Read Zou DANIEL 11 Bible Online

DANIEL 11 - Zou bible

DANIEL 11

¹Kei ka hile Mede mi Darius a kum khatna kumin ama panpi dingin ka ding a, ama ka thakhausah hi.

²“Tu-in nangma kungah thuman kang tangko ding hi. Persia gamah kumpi thum khang lai ding hi. A lina pen tuate zosie sangin hauzaw ding a, a hauna huvangin a thahat ciengin ama in Greek kumpi gam langpang dingin mi zosie a holtuo ding hi.

³Tua ciengin galhang kumpi khat khang ding a, ama in thuneina aana tawh uhin a nop bangbangin gamta ding hi.

⁴Ama a vangliet laitahin a kumpi gam kehin leimong li lam manaw-in kikhenkhe ding a, ahi vangin ama’ suonlehlahte in vai a hawm nawn sih ding a, aana tawh a vaihawm lai a bang nawn sih ding hi; bangzieh ahei cile a kumpi gam kiphungkal ding a, tam mite simlo midangte kipie ding hi.

⁵“Tua ciengin leitaw lam kumpipa thahat ding a, ahi vangin a uliente lahah khat pen ama sangin thahatzaw-in ama’ gam sanga a golzaw gam khat a uh ding hi.

⁶Kum phabep khat zaw ciengin amate in kipawltonna a bawl ding vua, leilu lam kumpipa kungah thukimna bawl dingin leitaw lam kumpipa’ tanu a pei ding hi. Ahi vangin tua nu in a aana a tusuoh zo sih ding a, a suonlehlahte zong a kip sih ding hi. A cingte, a tapa le a panpite tawh tua nu kithat ding hi. “Khum hun sung tengin

⁷tua pa munah tua nu’ gui panin a ba khat a khang ding hi. Galkapte sim dingin ama kuon ding a, leilu lam kumpipa’ kulpi-ah lutin amate simin a zo ding hi.

⁸Ama in a pasien-te uh nangawn, a milimte uh, ngun le kham tawh a kibawl a vanzah manpha teng utawh, Egypt gamah puomang ding a, ama in bakhat sung leilu lam kumpipa a do ding a ki-ip ding hi.

⁹Tua ciengin leilu lam kumpipa in leitaw lam kumpipa’ gam sim ding a, ahi vangin ama’ gamah a kilekia ding hi.

¹⁰“A tate in gal a bawl ding vua, galkap tampitah kaikhawmin tuikhang bangin kuonin a kansan ding vua, a kulpi dongah gal kidona a om ding hi.

¹¹Leitaw lam kumpipa a lungthahsa-in kuonin leilu lam kumpipa a sim ding hi. Leilu lam kumpipa in galkap tampi a khop vangin leitaw lam kumpipa’ galkapte in a zo ding uhi.

¹²Galkap honpite a kipeipi ciengin a lungsim kiliensahin tulsawm tulza simin thatgam ding a, ahi vangin a zo tuom sih ding hi.

¹³Bangzieh ahei cile leilu lam kumpipa in a masa sanga a tamzaw galkap honpi khonkia-in kum phabep[57] khat zaw ciengin neh le tah kicingin galkap tampi tawh a kuonsuh ding hi.

¹⁴“Khum hun ciengin mi tampi in leitaw lam kumpipa a sim ding uhi. Na mite lahah a mottat mite in tua mangmuna a tangtun nadingin a sim ding vua, ahi vangin amate in gal a lel ding uhi.

¹⁵Tua ciengin leilu lam kumpipa kuonin khuopi imtawmna lei sungvum ding a, kul tawh ki-im khuopi a la ding hi. Leitaw lam galkapte in a nang zo sih ding vua, a teeltuom a galkapte nangawn in zong a nang zo sih ding uhi, azieh pen amate in nan zawh nading tha a nei sih ding uhi.

¹⁶Ahi vangin ama sim dinga a kuon pa in a dei bangin bawl ding a, koima in ama nang zo lo ding hi. Ama in gam nuom-ah panmun la ding a, tua gam teng zosie ama’ thuneina sungah om ding uhi.

¹⁷A kumpi gambup’ tha tawh ama kuon ding a, kilem nading thute[58] puo-in tuate sep sawm ding hi. Tua kumpi gam[59] a suhsiet thei nadingin numei khat tawh ama kinungsah ding hi; ahi vangin a gelna muolsuo zo loin a phattuompi sih ding hi.

¹⁸Tua zaw ciengin ama tuipi pang gam tengah kihei-in gam tampitah a zo ding hi. Ahi vangin galkapmang khat in a mi thusimlona teng maimangsah ding hi; a tahtahin[60] mi thusim lona teng ama tungah a tusahkia ding hi.

¹⁹Tua ciengin ama a gam sunga kulpite lam manaw-in kilekia ding a, ahi vangin ama kipalpua-in a kimu zo nawn sih ding hi.

²⁰“Tua ciengin ama’ munah mi khat khangin tua pa in a kumpi gam thupi nadingin ulien khat a sawl ding hi; ahi vangin ni tomkal sungin lungthahna le gal kidona zieh hi loin ama kisugam ding hi.

²¹Ama’ munah kumpi thupina a kipie lo, a simmawhuoi mipa khat khang ding hi; genkhol loin ama kuonin zuouthu tawh kumpi gam a tang ding hi.

²²Ama mai-ah galkapte kisumaimang ding a, thuciemna bawl ulienpa zong kisugam ding hi.

