Read Zou DANIEL 7 Bible Online

DANIEL 7 - Zou bible

DANIEL 7

¹Belshazzar, Babylon kumpi a suo zaw a kum masa kumin Daniel in mang khat man a, a lupna tungah a lup laitahin a lungsim sungah mangmunate nei hi. Tua ciengin ama in lai tawh a mangmat tam bangin giel hi:[26]

²Keima[27] Daniel in zan lai-in ka mangmuna sungah tuipi lien a lawhling van ning lite ka mu a,

³tuipi panin gamsa gol li ang pusuohto a, tuate khatlekhat kibang lo hi.

⁴Amasa pen humpi tawh kibangin muvanlai hla nei hi. Tua ciengin keima in ka et laitahin a hlate kibotin lei lah panin kidomsang a, mihing bangin a keng tegel tawh kidingsahin ama tungah mihing lungsim kiguon hi.

⁵A nina gamsa adang khat ang kilang a tua pen vompi tawh kibang hi. A pang lang khatin dingto-in a kam sunga a hate kikalah a hapate[28] thum om a, “Tho inlen luong tampi ne in!” kici hi.

⁶Tami zaw ciengin keima in ka en leh gamsa adang khat ang kilangkia a, tua pen lutnu tawh kibang hi. Tua gamsa in a elzangah va hla li nei a, lutang li nei hi; tuale ama tungah uhna aana kipie hi.

⁷Tami zaw ciengin zanlai ka mangmuna ah a giinhuoi, a cimulthaw huoi, le a thahat mama a lina gamsa khat ka mu hi. Tua in siaha gol khat nei a, ama in nawmvalin ehmal a, a omlai teng a keng tawh tuoncil hi. Ama pen a masanga gamsate tawh kibang loin ki sawm nei hi.

⁸Keima in tua a kite ka ngaisut laitahin tuate lah panin adang a ki neu khat ang po a, tuami op nadingin a masanga a ki thumte a zung panin kibotkhie hi. Tami a ki tungah mihing mittang tawh a kibang mittangte om a, kiliensah tahin a ham hi.

⁹Ka et laitahin kumpi tophate kipha a, a kumpi topha tungah Khanglui Mipa[29] a to hi. A puonsil vua bangin ngo a, a luzanga a samte zong tuumul bangin a siengtho hi; a kumpi topha mei-am hi a, a topha lengkangte meikuong ahi hi.

¹⁰Meikuong lomkhat a pusuoh a, a mai panin tui luonin a luong hi. Mi tul za tampi in ama’ na a sem vua, ama a khoi dingin tul za sawm tampi a ding uhi. Thukhen dingin zumah kito a, laibute kiphen hi.

¹¹Tuami ki in kiphatsahna kam a ham ziehin ka en khinkhian hi. Tuale keima in ka et laitahin tua gamsa kithatin a pumpi kisusie a, mei tawh hal dingin kipie hi.

¹²A omlai gamsate pen amau’ uhna aana kilahpieh a, ahi vangin a nuntahna uh a kiciengtan hun khat sung kikhanpieh hi.

¹³Keima in zan ka mangmuna-ah ka en a, mihing[30] tawh a kibang khat vana meii tung tuongin ang pei ka mu hi. Khanglui Mipa[31] kungah ama pei a, ama mai-ah kizawpi hi.

¹⁴Ama tungah uhna aana, vang le kumpi za kipie a, mi zosie, nam zosie, le ham zosie in a na sem ding uhi. Ama’ uhna aana pen kumtawn uhna aana hi a, tua uhna tawp ngai loin a kumpi gam zong kisusie ngai lo ding hi.

¹⁵Keima Daniel ka hile ka sung tawngah[32] ka buoi mama a, ka mangmunate in ka lungsim ei patausah hi.

¹⁶Tami thu zosie tawh kisai-in thuman dong dingin a cingte lahah khat ka va nai ta hi. Tuaci’n ama in tua thu a khietna kang hil ding hi, ei ci hi:

¹⁷“Tami gamsa lite pen kumpi gam li ahi a, leitung panin kumpi li ang khang ding hi.

¹⁸Hizongle Sangpen Pa’ misiengte in kumpi gam a tang ding vua, tua kumpi gam kumtawnin a nei zing ding uhi,” ei ci hi.

¹⁹Tua ciengin keima in a omlai teng zosie tawh a kilamdang, nahpi taha a giinhuoi, siaha le sumngo kecin a nei, ehmalin a nawmval, a omlai teng a keng tawh a tuoncil gamsa lina tungtang thu,

²⁰le a lutunga po a ki sawmte le, tuate lahah thum kiladawhin mittangte nei-in kiliensah tahin a kam pau, tua adangte sanga a goltuohzaw, tua adang ang poto ki tungtang thu ka thei nuom hi.

²¹Keima in ka et laitahin tami ki in misiengte tawh gal kido a, tua

²²Khanglui Mipa[33] ang pei masangin amate a zo gawp hi; tua ciengin Sangpen Pa’ misiengte tungah thukhen theina kipie a, misiengte in kumpi gam a nga nading uh hun a tung hi.

²³Ama gen khu tami ahi hi: “Gamsa lina pen, leitunga ang pieng ding kumpi gam lina hi a, kumpi gamdang zosie tawh kibang lo ding hi. Tua in leitung buppi valtum ding a, tuoncilin ehmal ding hi.

²⁴Ki sawmte tawh kisai pen, tam kumpi gam sung panin kumpi sawm ang khang ding a, amate nua-ah adang khat ang khangkhie ding hi. Tam pen a omsate tawh kibang loin kumpi thumte a nuoinet ding hi.

²⁵Ama in Sangpen Pa langpanna kam pau-in, Sangpen Pa’ misiengte genthei bawl ding a, a siengtho pawibawl hunte le thukhamte khel ding hanciemin, ama’ khut sungah hun khat, hun ni,[34] le hun lang sung amate a om ding uhi.

²⁶Tua ciengin thukhenin kito ding a, ama’ uhna aana kilah piehin kisumaimang ding hi.

²⁷Kumpi za, uhna aana, le vansin nei buppi sunga Sangpen Pa’ misiengte tungah a kumpi gam thupina teng kipie ding hi. Amau’ kumpi gam pen kumtawn kumpi gam hi ding a, vaihawm zosie in amau’ na semin a thu mang ding uhi,” ei ci hi.

²⁸Tam sungah tangthu a kihiel ahi ta hi. Keima Daniel ka hile ka lungsim ngaisutna in ei zausahin ka mai a engdang vawt hi; ahi vangin tami thu ka lungsim sungah ka koi khinkhian hi.