Read Zou DANIEL 2 Bible Online

DANIEL 2 - Zou bible

DANIEL 2

¹Nebuchadnezzar kumpi-a a maan zaw a kum nina kumin Nebuchadnezzar in mang pawlkhat man a, tuate ziehin lunggimin kimu thei lo hi.

²Tuaci’n kumpipa in a mangmatte a gen dingin mitphiel siemte, aisan theite, mibum theite le Chaldea-te hlansah hi. Amate zong tungin kumpipa mai ah a din ciengun,

³kumpipa in amate kungah, “Tam bang mang khat ka man a, tua ka mang a khietna ka thei nuom ziehin ka lung a gim hi,” a ci hi.

⁴Chaldea-te in kumpipa kungah (Aram ham tawh),[2] “Kumpipa aw, dam sawt in! Na nasemte na mang ei gen in, a khietna kang gen ding uhi,” a ci uhi.

⁵Kumpipa in Chaldea-te dawng a, “Tam pen mipi zaha ka thukhensat ahi hi: Mang le a khietna nei gen thei sih uleh na khut na keng uh kisemnen ding a, na innte uh kisusie ding hi.

⁶Hizongle ka mangmat le a khietna nei gen thei uleh keima tung panin letsongte, thamante le patawina lienpi na nga ding uhi. Tua ahi ziehin ka mangmat le a khietna ei gen un,” a ci hi.

⁷Amate in a ni veina dawngkia-in, “Kumpipa in na nasemte kungah na mang ei gen masa phot in, tua ciengin a khietna kang gen thei pan ding uhi,” a ci uhi.

⁸Kumpipa in, “Kiptahin ka khensatsa teng na thei ziehun hun a sawt theithei nadinga hanciem na hi lamtah uh cientahin ka thei hi:

⁹Ka mangmat nei hilcien thei sih uleh note adingin thukhenna khat beh om hi. No teng pen ka lungsim ka khel masangsie keima kungah zuouthu le kam nainiehte gengen dinga kithukimsa na hi uhi. Tua ahi ziehin ka mangmat ei gen phot un, tua hile a khietna nang gen thei ding lam uh ka thei ding hi,” a ci hi.

¹⁰Chaldea-te in kumpipa kungah, “Kumpipa thei nop thu a gen thei ding leitungah koima om sih va! A tahtahin bang za-in thupi-in vanglien tamale koima’ kumpi in mitphiel siemte, aisan theite, le Chaldea-te khat popo kungah tam bang thu dong ngai lo hi.

¹¹Kumpipa thudawh pen hamsa luo a, mihingte tawh a tengton lo pasien-te longal koima in kumpipa kungah tuate pholah thei lo hi,” a ci uhi.

¹²Tami thu ziehin kumpipa lungthah mama a, Babylon gam sunga mipil zosie thalup dingin thu a pie hi.

¹³Mipilte thalup nading thupiehna lai kihawm a, tuale mipilte thalup ding ahi ta hi; tuale amate in Daniel le a guol teng zong thalup dingin a sui uhi.

¹⁴Tua ciengin Daniel in Babylon gama mipilte that dinga a kuon kumpipa’ mithat makaipa Arioch kungah pilvangtah le kidawm tahin a dawngkia hi;

¹⁵ama in kumpi innsung ulien Arioch kungah, “Bang dinga kumpipa’ thupieh hici kinaw sengseng ahei?” ci-in a dong hi. Tua ciengin Arioch in a thu teng Daniel a theisah hi.

¹⁶Tuaci’n Daniel lut a, tua mang a khietna gen ding hun a pieh nadingin kumpipa kungah ngen hi.

¹⁷Tua ciengin Daniel a inn ah pei a, tuale ama in a guolte Hananiah, Mishael, le Azariah-te theisah hi.

¹⁸Ama in tam thuthuh tawh kisai-in Daniel le a guolte Babylon gam sunga mipil dangte tawh a siton lo nadingin vantung Pasien tung panin hepina ngen dingin amate kungah a gen hi.

¹⁹Tua ciengin zanlai a mang sungah tua thuthuh Daniel tungah kilah a, tuale Daniel in vantung Pasien’ min a phat hi.

²⁰Daniel in: “Kumtawnin Pasien’ min phatin om taheh, azieh pen pilna le vanglietna ama-a’ ahi hi.

²¹Ama in hun le khuohunte khel a, kumpite khiesuhin kumpite koi hi; ama in mipilte tungah pilna pie a, theitelna a neite tungah pilna a pie hi.

²²Ama in thuthuhpi le phuolsel nate phuong dawh a, khuomiel sunga omte thei-in ama tawh khuovah a omton hi.

²³Ka pu ka pate’ Pasien aw, nang tungah ka lungdam a, nang kang phat hi. Pilna le vanglietna nei pieh ziehin nang kunga kang nget uh pen kei tungah nei pholah zo hi. Azieh pen kumpipa thupieh kote tungah nei theisah zo hi,” a ci hi.

²⁴Tua ahi ziehin Babylon gamah mipilte that dinga kumpipa in a sesa Arioch kungah Daniel pei a, ama in tuapa kungah, “Babylon mipilte that sin; kumpipa mai-ah ei peipi in, kumpipa mang ka khiehpieh ding hi,” a ci hi.

²⁵Tua ciengin Arioch in kumpipa mai-ah Daniel mallang tahin peipi-in ama kungah tam bangin a gen hi: “Judah salte lah panin kumpipa mang ang khiehpieh thei ding mi khat ka mu hi,” a ci hi.

