Read Zou DANIEL 4 Bible Online

DANIEL 4 - Zou bible

DANIEL 4

¹[11] Kumpi Nebuchadnezzar in leitung muncin tenga a teng mi zosie, nam zosie, le ham zosie tungah gen hi: Note in a kiningcing nopsahna thupha nei ta un!

²Sangpen Pa Pasien in kei dinga a bawlsa lim le nalamdangte kang gensawn nuom hi.

³Ama’ limte bangza-in lienin, a na lamdang bawlte bangza-in thahat ahei! A kumpi gam pen kumtawn kumpi gam hi a, a khang khangin ama’ thuneina a om ding hi.

⁴[12] Keima Nebuchadnezzar lungnuomin ka inn ah ka teng a, ka kumpi inn sungah nuomsa-in ka om hi.

⁵Ka mangmat khat in ei zausisah a, ka lupna tunga ka lungsan teng le ka mangmuna teng in ei dipkuosah hi.

⁶Tuaci’n keima in ka mangmat a khietna gen dingin Babylon gam sunga mipil zosie ka mai-ah ang puoh nadingun thu ka pie hi.

⁷Tua ciengin mitphiel siemte, aisan theite, Chaldea-te, le mibum theite ang lut vua, amate kungah ka mangmat ka gen hi. Ahi vangin amate in a khietna ei gen thei lo uhi.

⁸A tawpna ah ka mai-ah Daniel ang pei a, ama pen ka pasien’ min kitapin Belshazzar a kici pa ahi a, a siengtho pasien-te’[13] hlagau khat tawh a kidim hi. Tuale ama kungah ka mangmat ka sut hi:

⁹“Mitphiel dawi siempen Belteshazzar aw, a siengtho pasien-te’[14] hlagau khat tawh na kidim a, nang adingin a hamsa seng thuthuh om lo ci ka thei hi. Ka mangmat za[15] inlen a khietna ei gen in.

¹⁰[16] Ka lupna tunga ka mang mu tami ahi hi; leitung laikimah singkung khat po a, tua singkung sang mama hi.

¹¹Tua singkung khangin gol semsem a, a dawn in van holto hi. Leimong teng panin tua singkung kimu thei hi.

¹²A nate hoi a, a ga zong tamin, mi vannuoi an a sih hi. Gamlahah gamsate in a hlim a bel vua, vana a leng vate in a ba tung lahah bu bawlin hinna nei zosie tua tawh a kivah uhi.

¹³A banah ka enkia leh lupna tunga ka lup laitahin ka mangmuna sungah vantung panin a cing misiengtho khat ang kumsuh ka mu hi.

¹⁴Awng vapuohin ama in tam bangin a gen hi: ‘Tua singkung phua-in a ba teng tansan unlen, a na teng heu siengin a ga teng zong thezah un. A hlim bel ganhingte le a ba tunga a tuong vate heudawh un.

¹⁵Ahi vangin a bul le a zungte lei sungah omsah unlen, gamlah lopate lahah sumngo le siakhau-in hen un. Van daituite in tapnom hinlen, ama’ tanh ding pen gamsate-a’ tawh kibang taheh.

¹⁶A lungsim, mihing lungsim panin kikhel hinlen ganhing lungsim puo taheh. A za sagi-in ama tungah tung taheh.

¹⁷Sangpen Pa in mihingte’ kumpi gamah thu nei pen hi, ci thu hinna nei zosie in a thei nadingin, thukhenna pen a cingte khensatna bangin kisem a, thukhenna pen mi siengthote’ thupiehna tawh kisem ahi hi; ama in a pieh nuomte tungah kumpi gam pie a, mi tuolniem pente tungah kumpi gam a pie hi,’ a ci hi.

¹⁸Keima Kumpi Nebuchadnezzar’ mang mat tami ahi hi. Belteshazzar aw, ka kumpi gam sunga om mipil zosie in a khietna ei gen thei lo ziehun nangma in tu-in a khietna ei gen in. Hizongle nang a siengtho pasien-te’[17] hlagau tawh na kidim ziehin a khietna nei gen thei ding hi,” a ci hi.

¹⁹Tua ciengin Belteshazzar min nei Daniel bakhat sung nahpitahin a lung a kham hi. A ngaisutnate in ama a patausah hi. Kumpipa in, “Belteshazzar aw, na mangmat le a khietna ziehin kizausah laizang sin,” a ci hi. Belteshazzar in, “Ka pu aw, na mangmat pen nangma ang mudate-a’ hizaw hinlen, a khietna zong na galte-a’ hizaw taheh!

²⁰Na singkung mu pen ang khang a, ang golin van ang holto a, leimong dongin kimu thei hi.

