Read Zou DANIEL 1 Bible Online

DANIEL 1 - Zou bible

DANIEL 1

¹Judah Kumpipa Jehoiakim kumpi a suo zaw a kum thumna kumin Babylon Kumpipa Nebuchadnezzar pei-in Jerusalem a imtawm hi.

²TOPA in Judah Kumpipa Jehoiakim a kipan Pasien’ inn sunga om vante pawlkhat zong ama’ thuneina sungah omsah a, ama in Shinar[1] gamah tuate puo-in a pasien-te’ goukholna inn sungah koi hi.

³Tua ciengin kumpipa in a kumpi innsung mangpa Ashpenaz kungah kumpi innkuon sung pan le milien namte lah panin

⁴a khangdawng a pumpi tunga poina a nei lo, a melhoi, pilna siemna namcin a kiva, theina le mi navah, le kumpi inn sunga na a sem thei ding Israel mi pawlkhat hing sawl in, ci-in thu a pie hi; amate pen Chaldea lai le ham sin ding ahi uhi.

⁵Nisielin kumpipa tanh bangbang an le lenggazu tawh vah dingin kumpipa in amate thu a pie hi. Amate pen kum thum sung pilna kisinsah ding a, tua zaw ciengin kumpi thukhen zumpi ah nasem thei ding uhi.

⁶Tuate lahah Judah minam panin Daniel, Hananiah, Mishael, Azariah-te kihal uhi.

⁷Kumpi innsung mangpa in amate mindang phuopieh hi: Daniel’ min dingin Belteshazzar, Hananiah’ min dingin Shadrach, Mishael’ min dingin Meshach, Azariah’ min dingin Abednego ahi hi.

⁸Ahi vangin Daniel in kumpipa an le zu tawh ama le ama a kibuasah lo nadingin a khensat hi; tuaci’n ama in ama le ama a kibuasah lo nadingin kumpi innsung mangpa kungah phalna ngen hi.

⁹Pasien in Daniel pen kumpi innsung mangpa tung panin angvanna le lainatna a ngasah hi.

¹⁰Kumpi innsung mangpa in Daniel kungah, “Ka pu kumpipa ka giing hi; na an neh ding le na dawn dingte ama in sesa-in nei zo hi. Ama in na khanguol khangdawng dangte sangin na tahsa uh a gawngzaw-in hing mukha leh note ziehin kumpipa in kei ei ngawngtan ding hi,” a ci hi.

¹¹Tua ciengin kumpi innsung mangpa in Daniel, Hananiah, Mishael le Azariah-te cing dinga a koi mipa kungah Daniel in tam bangin a thum hi:

¹²“Hepina tawh na nasemte ni sawm sung ei en phot in. Ka neh ding uh ante lohing le ka dawn ding uh tuisih beh ei piesah in.

¹³Tua ciengin kumpipa’ an a ne khangdawngte melpuoh dan le ka melpuoh dan uh nei tekah thei ding a, tuaci’n nangma’ ei muna bang bangin na nasemte ei bawl ta’n,” a ci hi.

¹⁴Tuaci’n ama in tam ngetna thukimin ni sawm sung amate a encih phot hi.

¹⁵Ni sawm a cin zaw ciengin kumpipa’ an a ne khangdawng zosie sangin a maisuo uh hoizaw a, zong thauzaw uhi, ci kimukhie hi.

¹⁶Tuaci’n a cingpa in a kumpi an ule a dawn ding uh zute hemdawhin amate ante lohing beh a pie hi.

¹⁷Pasien in tam khangdawng lite tungah lailam le pilna vannuoi ah theina le siemna a pie hi; Daniel in mangmuna zosie le mangkhiet siemna zong nei hi.

¹⁸Kumpipa in amate a kipeipi nadinga a sesa hun a cin ciengin kumpi innsung mangpa in Nebuchadnezzar mai-ah amate peipi a,

¹⁹tuale kumpipa in amate a hopi hi. Tuale amate zosie lahah Daniel, Hananiah, Mishael le Azariah-te tawh tekah thei ding koima kimu lo hi; tua ahi ziehin kumpi inn sunga na sem dingin amate kikoi hi.

²⁰Pilna le theitelna tawh kisai-in a thudawh vannuoi ah a gambup sunga om mitphiel siemte le aisan thei zosie sangin a za sawmin a siem zawh lam uh kumpipa in mukhie hi.

²¹Daniel in Kumpipa Cyrus kumpi a suo zaw a kum khatna dongin khum sungah a nasep a zomsuoh hi.