Read Zou EZEKIEL 9 Bible Online

EZEKIEL 9 - Zou bible

EZEKIEL 9

¹Tua ciengin keima’ zahin nahpi tahin ama ang kiko a, “No khuopi a that mite aw, ei nai unlen, na khut vuah suhsiet nading na hiem uh hing tawi ciet un,” a ci hi.

²Tuale leilu lam kinga kotpi tungnung lam panin mi guh hing pei-in a khut vuah mi thana hiem khat ciet a tawi uhi; amate lahah pasal puonkang sil khat om a, a pangah laitui bung khat a tawi hi. Amate ang tumin sumngo maitam gei-ah ang ding uhi.

³Khum laitahin a om ngaina Cherub panin Israel Pasien’ minthanna vang ang peito a, biehinn kotbieng ah ang khawl hi. TOPA in puonkang a sil, a panga laitui bung nei pa ang hlan hi;

⁴tuale ama kungah, “Jerusalem khuopi sung zosie ah vah kawikawi inlen, tua sunga sil mudahuoi kibawl zosie ziehin khuisa-in a tau mite’ talpangah melicina va bawl ta’n,” a ci hi.

⁵Ama in midangte kungah, “Khuopi sung zosie-ah ama nua zui unlen mi va that ta un; na mit un mu lo a nei sih ding a, koima zong na khuotuo sih ding uhi.

⁶Puteh, tangval, ngahnu, numei, naupangte that sieng unlen, ahi vangin ciemtena nei poma khoikha sih un. Tuale ka biehinn ah pan pai un,” a ci hi. Tuaci’n amate in biehinn mai-a om upate lahah a pan pai uhi.

⁷Tua ciengin ama in a kung vuah, “Biehinn buasah unlen, a leituol tengah misi luong dimsah un. Kuon ta un!” a ci hi. Tuaci’n amate kuonin khuopi sungah mi a thatgam uhi.

⁸Amate in mi a tha laitahun kei guoh ei nuasie vua, tuale kei zong tuol kunin ka bawhsuh a, “Kadei TOPA Pasien! Jerusalem tunga na lungthahna na sunhlah ziehin Israel a omsun teng zong na thagam sieng ding ahi ta amah?” ci-in ka kiko hi.

⁹Ama in keima kungah, “Israel innkuonte le Judah innkuonte’ khielna nah gol seng luo hi; gam sung teng sisan tawh kidim a, khuo sung teng letatna tawh kidim hi; azieh pen amate in, ‘Gam sung, TOPA in taisan zo a, TOPA in mu nawn lo hi,’ ci uhi.

¹⁰Kei ka hi leh ka mit in mu lo nei loin khuotuona zong ka nei sih ding a, a gamtatnate uh amate tungah ka tusah ding hi,” ei ci hi.

¹¹Tua ciengin puonkang a sil, a panga laitui bung tawi pa in thu ang nua tutkia a, “Nei sawl bangin ka sem zo hi,” ei ci hi.