²³Tuale ama tawh kipawltonna a bawl zaw ciengin ama zuoutatin mi themno khat tawh a thahat ding hi.

²⁴Genkhol loin gam sunga leihoi pen[61] munah pei-in a pu a pate in a na bawl ngai nai lo silte bawl ding a, galvanlahte, van kitomgamte, le haunate vautahin amate a hawmpieh ding hi. Ama in mun muonhuoite sim sawm ding a, ahi vangin bakhat sung beh hi ding hi.

²⁵Ama in leitaw lam kumpipa sim dingin galkap tampi tawh a hatna le a khensatna satsuo ding a, leitaw lam kumpipa in a tamzaw le a hatzaw galkap tawh na do ding hi. Hinanle ama in a zo sih ding hi, azieh pen kumpi’ an a ne mite in

²⁶ama do ding a sawmdap ding uhi. Amate in ama sugamin ama’ galkapte zong kisumaimang ding a, mi tampitah a si ding uhi.

²⁷Kumpi tegel in a lungsim vuah gitlo ding beh a sawm vua, sabuoi khatah to tonin zuouthu a gen tuoh ding uhi. Ahi vangin a lawcing sih ding hi, azieh pen a kisesa tawpna ding hun tung lai ding hi.

²⁸Ama’ gamah nei le lam tampi tawh kilekia ding a, ahi vangin ama in a lungsimin a siengtho thuciemna langpan ding hi. A nop a thei-in ama gamta-in a gamah kilekia ding hi.

²⁹“A kisesa hun a cin ciengin ama kilekia-in leitaw lamah kuonsuh ding a, hizongle tam hun pen a masalaite tawh kibang lo ding hi.

³⁰Azieh pen ama sim dingin Kittim tembawte pei ding a, tuale ama lungkie-in a kilekia ding hi. Ama kithangpaisah ding a, tuaci’n thuciemna siengtho a lang bawl ding hi. Ama kilekia-in tua thuciemna siengtho a taisante a thupi bawl ding hi.

³¹Ama’ sawl galkapte in biehinnpi le kulpi la-in a buasah ding uhi. Amate in nisim meihal biehna a khawlsah ding vua, a susie ding sil kidahuoi a koi ding uhi.

³²Ama in zuouthu tawh thuciemna palsatte a zawl ding hi; hinanle a pasien uh tunga thuman mite in dingkipin a do ding uhi.

³³Mite lahah mipilte in mi tampi tungah theitelna a neisah ding uhi; ahi vangin ni tomkal sungin meikuong le namsau tawh amate a si ding vua, sal dingin kipeipi-in kitomgam ding hi.

³⁴Amate in tua banga a thuoh uh ciengin panpina themkhat beh a nga sam ding vua, mi tampite in lungsim tahtah hi lopi-in amate a pawl ding uhi.

³⁵Tawpna hun a tun masangin amate kisusiengin kisiensuo a,[62] a kisawpsieng thei nadingin mipil kim khat kithat ding hi, azieh pen a kisesa hun a tun masangin a kikalah hun khat a omlai hi.

³⁶“Tua kumpipa a nop bangbangin a gamta ding hi. Ama le ama kitawisangin ama le ama pasien khat popo sangin a lienzaw-in kingaisun ding a, tuaci’n pasien-te’ Pasien langkhatah cizat huoi kam a ham ding hi. Lungthahna hun a bukim masangsie ama a cithei ding hi, azieh pen a kisesa bangin kisem ding hi.

³⁷Ama in a pu a pate’ pasien-te ahi sihle numeite’ deite zatah lo ding hi; ama in pasien dang khat popo zong a zatah sih ding hi, azieh pen tuate zosie sangin ama le ama a lienzaw-in a kingaisun hi.

³⁸Ama in tam teng tangin kulpi cing pasien-te zatahzaw ding a, ngun le kham, suong manphate le letsong mantamte tawh a pu a pate’ na theikhah lo pasien a patawi ding hi.

³⁹Ama in gamdang pasien khat’ panpina tawh kulpidet pente a sim ding hi. Ama in ama a pom mite hausah semsemin mi tampite tungah vaihawmin koi ding a, a man tawh kizui-in leitangte a hawmpieh ding hi.

⁴⁰“Hun tawp ni ciengin leitaw lam kumpipa in ama a sim ding hi. Ahi vangin leilu lam kumpipa in sakol leengte, sakol galkapte, le tembaw tampi tawh pumpei bangin a simgawp ding hi. Gamcin teng do dingin ama kuon ding a, tuikhang bangin a nawtsuoh ding hi.

⁴¹Gamnuom sungah ama lutin mi tul tampi tahin sina thuoh ding a, ahi vangin ama’ khut sung panin Edom, Moab, le Ammon gam thupi mun teng suohta ding uhi.

⁴²Ama in a khut zahin tua gamte sim ding a, Egypt gam a suohta sih ding hi.

⁴³Kham le ngun ahi goute le Egypt hauna zosie tungah ama vaihawmin pang ding hi; tuale Libya le Ethiopia mite in ama nua a zui ding uhi.[63]

⁴⁴Ahi vangin nisuona lam le leilu lam pana thu kipuohte in ama patausah ding a, mi tampitah a susie ding le a sumaimang dingin thangpaina tawh ama a kuon ding hi.

⁴⁵Ama in a etlawm muol siengtho le tuipi kikalah a kumpi puonbuhte a sung ding hi. Hinanle koima’ panpi loin ama si ding hi.