Read Zou DANIEL 9 Bible Online

DANIEL 9 - Zou bible

DANIEL 9

¹Mede minam Ahasuerus’ tapa Darius in Chaldea-te gam sunga kumpi a suo masah kum,

²a kumpi sep a masa pen kumin keima Daniel in a kum phaza ding Lai Siengtho sungah TOPA in kamsang Jeremiah kunga a na gen dung zui-in Jerusalem a kisuhsiet hun ang tung valon ding a, tua khu kum sawm sagi sung hi ding hi, ci-in ka cien thei hi.

³Tua ciengin ka thungetna le ka thumna ei dawn nadingin keima in an ngawlin la-ip puon silin vut ka kibuoh a, TOPA lam ka kinga hi.

⁴Ka TOPA Pasien kungah thungenin mawna ka pulah a, “A lien le a giinhuoi Pasien, nang ang it mite le na thupieh a zui mite tungah thuciemna pel loin itna kip a nei TOPA aw,

⁵kote maw-in khielna ka bawl vua, gitlo gamtatin kang ledo vade vua, na thupiehte le na ngaina kipte panin ka kihei zel uhi.

⁶Ka kumpite uh, ka vaihawmte uh, ka pu ka pate ule gam sunga mi zosie kungah na min tawh thugen na nasem kamsangte’ thu ka ngai sih uhi.

⁷“TOPA aw, nang lamah dihna om a, ahi vangin nangma tungah amate a thuman lo ziehun gam zosie-ah na nawmangsa Judah mite, Jerusalem-a tengte, a nai a gamla-a om Israel-te zosie ahi kote tungah tuni-a bangin maizumna ang tung hi.

⁸TOPA aw, nangma tunga kang khiel ziehun ka kumpite uh, ka vaihawmte uh, ka pu ka pate ule koma tungah maizumna ang tung hi.

⁹TOPA ka Pasien uh kungah hepina le mawmaisahna a om hi, azieh pen kote in ama ka ledo vua,

¹⁰tuale a nasem kamsangte tungtawnin ka mai vua a koi a thukhamte zui loin TOPA ka Pasien uh thugen ka mang sih uhi.

¹¹“Israel zosie in na thukham palsatin a kilehei vua, na aw zong a ngai sih uhi. Tuaci’n nangma tungah ka maw zo tah ziehun Pasien’ nasem Moses thukham sunga a kigiel samsietna le awsiete kote tungah ang kibuosuh hi.

¹²Ama in kote langkhat le ka vaihawmte langkhatah a gensa thute kipsah a, kote tungah tuosietna lienpi tungsah zo a, tua Jerusalem-a a tunsah gimna bang pen vansin nei buppi-ah khatvei beh zong tung ngai nai lo hi.

¹³Moses’ thukham sunga a kigiel bang lienin tam tuosietna teng zosie kote tungah ang tungzo ta hi. Kote in ka khielnate uh taisanin, ama’[49] thumanna ka lungngai thei nadingun TOPA ka Pasien uh kungah hepina ka ngen sih uhi.

¹⁴Tuaci’n TOPA in kote tunga a tunsah masangsie tam tuosietna a koicing hi. TOPA i Pasien uh pen a sepna zosie-ah a dih tahtah ahi hi; bangzieh ahei cile kote in ama thu ka mang sih uhi.

¹⁵“Khut thahat khat tawh Egypt panin na mite peipi-in tuni cieng dong nangawnin na min a thangsah kote’ TOPA Pasien aw, tu-in kote ka maw vua, ka gitlo gamtat ta uhi.

¹⁶TOPA aw, thudih tawh na gamtatna zosie ziehin na muol siengtho, na khuopi Jerusalem panin na lungthahna le na thangpaina heimang dawh ta’n; ka mawna ule ka pu ka pate uh’ khielna ziehin ka veng ka pam zosie lahah Jerusalem le na mite mi simmaw-in ka om ta uhi.

¹⁷Tua ahi ziehin TOPA [50]aw, na nasempa thungetna le thumna ei ngai inlen, tu-in nangma adinga kinuasiesa na mun siengtho tungah na mai hing tangsah in.

¹⁸Ka TOPA Pasien aw, na bil ei ngat inlen ei za in. Na mit hahsah inlen kote le nangma’ min a puo khuopi sietna en in. Ka dihna uh zieh hi loin, na khuotuona lienpi ziehin na mai-ah thumna ang nei ka hizaw uhi.

¹⁹TOPA aw, ei za in; TOPA aw, ei maisah in; TOPA aw, ei ngai-in ei bawlpieh inlen kiheh ta sin! Azieh pen na khuopi le na mite nangma’ min puo ahi uhi, ka TOPA Pasien aw!” ka ci hi.

²⁰Keima in ka mawna le ka mi Israel’ mawna ka pulah kawmin hamin thu ka nget laitah le ka Pasien’ muol siengtho tangin TOPA ka Pasien mai-ah thumna ka nei laitah,

²¹thu ka ngetnget laitah, nitah biehpiehna hun pawlin ka mangmu masah lai-a ka musa Gabriel kici mipa ka kungah mallang tahin ang leng hi.

²²Ama ang pei[51] a, keima kungah, “Daniel, tu-in pilna le theitelna pie dinga ang pei ka hi hi.

²³Thumna na nei pat tahin thu khat ang pusuoh a, tua thu gen dinga ang pei ka hi hi, azieh pen nahpitahin nang ang ki-it hi. Tuaci’n khum thu ngaisun inlen mangmuna theitel in:

²⁴“Na mite le khuopi siengtho in khielna a tawpsan nading, mawna suhmang nading, le khielna zieha mawsut nading, kumtawn dihna a tun nading, kamsanna le mangmuna khahcip nading, le siengtho pen mun[52] sathau nu nadingin nipikal sawmsagi sung kise zo hi.

²⁵Tua ahi ziehin thei inlen telcien in: Jerusalem a kilamkia nading thu a kipieh huna kipanin sathau kinu pa hun dong nipikal sagi sung hi ding hi; tuale nipikal sawmguh le ni sungin gawlzin lampite le tuikulte kibawlkia ding a, ahi vangin lungkham hun sung hi ding hi.

²⁶Nipikal sawmguh le ni a tawp zaw ciengin sathau kinu mipa khat kisumaimang ding a, bangma a nei sih ding hi. Tuale ang pei ding ulienpa’ galkapte in tua khuopi le mun siengtho a susie ding uhi. Ama’[53] manthaina pen tuizin tun bang hi ding a, a tawp dongin gal kidona om ding hi. Suhsiet dinga thukip kibawlsa ahi hi.

²⁷Ama in mi tampite tawh nipikal khat sung thuciem khau khat bawl ding a, ama in tua nipikal alang sungin biehpiehna le biehnate khawlsah ding hi; tuale a susie pa tungah a tawpna thukip a kibuohsuh dongin tuate munah [54]a susie kidahhuoi na khat kikoi ding hi,” ei ci hi.