Read Zou DANIEL 12 Bible Online

DANIEL 12 - Zou bible

DANIEL 12

¹“Khum hunin na mite a cing ulienpipa Michael ang khang ding hi. Minamte piencil a kipanin a pieng ngai nai lo lungkhamna hun ang tung ding hi. Hizongnanle khum hun ciengin laibu sunga a kigiel a min kimukhie zosie kihunkhie ding hi.

²Leitung[64] leivui lahah a kimu mi tampite tho ding a, pawl khatte kumtawn hinna, pawl khatte maizumna le kumtawn simmawna nga dingin a tho ding uhi.

³A pilte ahi uleh vantung[65] khuovah bangin a tang ding vua, dihna lamah mi tampi a puite pen aasi bangin a tang tawntung ding uhi.

⁴Hizongle Daniel aw, tawpna hun a tun masangin tam thute genzah sinlen laibu khahcip phot in. Mi tampi a suhtai a totai ding vua, sietna[66] a khang ding hi,” ei ci hi.

⁵Tua ciengin keima Daniel in ka en leh, adang mi ni ang kilang a, khat pen tami lui pang lamah, a khat pen khumi lui pang lamah a ding hi.

⁶Amate lahah saihadiel puon a sil luinah lama a ding mipa in, “Tam sil lamdangte a tawp nading bang tanvei sawt ding ahei?” ci-in dong hi.

⁷Luinah lama a ding saihadiel puon a sil tua mipa in a khut zietlam le veilam vantung lamah a lamto hi. Tuale khum hun pen hun khat, hun ni, le hun lang[67] hi ding a, mi siengthote’ vanglietna a kisiet hun ciengin tam sil zosie kimuolsuo ding hi,” ci-in a hing zing pa’ minin a kiciem ka za hi.

⁸Ka zah vangin ka telcien sih hi; tuaci’n keima in, “Ka pu aw, tam teng pi bang hingci pien ding ahei?” ka ci hi.

⁹Ama in, “Daniel aw, pei ta’n, azieh pen tawpna hun a tun masangin tua thute selcip imcip ahi ding hi

¹⁰Mi tampi kisiensuo kinawt zolin kinawt ngo ding hi, hinanle migilote ahile a gitlo gamtat uh a zomsuoh ding uhi. Migilote khat beh in a theisiem sih ding vua, ahi vangin mipilte in a theisiem ding uhi.

¹¹Nisima kibawl meihal biehna kikhawlsahin a susie sil kidahhuoi a kikoi huna kipanin ni tulkhat zani le sawmkuo sung sawt ding hi.

¹²Ni tulkhat zathum sawmthum le nga sung a thuoh zo kenkonte in thupha a nga ding uhi.

¹³Ahi vangin nang na hi leh na lampi[68] ah pei inlen tawlnga in; hun tawp ni ciengin na thaman sang dingin na tho ding hi,” ei ci hi.