Read Zou DANIEL 5 Bible Online

DANIEL 5 - Zou bible

DANIEL 5

¹Kumpi Belshazzar in a ulien tulkhat adingin pawi lienpi khat bawl a, mi tulkhat mai-ah zu a dawn hi.

²Belshazzar in a zu lungnop kawmin kumpipa le a uliente, a zite le a meite zu dawn nadingin amate in Jerusalem biehinnpi pana a pa Nebuchadnezzar in a na lah kham hai le ngun haite a lah nadingun thu a pie hi.

³Tuaci’n amate in Jerusalem Pasien’ biehinnpi pana a kila kham hai le ngun[19] haite peipi-in kumpipa le a uliente, a zite le a meite in tuate tawh zu a dawn uhi.

⁴Amate in zu dawnin ngun le kham, sumngo, sia, sing le suong pasien-te’ min a phat uhi.

⁵Thakhatin mihing’ khut khat kilang a, meivah tunna gei, za a kizut kumpi inn kawm tungah lai giel ang kipan pai hi. Tua khut in lai a giel laitahin kumpipa in a en khinkhian hi.

⁶Tua ciengin kumpipa mai daang gawpin a ngaisutna in ama zausisah a, a khut a kengte zawmangin a khup tegel a tun dildel hi.

⁷Kumpipa in aisan theite, Chaldea-te, le bumtawite va hlan ta un, ci-in kiko hi; tuale Kumpipa in Babylon mipilte kungah, “Tami lai kigiel sim thei-in a khietna ei gen thei tapo puon sandup kisilsah ding a, a ngawngah kham khi ki-awsahin kumpi gam sungah a zalien a thumna-in kikoi ding hi,” a ci hi.

⁸Tua ciengin kumpipa’ mipil zosie a lut vua, ahi vangin amate in tua lai kigiel sim thei loin, kumpipa kungah a khietna zong a gen thei sih uhi.

⁹Tua bepin Kumpi Belshazzar nahpi-in zausi-in a mai kangdang a, a uliente a lung uh a buoi hi.

¹⁰Kumpinu in kumpipa le a uliente thu kikup a zah ciengin pawi khaamna inn sungah a lut hi. Kumpinu in, “Kumpipa aw, na khan sawt taheh! Na ngaisutna ziehin kizausisah sinlen, na mai dangsah sin.

¹¹Na kumpi gam sungah a siengtho pasien-te’[20] hlagau a nei mi khat a om hi. Na pa hun lai-in tua mipa in pasien-te’ pilna tawh a kibang thuthuh theina, thu theitelna le pilna a nei hi. Na pa Kumpi Nebuchadnezzar in mitphiel siemte, aisan theite, Chaldea-te, le mibum theite’[21] uhpi-in ama na koi ngai hi.

¹²Azieh pen kumpipa in a min Belshazzar a phuopieh Daniel sungah mang khieh theina, thu hahsate dawn theina, le thubuoite vensah theina ahi koima in a bat zawh lo pilna, theina, thu theitelnate kimu hi. Tu-in Daniel hlansah in, tua hile ama in a khietna ang gen thei ding hi,” a ci hi.

¹³Tua ciengin kumpipa mai-ah Daniel kipeipi hi. Kumpipa in Daniel kungah, “Nang pen Daniel a kici pa, Judah gam sung pana ka pa kumpipa in ang mat Judah mite lahah sila khat hi lo na mah?

¹⁴Nang sungah pasien-te’[22] hlagau a op lam ka na za zo a, thuthuh theina, thu theitelna, le koima in a bat zawh lo pilna na sungah a op lam kimu hi.

¹⁵Tu-in tam lai kigiel a sim ding le a khietna ei gen dingin mipilte, aisan theite ka mai-ah ang kipeipi zo ta a, ahi vangin amate in tua thu a khietna a gen thei sih uhi.

¹⁶Ahi vangin nangma in a khietna na gen thei a, thubuoite zong na vengsah thei hi, ci-in ka na za zo hi. Tu-in tua lai kigiel na sim thei a, a khietna nei gen thei leh, puon sandup ang kisilsahin na ngawngah kham khi ang ki-awsah ding a, kumpi gam sungah a za lien a thumna-in ang kikoi ding hi,” a ci hi.

¹⁷Tua ciengin Daniel in kumpipa mai-ah dawng a, “Na letsongte nangma adingin koi in. Ahi sihle na nuommante midang khat pie in! Hizongle kumpipa adingin tua lai kigiel kang simpieh ding a, a khietna kang theisah ding hi.

¹⁸Kumpipa aw, Sangpen Pa Pasien in kumpi-in na pa Nebuchadnezzar koi a, zalietna, vang le thupina a pie hi.

¹⁹Tuale ama tunga a pieh zalietna ziehin ama mai-ah mi zosie, minam zosie, le ham zosie citun uhi. Ama in a tha nuomte thatin a hinkhawi nuomte hinkhawi a, a patawi nuomte patawi-in, a daisah nuomte daisah hi.

²⁰Ahi vangin a lungsim kisangsahin kisathei tahin a gamtat nadingin a lung a khau ciengin a kumpi topha panin kiladawh a, ama kung panin a vang kihawhmang hi.

²¹Mihingte lah panin kinotmang a, a lungsim zong ganhing lungsim nei dingin kibawl hi. Gam sakolte tawh tengtonin bawngtang bangin lopa kinesah a, Sangpen Pa Pasien in mihingte’ kumpi gamah thunei a, kumpi gam a pieh nuom pa tungah pie hi, ci thu a thei masangsie van daitui in a pumpi tehlopsah den hi.

²²Tuale a tapa nang Belshazzar in tam thu zosie na thei sieng vangin na lungsim na niemkhieh tuom sih hi.

²³Nang in Vantung’ TOPA na do a, nang le nang na kitawisang hi! Ama’ biehinn sunga haite nangma kungah ang kitawi zo a, nang le na uliente, na zite le na meite un tuate tawh zu dawn zo ta uhi. Khuo a mu lo, khuo a za lo, a theithei lo, ngun le kham, sumngo, sia, sing le suong pasien-te’ min na phat uhi; ahi vangin a vanglietna sungah na hinna hu uh omin na gamtatna zosie uh ang saipieh Pasien na zatah sih uhi.

²⁴“Tuaci’n a opna panin tua khut ang kisawlin tam lai ang kigielsah ahi hi.

²⁵A kigiel lai tam bang ahi hi: MENE, MENE, TEKEL, le PARSIN.

²⁶Tua thu a khietna tam bang ahi hi: MENE, Pasien in na kumpi gam vaihawmna hunte[23] sim zo a, tawpsah zo hi.

²⁷TEKEL, nang ang kitawikhai zo a, na leh zo sih hi.

²⁸PERES,[24] na kumpi gam kikhen khamin Media le Persia-te kipie zo hi,” a ci hi.

²⁹Tua ciengin Daniel puon dupsan silsah dingin Belshazzar in thu pie a, a ngawngah kham khi awsahin a kumpi gam sungah a za lien a thumna dingin tangtawhna kinei hi.

³⁰Khum zan mama-in Chaldea-te’ kumpipa Belshazzar kithat pai hi.

³¹[25] Kum sawmguh le kum ni a phah kumin Mede mi Darius in kumpi gam nga hi.