²¹A nate hoi-in a ga zong tamin mi zosie an a sih hi. Tuale gamsate in a hlim a bel vua, a bate tungah vana vate in bu a bawl uhi.

²²Kumpipa aw, tua khu nangma na hi hi! Nang na khanglien a, na thahat hi. Na vanglietna khang semsemin van na holto a, na thuneina in leimong dong a huop hi.

²³Tuale kumpipa in na et laitahin vantung panin a cing mi siengtho khat na mu a, ‘Tua singkung phuadawh unlen susie un, ahi vangin a bul le a zungte lei sungah omsah unlen, gamlah lohingte lahah siakhau le sumngo-in henin vantung daitui in ama a tehlopsah a, tuaci’n ama tungah a za sagivei a tun dongin gamsate tawh tengtonsah un,’

²⁴a ci pen kumpipa aw, a khietna tam bang ahi a, Sangpen Pa in ka pu kumpipa tunga ang tunsah a thukhenna ahi hi:

²⁵Mihingte lah panin ang kinotmang ding a, gamsate tawh na tengton ding hi. Bawngtang bangin lopa ang kinesah ding a, vantung daitui in hing tehlopsahin Sangpen Pa in mihingte’ kumpi gam sungah thunei penin pang a, kumpi gam a pieh nuomte tungah a pie hi, ci na thei masangsie na tungah sagivei a tung ding hi.

²⁶Singbul le a zungte lei sunga nuasie ding thu a kipieh bangin Vantung in thunei hi, ci na thei huna kipanin nang adingin na kumpi gam ang kiphupieh kia ding hi.

²⁷Tua ahi ziehin kumpipa aw, nang tunga kang thuhilna ei sanpieh in: Na mawnate adingin dihna tawh mawsut[18] inlen, na nopsahna sawtvei na khom nadingin a kibawlsie mite tungah hepina tawh na khielnate sut in. Tua hile na nopsahna sawtvei na khom ding hi,” a ci hi.

²⁸Kumpi Nebuchadnezzar tungah tam zosie a tung hi.

²⁹Hla sawm le hla ni zaw ciengin Babylon kumpi innkhum zangah ama vah kawikawi a,

³⁰tuale kumpipa in, “Tami a thupi Babylon, kumpi khuopi ding le keima’ minthan thupi nadinga a thahat ka vanglietna tawh ka lamsa hi lo amah?” a ci hi.

³¹Kumpipa’ kam sungah tua kammalte a pusuo laitahin vantung panin aw khat ang ging hi: “Kumpi Nebuchadnezzar aw, nang dinga tami thu ang kigen ahi hi: Nang tung panin kumpi gam a peikhie zo hi!

³²Mihingte lah panin ang kinotmang ding a, gamlahah gamsate tawh na tengton ding hi. Bawngtang bangin lopa ang kinesah ding a, Sangpen Pa in mihingte’ kumpi gamah thunei penin pangin tua kumpi gam a pieh nuomte tungah a pie hi, ci na thei masangsie nang tungah sagivei ang tung ding hi,” a ci hi.

³³Nebuchadnezzar tungah thakhatin thukhenna a tangtung pai hi. Mihingte lah panin ama kinotmangin bawngtang bangin lopa ne a, a samte muvanlai’ multe bang le a cinte va kecin banga a sau dongin van daitui in a citung teng a tehlopsah hi.

³⁴Khum hun ang tawp ciengin keima Nebuchadnezzar in van lam ka ento leh khuo ka phawhkia hi. Sangpen Pa ka phat a, a hing zing pa phatin ka patawi hi. Azieh pen a thuneina in kumtawn thuneina hi a, ama’ kumpi gam zong a khangkhangin a om hi.

³⁵Leitunga teng mi zosie bangma-in kisim lo a, ama in vantung nate le leitunga teng mite tungah a dei bangin na sem hi. Koima in ama’ khut tu zo lo a, ama kungah koima in “Bang bawl na hei?” ci lo hi.

³⁶Khum hunin keima in khuo ka phawhkia hi; tuale ka kumpi gam minthan nadingin ka vanglietna le ka thupina keima tungah ei kipiekia hi. Ka thu kuppite le ka uliente in keima ei sui vua, ka kumpi gam sungah kumpi-in ei kikoi kia-in ka tungah vanglietna a golzaw ei kipiehbe lai hi.

³⁷Tu-in keima Nebuchadnezzar in vantung Kumpipa phatin tawisangin zatahna ka pie hi. Azieh pen a nasep zosie thuman ahi a, a lampi zosie thutang ahi hi; ama in kilietsahna tawh a gamta mite a niemkhieh thei hi.