Read Zou EZEKIEL 46 Bible Online

EZEKIEL 46 - Zou bible

EZEKIEL 46

¹TOPA Pasien in tam bangin gen hi: Nisuona lam a kinga leituol sungnung tunkot pen nasep ni guh sung kikhah ding hi; ahi vangin sabbath ni le hladet ni-in kihong ding hi.

²A pulam panin talaap tunkot zui-in gam-uhpa lut ding a, tunkot khuom gei-ah a ding ding hi. Siempute in ama’ meihal biehnate le thunuoma biehnate pie-in tunkot lutna ah a lukun ding uhi. Tua ciengin ama pei ding a, ahi vangin nitah dongin tunkot kikhah lo ding hi.

³Sabbath-te le hladet ni ciengin tunkot lutna TOPA mai-ah gam sung mite a kun ding uhi.

⁴Sabbath ni-in gam-uh pa in TOPA tunga a pieh meihal biehna pen nuol baanglo tuuno guh le tuutang khat hi ding hi;

⁵tuale tuutang tawh a kipieton ding an tawh biehna pen ephah khat hi ding a, tuuno tawh a kipieton ding an tawh biehna pen ama pieh nuom zaza hi ding hi, ephah khat simin sathau hin khat tawh pieton ding hi.

⁶Hladet ni ciengin ama in nuol baang lo bawngtang guol khat, tuuno guh le tuutang khat pie ding hi;

⁷ama in bawngtang khat tawh an tawh biehna dingin ephah khat pie ding a, tuutang tawh ephah khat ma pie-in, tuuno tawh ama pieh nuom zaza pie ding hi, ephah khat simin sathau hin khat ta tawh pieton ding hi.

⁸Gam-uhpa a lut ciengin talaap tunkot zui-in lut ding a, tua lampi ma zui-in pusuoh ding hi.

⁹A kisesa pawite ah TOPA mai-ah gam mite a pei ciengun Pasien bie dinga leilu lam tunkota a lut poma leitaw lam tunkotah pusuoh ding uhi; leitaw lam tunkota a lut poma leilu lam tunkotah pusuoh ding uh: a lutna uh tunkot zui-in amate pusuoh lo ding a, hinanle a mailam-ah tangtahin a pusuoh ding uhi.

¹⁰Amate a lut ciengun, gam-uhpa zong amate tawh lut ding a, amate a pusuo ciengin ama zong pusuoh ding hi.

¹¹A pawite ule a hun zui-a a kisesa pawite ah an tawh biehna dingin bawngtang khat le ephah khat hi ding a, tuutang tawh ephah khat ma kipie-in, tuuno tawh a piete in amate pieh nuom zaza pie ding a, ephah khat simin sathau hin khat ta tawh a pieton ding hi.

¹²TOPA tungah gam-uhpa in nop thu-a biehna dingin meihal biehna ahi a, lungnuoma biehna ahi zongin a pieh ciengin, ama adingin nisuona lam a kinga tunkot kihonpieh ding hi; tuale ama in meihal biehna ahi a, thunuoma biehnate ahi zongin a pieh ciengin sabbath ni-a bangin pie ding hi. Tua ciengin ama pusuoh ding a, ama a pusuo zaw ciengin tunkot kikhah ding hi.

¹³Ama in TOPA tungah meihal biehna dingin nisimin nuol baanglo kum khat a pha tuuno khat pie ding hi; ama in zingmawng sielin pie ding hi.

¹⁴Tuale ama in tuate tawh an tawh biehna ephah khat seguh suo se khat le anneel a tap suoh zo dingin sathau hin khat sethum-suo-sekhat zingmawng sielin pie zing ding hi; tam pen ngaina kipin kizang zing ding hi.

¹⁵Tua bangin tuuno, an tawh biehna le sathaute pen meihal biehna dingin zingmawng sielin kipie zing ding hi.

¹⁶TOPA Pasien in tam bangin gen hi: Gam-uhpa in a gouluo[206] panin a tapate lahah khat penpen tungah letsong a pieh leh a tate in tuate a tang ding vua, amate adingin a gouluo uh hi ding hi.

¹⁷Ahi vangin a gouluo lah panin a nasemte khat penpen tungah letsong a pieh leh, suotah kum dong cieng ama-a’ hi ding a, tua zaw ciengin gam-uhpa kungah tungkia ding hi; a tapate beh in tua letsong pen a gou dingun a kem peisuoh thei ding uhi.

¹⁸Gam-uhpa in mite’ gou khat popo lahpieh lo ding a, a neisa uh leitang panin zong amate notmang lo ding hi; ka mite khat mama zong amau’ neisa leitang a kilahpieh lo nadingin gam-uhpa in ama’ neisa leitang panin a tapate tungah amau’ gouluo a pie ding hi.

¹⁹Tua ciengin ama in tunkot panga om lutna lampi zui-in, sah lama siempute dinga inndei siengtho kiguolte sungah ei peipi hi; tuale khum sung nitumna lam a mongta penah mun khat ka mu hi.

²⁰Ama in ka kungah, “Tam mun pen siempute in khielna zieha biehna le mawna zieha biehnate a huon nading uh mun le an tawh biehnate a em nading uh mun ahi a, tam pen leituol pulamah tuate peipi loin a siengtho nate tawh mite a lawsah khah lo nading uh ahi hi,” ei ci hi.

²¹Tua ciengin ama in leituol pulam ah ei peipisuoh a, tuale leituol ning li tengah ei zawpi hi; leituol ning li cietah leituol khat ciet a na om hi.

²²Tua leituol ning lite sungah leituol neute[207] om a, adung tong sawmli avai tong sawmthum ahi hi; a li-un a golna uh kikim hi.

²³Tua leituol neu lite[208] sunglam kimvel cietah suong kikhengzol guol khat ciet om a, tua suong kiguolte’ a tawguol kimvelah meikhuhte kibawl hi.

²⁴Tua ciengin ama in keima kungah, “Tamte pen biehinnpi sunga nasemte in mite’ biehpiehna sa a huon nading uh anhuon buh ahi hi,” ei ci hi.