Read Zou EZEKIEL 8 Bible Online

EZEKIEL 8 - Zou bible

EZEKIEL 8

¹A kum guhna kum, a hla guhna, a ni nga ni-in ka inn sungah ka to laitahin ka mai-ah Judah uliente ang to vua, tuale khum mun ka tungah TOPA Pasien’ khut ang tu hi.

²Keima in ka en a, mihing’ lim[19] tawh a kibang dan khat a om hi; a kawng neisie mei tawh kibang a, a kawng tungsie sumngo tang pimpem tawh kibang hi.

³Ama in khut tawh a kibang khat ang zahsuh a, tuale ka humsam ah ei man hi; tuale hlagau in lei le van kikalah ei khaito a, Pasien’ mangmunate sungah ama in Jerusalem leilu lam biehinn tuol sungnung lutna tunkot-a thangsietna a piengsah milim kitunna mun ei tun hi.

⁴Tuale khum tahah Israel Pasien’ minthanna na om a, tua pen kuom sunga ka musa mangmuna tawh kibang hi.

⁵Tua ciengin Pasien[20] in ka kungah, “Mihing aw, leilu lam nga-in dahto in,” ei ci hi. Tuaci’n leilu lam nga-in ka dahto leh khumtah maitam tunkot leilu lam lutna munah tami thangsietna milim na om hi.

⁶Ama in keima kungah, “Mihing aw, amate in keima’ munsiengtho panin a gamlapi ah ei nawmang thei nadingun tam munah Israel innkuonte in a kidahhuoi gamtatnate a bawl uh na mu ei mah? ei ci hi.

⁷Tuale ama in inntuol lutna-ah ei peipi hi; keima in ka en leh kulvang mun khat na om hi.

⁸Tua ciengin ama in ka kungah, “Mihing aw, tua kul to vawi,” ei ci hi; ka to pai leh khum munah kot khat ka mu hi.

⁹Ama in kei kungah, “A sungah tum inlen, a mudahuoi a gamtatnate uh va en ta’n,” ei ci hi.

¹⁰Tuaci’n kei zong pei-in ka va en ta hi; khumtah kawm tung tengah a bawhva ganhing namcin’ lim, a kidahhuoi gamsa lim, le Israel innkuonte’ bieh ganhing namcin lim na kisuoi hi.

¹¹Amate mai-ah Israel innkuon’ upa sawmsagite a na ding a, tuate lahah Shaphan’ tapa Jaazaniah zong na ding hi. Amate in gimnamtui kuong khat ciet a tawi vua, tuale van lamah gimnamtui halna meikhu a kato valuh hi.

¹²Tua ciengin ama in ka kungah, “Mihing aw, miel lahah Israel innkuon upate in a milim inndan sung ciet vua a bawl uh na mu zo tai mah? Azieh pen amate in, ‘TOPA in eite ei mu lo hi, TOPA in tam gam nuasie ta hi,’ ci uhi,” ei ci hi.

¹³Ama in keima kungah, “Tam teng sanga a mudahuoi zaw a bawlte uh na mu lai ding hi,” zong ei ci hi.

¹⁴Tua ciengin ama in TOPA’ biehinn sung lutna leilu lam tunkot ah ei tut a, khumnah Tammuz a kici pasien kaa-in numeite a to uhi.

¹⁵Tua ciengin ama in ka kungah, “Mihing aw, tami na mu tai mah? Tam teng sanga a mudahuoi zaw na mu lai ding hi,” ei ci hi.

¹⁶Tuale ama in TOPA’ leituol sungnungah ei peipi hi; khumtah, TOPA’ biehinnpi lutna innhlap le maitam kikalah mi sawmni le nga tang ding khat na om a, TOPA’ biehinn nua ngatin nisuona lam a nga vua, nisuona lam nga-in ni bie-in a na khupbawh uhi.

¹⁷Tua ciengin ama in ka kungah, “Mihing aw, tami na mu zo tai mah? Tami sunga Judah innkuonte in a bawl uh a mudahuoi a gamtatnate uh a siehuoi seng sih amah? Amate in tatsietna tawh gamsung kidimsahin, ka lungthah zawh lai nadingin ei phin ding uh a kul ma amah? En in, a nahkuo vuah singba a siet uh khula!

¹⁸Tua ahi ziehin lungthahna tawh amate tungah ka gamta ding hi; ka mit in amate mu loin ka koi sih ding a, zong ka khuotuo sih ding hi; tuale keima’ zahna ah awging tahin ang kiko vangun a thungetna uh ka ngaipieh sih ding hi,” ei ci hi.