Read Zou DANIEL 6 Bible Online

DANIEL 6 - Zou bible

DANIEL 6

¹Darius in kumpi gam buppi vai sai dingin gamkhen uhpi za le sawmni koi dingin pha a sa a,

²tuale amate tungah vaisaipi mi thum koi-in, tuate lahah Daniel zong khatin kihal hi; kumpipa in sup le bai a tuo lo nadingin tua gamkhen uhpite in tam teng tungah thu a puoh uhi.

³Daniel in koima’ bat zawh lo pilna a nei ziehin adang vaisaipite le gamkhen uhpite lahah kituom khai a, kumpipa in gam buppi vaihawm dingin koi sawm hi.

⁴Tuaci’n vaisaipite le gamkhen uhte in kumpi gam tawh kisai-in Daniel tungah mawmat nading hamlap a tangsui uhi. Ahi vangin ama thumanin a thoptat sih a, ama tungah sietna a kimu zo lo ziehin amate in mawmat nading hamlap ahi a, sietna ahi zongin a muzo sih uhi.

⁵Tua mite in, “A Pasien’ thukham tawh kisai-in i mu lo buong uleh tami Daniel tungah i mawmat nading uh hamlap dang i mu zo sih ding uhi,” a kici uhi.

⁶Tuaci’n vaisaipite le gamkhen uhpite kidap kupin kumpipa kungah a pei vua, “Kumpipa Darius aw, na khan sau taheh!

⁷Kumpipa aw, ni sawmthum sung nangma kung simlo mi khatpo kung ahi sihle pasien khatpo kunga thungen poma humpi kuo sungah kikhie ding hi, ci-in thupiehna lai le khamna lai khat bawl lacin hoi ding hi, ci-in kumpi gam sunga vaisaipite, gamkaih uhpi hute, gamkaih uhpite, thu kuppite, le mangpite zosie ka kithukim uhi.

⁸Kumpipa aw, tu-in Medes-te le Persia-te upadi a kikhel lo bangin a kikhel lo nadingin tua lai tungah na suoi kai in,” a ci uhi.

⁹Tua ahi ziehin Kumpi Darius in thupiehna lai le khamna lai tungah suoi a kai hi.

¹⁰Daniel in tua thupiehna lai suoi kikai zo ci a thei vangin Jerusalem lam nga-in tawlet honsa-a om a inndan tungnungah pei-in nidanga a bawl ngai bangin ni khatin thumvei khupdinin a Pasien tungah thu ngenin ama a phat hi.

¹¹A sawmdapte a pei ule Pasien mai-ah Daniel in hepina a nget laitah a tuoh uhi.

¹²Tua ciengin amate in kumpipa kung a neh vua, tuale thupiehna lai tawh kisai-in, “Kumpipa aw! Ni sawmthum sungin nang kung longal pasien ahi sihle mihing tunga thu ngen poma humpi kuo sungah kikhie ding hi, ci-in thupiehna lai tungah suoi kai zo hi lo na mah?” a ci uhi. Kumpipa in, “ Medes-te le Persia-te upadi a kiphel thei lo ma bangin tam thu pen thukip ahi hi,” ci-in a dawng hi.

¹³Tua ciengin amate in kumpipa a dawngkia vua, “Kumpipa aw, Judah gam panin na salte lahah khat ahi Daniel in nang le na suoikaina khamna lai a thuse sih a, tuale mahin ni khatin thumvei thu a ngen zawsop hi,” a ci uhi.

¹⁴Kumpipa in tua mawsahna thu a zah ciengin lung gim mama hi. Ama in Daniel hunkhie nuom a, ni tum dongin ama a hutkhiet nading hanciem thei tawpin a sem hi.

¹⁵Tua ciengin kumpipa kungah a sawmdapte pei-in ama kungah, “Kumpipa aw, thei in. Medes le Persia-te’ upadi banga kumpipa in a bawlsa khamna lai ahi sihle thupiehna lai pen kikhel thei lo hi,” a ci uhi.

¹⁶Tua ciengin kumpipa in thu pie-in Daniel a zawpi vua, humpi kuo sungah a khiesuh uhi. Kumpipa in Daniel kungah, “Thuman taha a na naseppieh na Pasien in hing hunkhie taheh,” a ci hi.

¹⁷Suongtum khat kila-in humpi kuo vangah kikoi a, tuale Daniel tawh kisai-in thu a kikhel khah nawn lo nadingin kumpipa in ama’ seal tupna khutsip le a uliente’ seal tupna khutsip tawh a ciemte hi.

¹⁸Tua ciengin a kumpi inn sungah kumpipa pei-in ama in zan tawntungin an a ngawl hi; ama kungah bangma an kipuoh lo a, zong kimu thei lo hi.

¹⁹Khuo a vah lien tahin kumpipa tho-in humpi kuo lamah mallangin a pei hi.

²⁰Daniel opna humpi kuo gei a tun ciengin Daniel kungah patau tahin kiko a, “Daniel aw, a hing zing Pasien’ nasempa, thuman taha a na nasep pieh na Pasien in humpi panin ang hunkhie zo ei mah?” a ci hi.

²¹Tua ciengin Daniel in kumpipa kungah, “Kumpipa aw, na khan sau taheh!

²²Ama mai-ah kei nuol baang loin ei kimu ziehin keima ei liemsah lo nadingun ka Pasien in a vantung mite sawlin humpite’ kam a humpieh hi; tuale kumpipa aw, keima in na mai-ah zong bangma khielna ka bawl sih hi,” a ci hi.

²³Tua bepin nahpitahin kumpipa lungdam a, humpi kuo sung panin Daniel a lahdawh nadingun thu a pie hi. Tuaci’n humpi kuo sung panin Daniel kiladawh a, ama in a Pasien a muon ziehin a ci tungah liemma khat beh kimu lo hi.

²⁴Daniel a leheh teng- amate, a tate ule a zite utawh- kizawpi-in humpi kuo sunga khieh dingin kumpipa in thu a pie hi. Humpi kuo tawdop a tun masangun humpite in amate na zothaw-in a gu a tangin a tepguoi uhi.

²⁵Tua ciengin Kumpi Darius in leitung muncin tenga a om mi zosie, nam zosie le ham zosiete tungah tam bangin lai a hlah hi: “Note in a kicing nopsahna thupha nga ta un!

²⁶Keima in thupieh khat ka bawl a, ka uhna kumpi gam sunga om mi zosie in Daniel’ Pasien mai-ah zatahin citun ding uhi: Azieh pen ama a hing zing Pasien hi a, kumtawnin ama a om zing hi. A kumpi gam kisusie ngai lo ding a, a vaihawmna tawp ngai lo ding hi.

²⁷Ama in suotasahin hunkhie a, ama in vantung le leitungah lim le nalamdangte a bawl hi; azieh pen humpi thahatna panin Daniel a hunkhie zo hi,” a ci hi.

²⁸Tuaci’n tami Daniel pen Darius uh sung le Persia mi Cyrus uh sungin a daupei mama hi.