lutu kungte omin a kalei in ciel giet nei hi.

³²Tua ciengin ama in nisuona lam panga a om leituol sungnung lamah ei peipi a, tunkot a te hi; a gol dan pen adangte ma tawh kikim hi.

³³A inndante, a khuomte, le a talaapte a gol dan a dangte ma bang ahi hi; a sung kimvel le a talaap sungah tawlette a om hi; adung tong sawmnga pha a, avai tong sawmni le nga pha hi.

³⁴A talaap pen leituol pulam kinga a, alang tuoha a om khuom khat tuohah lutu kung tawh kizem a, a kalei in ciel giet nei hi.

³⁵Tua ciengin ama in leilu lam tunkotah ei peipi a, tuale ama in te hi; a gol dan pen adangte tawh kikim hi.

³⁶A inndante, a khuomte, le a talaap pen a gol dan adangte ma tawh kikim hi; a kimvelah tawlette om hi. Adung tong sawmnga hi a, avai tong sawmni le nga ahi hi.

³⁷A talaap pen tunkot pulam kinga a, alang tuohah khuom khat tuoh om hi; tuate lutu kung limin kizem hi. A kalei in ciel giet nei hi.

³⁸Tunkot talaap ah kot nei inndan khat om a, khum mun pen meihal biehnate a kisawpsiengna mun ahi hi.

³⁹Tunkot talaap sunga a pang tuohah sabuoi ni tuoh om a, tuate tungah meihal biehna, mawna zieha biehna, le khielna zieha biehna ding ganhingte kigo hi.

⁴⁰Leilu lam tunkot lutna talaap pulamah sabuoi ni om hi; talaap tunkot langkhatah zong sabuoi ni ma om hi.

⁴¹Tunkot sung lamah sabuoi li om a, tunkot pang a pulamah zong sabuoi li ma omin a unpi-in giet ahi a, tamte tungah biehpiehna dingte kigo hi.

⁴²Meihal biehna lui nadingin suong kisui sabuoi li om a, tuate adung avai tong khat le alang tuoh ahi a, a sanna tong khat ahi hi. Khumte tungah meihal biehna le biehpiehnate a kigaw cienga zah ding vanzahte kikoi hi.

⁴³A sung kimvel zosie-ah zabeh cie a sau siakawite kibul a, sabuoite tungah biehna ding sa kikoi hi.

⁴⁴Tunkot sunglam lutna lampi tung leituol sungnungah lasate ading inndante om a, khat pen leitaw lam kinga leilu lam tunkot pangah om a, adang khat pen leilu lam kinga nisuona lam tunkot pangah a om hi.

⁴⁵Ama in ka kungah, “Leitaw lam kinga tami inndan pen biehinn sunga nasem siempute ading ahi a,

⁴⁶tuale leilu lam kinga inndan pen maitam tunga na a sem siempute ading ahi hi; tam teng pen Zadok’ suonlehlahte ahi vua, Levi suonlehlahte lahah amate beh in ama’ na a sem dingin TOPA kung a nai thei uhi,” ei ci hi.

⁴⁷Ama in leituol te a, adung tong zakhat pha a, avai zong tong zakhat ma pha a, a kikim ningli a nei hi; tuale biehinnpi mai lamah maitam a om hi.

⁴⁸Tua ciengin ama in biehinnpi talaap lamah ei peipi a, talaap’ khuom te a te leh a pang tuoh tong nga pha a, tunkot avai tong sawm le li hi a, tunkot pang tuoha kawm kigette a lang ni-in tong thum tuoh pha hi.

⁴⁹Talaap adung tong sawmni pha a, avai tong sawm le ni pha hi; tua tunga kato nadingin kalei ciel sawm kidaw hi; a pang tuoha tunkot khuomte kikalah khuomte kiphut hi.