Read Zou DANIEL 10 Bible Online

DANIEL 10 - Zou bible

DANIEL 10

¹Persia kumpipa Cyrus kumpi a suo zaw a kum thumna kumin Belshazzar kici Daniel kungah thu khat kihil hi. Tua thu thuman hi a, kidona lienpi khat tawh kisai ahi hi. Ama in tua thu thei a, mangmuna sunga a mu zong theitel hi.

²Khum hunin keima Daniel, nipikal thum sung ka kap hi.

³Nipikal thum vilvel an le tui bangma ne loin ka kam in zu le sa a ciem sih a, sathau zong ka kinu sih hi.

⁴Hla masa ni sawmni le li ni-in gun golpi gei-ah (tua pen Tigris gun ahi hi) ka din laitahin,

⁵ka dahto leh saihadiel puon silin, a kawng kimvela Uphaz gam pieng kham kawnggah a gah mi khat ka mu hi.

⁶A tahsa pen beryl suongmanpha bangin vam lihleh a, a maitang tunphe bangin tangin, a mittangte meikuong tawh kibang a, a bante le a kengte sumngo nawtngilsa bangin tee lihlehin, a awging pen mihonpi aa-ul husa tawh kibang hi.

⁷Keima Daniel beh in tua mangmuna ka mu hi; keima tawh a omtonte nahpi tahin a zau vangun tua mangmuna a mu sih vua, tuale amate taimangin a kiphuol uhi.

⁸Tuaci’n a thupi tami mangmuna mu dingin keima tangin ei kinuasie hi. Ka tha ka zung teng tawpin ka ci ka sa kangdang a, tha le zung kici ka nei ta sih hi.

⁹Tua ciengin a awging ka za hi; tuale khuophawh nawn loin tuolah ka puasuh hi.

¹⁰Ahi vangin khut khat in ei thamin ka khut le ka khupin ei phongto hi.

¹¹Ama in keima kungah, “Daniel, nang ang ki-it mama hi, nang kunga kang gen ding thute thudon in. Nang kungah kei ei kisawlzo ahi ziehin dingtang in,” ei ci hi. Tuaci’n ama in kei kungah tam thu ang gen laitahin a citun pumin ka dingto hi.

¹²Ama in keima kungah, “Daniel aw, zau sin, azieh pen theitel nopna lungsim le nang le nang Pasien mai-ah kiniemkhieh nopna lungsim nei na sawm masah pen ni-a kipanin na thugente a kiza zo ta a, tua na thugente zieha ang pei ka hi hi.

¹³Ahi vangin Persia kumpi gam uhpa in ni sawmni le ni khat sung keima ei nang hi. Tuaci’n keima ei panpi dingin gam uhpite lahah khat ahi Michael ang kuonin ei panpi a, Persia[55] kumpi gam uhpa tawh tua munah ama ka nuasie hi.

¹⁴Hun nukhia ni ciengin na mite tungah bang thu ang pieng ding ahei ci na theitel nadingin ang panpi dinga ang pei ka hi hi. Bangzieh ahei cile tami pen ang tung lai nite adinga mangmuna ahi hi,” ei ci hi.

¹⁵Ama in tam thu teng a gen laitahin ka mai tuolkunin ka ham thei sih hi.

¹⁶Tua ciengin mihing melpuo khat in ka nephu ei thampieh a, thu gen dingin ka kam kahin ka mai-a ding pa kungah, “Ka pu aw, ka mangmu ziehin ka tungah tam bang natnate ang tungzo ahi ziehin tha zong ka nei ta sih hi.

¹⁷Ka pu nasempa in ka pu tawh bang i ci kiho thei diei? Azieh pen citun[56] dildelin tha ka nei ta sih a, naahu zong ka nei ta sih hi,” ka ci hi.

¹⁸Mihing melpuo khat in keima ei thamkia leuleu a, ei thakhausah hi.

¹⁹Ama in, “Ang ki-it mama pa aw, zau sin, nang adingin lungmuon a om hi. Na tha khausah inlen hangsan in!” ei ci hi. Ama in kei ei hopi ciengin ka tha ang hat pai a, “Ka pu aw thu gen in, azieh pen nang in kei nei thakhausah ta hi,” ka ci hi.

²⁰Tua ciengin ama in, “Nang kungah bang dinga hing pei ka hei ci na thei ei mah? Tu-in Persia gam uhpa sim dingin ka kilekia lo phamaw a, ama ka zaw ciengin Greek uhpa ang pei ding hi.

²¹Ahi vangin thuman laibu sungah bang kigiel ci kang gen ding hi. Na gam uhpa uh Michael ci simlo tam gam uhte ei dopi thei ding ka kungah koima om lo hi.