Read Zou EZEKIEL 6 Bible Online

EZEKIEL 6 - Zou bible

EZEKIEL 6

¹TOPA’ thu ka kungah ang tung hi:

²Mihing aw, Israel muolte lam na maingatin amau langah thu phuong inlen,

³tuale gen in. No Israel muolte aw, TOPA Pasien thugen ngai un! TOPA Pasien in muol le tangte, kuomte le guomte tungah tam bangin a gen hi: Kei mama in na tung vuah namsau kang tusah ding a, na munsangte uh ka susie ding hi.

⁴Na maitamte uh hawmsuoh ding a, na gimnamtui halna taute uh kitawkeh ding hi; tuale keima in na milimte uh mai-ah a kithat mite ka sepsuh ding hi.

⁵Keima in a milimte uh mai-ah Israel misi luongte ka siel ding hi; tuale na maitam kimvel vuah na gu na tang teng uh ka thezah ding hi.

⁶Na tenna mun popo vuah na khuopite uh hawmsuohin na munsangte uzong kisusie ding a, na maitamte uh hawmsuohin kisusie-in,[13] na milimte uh kitawkehin kisusie ding a, na gimnamtui halna taute uh kisattawngin nasepna teng uh maimang ding hi.

⁷Na laikim vuah a kithatte a pua ding uhi; tua ciengin note in keima TOPA ka hi lam nei thei ding uhi.

⁸Ahi vangin keima in mi kimkhat ka suohtasah ding hi. Minamte lahah kimkhat namsau panin suohta-in gamcin tengah na kithethang ding uhi.

⁹Saltang dinga a kipeipina munah a om minamte lah panin a suohta sunte in a kideh zo lo a lungsim ziehun keima kung panin vahmang nan ule a kideh zo lo a mit ziehun a milimte uh’ nua a zuina uh ziehin, ka lungsim a kitapzan lamtah amate in thei siemin keima ei phawh ding uhi. Tua ciengin a kidahhuoi gitlona a bawlte zosie uh ziehin amahaw mama a huothuoi-in kimu ding hi.

¹⁰Tuale amate in kei pen amate tungah tami gimna a tungsah dinga a mawh galgih TOPA ka hi lo lam ei thei ding uhi.

¹¹TOPA Pasien in tam bangin gen hi: Israel innkuonte’ gitlona le a kidahhuoi a gamtatnate uh ziehin na khut bengin na kengin tuol sia inlen, “Aw kadei,” ci-in! Bangzieh ahei cile amahaw, namsau, kielpi, le pulnatna tawh a si ding uhi.

¹²Gamlapi-a omte pul natna tawh a si ding uhi; a nai-a omte namsau tawh a si ding uhi; tuale a kihingkhawi a kinuasiete zong kielin a si ding uhi. Tam bangin amate tungah ka lungthahna ka tungsah ding hi.

¹³Tuale a maitam kimvel vua a milimte lah uh, muolsang tung zosie, muoldawn tung zosie, singna dum nei zosie, a na pha gangpi sing nei zosie, le muncin tenga a milimte uh mai, le gimnamtui biehna a luina uh mun tengah a mi kithatte uh’ luong a kisiel ciengin note in keima TOPA ka hi lam nei thei ding uhi.

¹⁴Amate langkhatah ka khut ka zah ding a, amau’ tenna mun zosie, senel gam pan Riblah khuo[14] dong gamkhing le a hawmsuohin ka bawl ding hi. Tua ciengin amate in keima TOPA ka hi lam ei thei ding uhi.