²⁶Kumpipa in Belteshazzar a kici Daniel kungah, “Ka mangmat le a khietna keima kungah nei gen thei diei mah?” a ci hi.

²⁷Daniel in kumpipa kungah, “Mipil, aisan siem, mitphiel siem ahi sihle bumtawi siemte koima in kumpipa nget thuthuhpi ama tungah pholah thei lo ding hi.

²⁸Hinanle a kisel thusimte a pholah thei vantungah Pasien khat om a, ama in Nebuchadnezzar Kumpipa kungah mailam huna a pieng ding thute a pholah zo hi. Na mang le lupna tunga na lup laitaha na lungsim sungah na mangmute tam teng ahi hi:

²⁹Kumpipa aw, lupna tunga na lup laitahin mailam ang pieng ding thute na ngaisun a, tuale a kisel thusimte a pholah pa in nang tungah ang pieng ding thute ang pholah hi.

³⁰Ahi vangin kei ka hile hinna a nei midangte sanga ka pil zawh zieha tam thusimte kei tunga ei kipholah hi loin, kumpipa in mang a khietna na thei nading le na lungsim sunga na ngaisutnate na thei nadinga ei kipholah hizaw hi.

³¹“Kumpipa aw, nangma in na en leh, ka nu vawi! na mai ah milim golpi khat a om hi. Tam milim gol mama a, a tan dan tuomdang mama hi; na mai ah tua milim ding a, a melpuoh dan zong giinhuoi hi.

³²Tua milim lutang kham citah hi a, a awm le a bante ngun hi-in, a gil le a pheite sumngo ahi a,

³³a kengte sia hi-in, a kephangte a phal sia, a phal tungman ahi hi.

³⁴Na etto laitahin mihing khuta a kisuizol ahi lo suongtum khat in sia le tungman kisawhal tua milim kephang dengmatin a guoicim ta hi.

³⁵Tua ciengin sia, tungman, sumngo, ngun, le khamte a unpi-in guoicim sieng a, khuokhal lai ancilna-a ansi leng tawh kibang hi; tuale a themneng zong a kimu nawn lo nadingin hui in tua teng tawmang sieng hi. Ahi vangin tua milim a dengguoi suongtum pen muol golpi khat suohin leitung bup a dim hi.

³⁶“Na mang tami ahi hi; tu-in a khietna kumpipa kungah kang gen ding uhi.

³⁷Kumpipa aw, nang pen kumpite’ kumpipa na hi a, vantung Pasien in nangma tungah kumpi gam, vanglietna, thahatna, le minthanna ang pie zo a,

³⁸ama in na khut sungah mun cintenga a teng mihingte, gamlaha a om gamsate, vana a leng vate ang pie zo hi; tuale amate tungah a uh dingin nangma ang koi zo ta hi, tua kham lutang khu nangma na hi hi.

³⁹Nangma zaw ciengin nangma sanga a gina lo zaw kumpi gam adang khat ang khang ding a, hinanle a thumna sumngo kumpi gam in leitung buppi uh ding hi.

⁴⁰Tuale sia banga a thahat a lina kumpi gam khat ang khang ding hi; sia in na vannuoi[3] satguoi-in a vatmai bangin tam teng zosie gawi-in a zancimsah ding hi.

⁴¹A kephang le a kemete a phal belkhengpa’ tungman le a phal sia kihal na mu bangin tua kumpi gam kikhenzah ding hi; hizongle tungman le sia a kihal na mu bangin a sungah sia bangin hatna kimkhat om ding hi.

⁴²A kephanga a kemete a phal sia, a phal tungman ahi ma bangin kumpi gam a phal thahatin a phal zawngkhal ding hi.

⁴³Sia le tungman kihal na mu bangin amate khatlekhat kiteng kipi-in[4] a kisawhal ding vua, hinanle sia le tungman a kicimat thei lo bangin amate zong a kigawm thei tuom sih ding uhi.

⁴⁴Tua kumpite khan sungin vantung Pasien in a kisusie ngai nawn lo ding kumpi gam khat phut ding a, tam kumpi gam pen midang khat’ khut sungah kinuasie lo ding hi. Tua in tami kumpi gam teng zosie satguoi-in maimangsah ding a, tua gam a kip tawntung ding hi;

⁴⁵muol tung panin mihing khuta kisui lo suongtum khat ang lengkhie-in sia, sumngo, tungman, ngun, le khamte a satguoina na mu bang lienin a lien Pasien in mailam thu pieng dingte kumpipa kunga ang theisah ahi hi. Na mang pen mangpi ahi a, a khietna zong muontah ahi hi,” a ci hi.

⁴⁶Tua ciengin Kumpi Nebuchadnezzar a mai leilahah kunsuhin Daniel bie a, ama adingin an tawh biehna le gimnamtui biehnate lui dingin thu a pie hi.

⁴⁷Kumpipa in Daniel kungah, “A tahtahin na Pasien pen pasien-te’ Pasien le kumpite’ TOPA ahi a, thusimte a pholah pa zong ahi hi, azieh pen nang in tami thusim na pholah thei ta hi!” a ci hi.

⁴⁸Tua ciengin kumpipa in Daniel tawisangin letsong thupi tampitah pie a, Babylon gam buppi uhsahin, Babylon mipil zosie tungah uhpi pa dingin koi hi.

⁴⁹Daniel in kumpipa kungah ngen a, Babylon gamkhen tenga vaihawm dingin Shadrach, meshach, le Abednego-te koi hi. Ahi vangin kumpipa inn sungah Daniel a om suoh hi.