Read Zou DANIEL 8 Bible Online

DANIEL 8 - Zou bible

DANIEL 8

¹Keima kungah mangmuna khat ang kilah masah zaw, Belshazzar kumpi suo a kum thumna kumin keima Daniel kungah mangmuna khat ang kilang hi.

²Keima in tua mangmuna sungah ka et laitahin Elam[35] gamkhen Susa khuopi sunga a omin kei le kei ka kimu a, Ulai[36] gun[37] gei-ah ka ding hi.

³Ka dahto leh gun[38] gei-a a ding tuutang khat ka mu hi. Ama in ki ni nei hi. A ki tegel sau tuoh a, ahi vangin khat pen adang khat sangin sauzaw hi. Tua a sauzaw pen a po nukhia zaw ahi hi.

⁴Tua tuutang in a ki tawh nitumna lam, sahlam, le hlanglam a suh kawikawi ka mu hi. Gamsa zosie in ama nangzo loin ama’ thahatna panin koima in hunkhie zo lo hi; ama’ dei bangin gamta-in a thahat semsem hi.

⁵Keima in ka et laitahin nitumna lam panin keeltang khat ang kilang a, lei tuon loin leitung buppi a kansan hi. Tua keel in a mit tegel kikalah ki[39] khat nei hi.

⁶Ki ni a nei gun[40] gei-a ding ka musa tuutang kung zuonin a thanei za tawh ama a tai hi.

⁷Tua keeltang in tuutang lam a nai ka mu hi. A lungthah sengin tua tuutang a ki tawh su a, a ki ni a tawngsan hi. Tuutang in ama a nan zawh nading hatna nei lo hi; ama in tua tuutang tuolsena-in nei-in tuoncil a, ama’ hatna panin tuutang a hunkhie zo koima om lo hi.

⁸Tua ciengin tua keeltang nahpi tahin ang vanglien hi; ahi vangin a thahat pen laitahin a ki golpi tawngsan a, khum munah leimong li lam kinga-in a lamdang ki li a momkia hi.

⁹Tuate lahah khat tungah a neu ki adang khat[41] mom a, leitaw lam, nisuona lam, gam hoi lam nga-in nahpi tahin vanglien hi.

¹⁰Vantung galkap honte bangin a thahatna khangto a, ama in vantung galkap honkhat le aasi honkhat leitungah khiesuhin a tuoncil hi.

¹¹Ama kiliensahin van galkap lamkaipa nangawn a do hi; ama in a kibawl zing meihal biehna lahpiehin ama’ mun siengtho zong a lemangpieh hi.

¹²Gitlona ziehin tuami ki tungah nisim meihal biehna[42] le galkap honpite kipie a, tua ki in tualah thuman a paisuh hi.

¹³Tua ciengin a siengtho pa khat thugen ka za a, adang a siengthopa khat in tua thugenpa kungah, “Nisima meihal biehna, nate a hawmmangsah suhkhielna, le mun siengtho le vantung galkapte totcil dinga a kipieh nading tawh kisai tami mangmuna bang tanvei sawt ding ahei” a kici uhi.[43]

¹⁴Ama in[44] dawng a, “Zingmawng le nitah tulni le zathum sawt ding hi; tua ciengin ama mun ngai ma ah mun siengtho kikoikia ding hi,” a ci hi.

¹⁵Keima Daniel in mangmuna ka mu zaw ciengin tuami khietna ka thei nadingin ka hanciem hi. Tua ciengin mihing melpuo khat ka mai-ah ang ding a,

¹⁶tuale Ulai panin mihing’ aw khat ka za a, “Gabriel aw, tam mipa mangmuna theisah in,” ci-in hlan hi.

¹⁷Tuaci’n ama in ka dinna gei ang nai a, ang tun ciengin ka zau seng ziehin ka bawhsuh hi. Ahi vangin ama in keima kungah, “Mihing aw,[45] mangmuna pen hun tawp cieng ading ahi lam thei in,” ei ci hi.

¹⁸Ama in keima ei hopi laitahin khuophawh nawn loin tuolah ka pua hi; tua bepin ama in kei ei thamin ka kengin ei dingsah hi.

¹⁹Ama in, “Ngai vawi, lungthah hun tawp cienga ang pieng ding thute ang gen ding ka hi hi; azieh pen tua khu a kisesa hun tawpna ding genna ahi hi.

²⁰Ki ni a nei tuutang na mu pen Media le Persia kumpite a cina ahi hi.

²¹Keeltang[46] pen Greek kumpipa hi a, a mit tegel kikala a po a ki gol pen khu kumpi masapen ahi hi.

²²A ki a tawngsan, tua munah adang ki li a pote ahi uleh, ama’[47] gam sung panin kumpi gam li khang ding cina hi a, ahi vangin kumpi gam masa pen bangin hat zo lo ding hi.

²³Amau’ uhna tawpin, khielnate ang bukim ciengin, zuouphuo siem le hansan mel a puo kumpi khat ang khang ding hi.

²⁴Ama thahatin ang vanglien[48] ding a, ama in a zauhuoi sietna piengsahin, a sepna-ah lawcing ding hi. Ama in mi thahatte le misiengte a susie ding hi.

²⁵A khelpilna tawh a khut in zuou bawlin cithei ding a, a lungsim zong kiliensah ding hi. Hilkhol loin mi tampi thatin, kumpite’ Kumpipa nangawn langpan ding a, hizongle mihing khut tawh hi loin ama kisusie ding hi.

²⁶Zingmawng le nitaha mangmuna kigen pen a man ahi hi. Nang na hileh tua mangmuna imcip phot in, azieh pen tua khu tu-a kipanin ang tung ding hun sawtpi ading ahi hi,” ei ci hi.

²⁷Tuaci’n keima Daniel, thazaw gawpin ni phabep khat sung ka ci a na hi; tua ciengin ka tho a, kumpipa nasep sem dingin ka kuon hi. Ahi vangin ka mangmuna in ei zauthawngsah a, tua khu ka theitel zo sih hi.