Read Zou HOSEA 1 Bible Online

HOSEA 1 - Zou bible

HOSEA 1

¹Judah kumpite Uzziah, Jotham, Ahaz, Hezekiah, le Israel kumpi Joash’ tapa Kumpi Jeroboam hun lai-in Beeri’ tapa Hosea tungah TOPA’ thu a tung hi.

²TOPA in Hosea tungtawnin thu a gen masah lai-in, TOPA in Hosea kungah, “Pei-in numei pahtat khat na zi-in la inlen, tua nu tawh ta nei in, azieh pen gamsung mite in TOPA taisanin pahtatna lienpi bawl uhi,” a ci hi.

³Tuaci’n ama pei-in Diblaim’ tanu Gomer a zi-in la a, tua nu gai-in ama tawh tapa khat nei hi.

⁴TOPA in ama kungah, “A min Jezreel[1] phuoh in; azieh pen a sawt loin Jezreel’ sisan ziehin keima in Jehu’ innkuonte dan ka pie ding a, Israel innkuonte’ uhna gam ka tawpsah ding hi.

⁵Khum ni ciengin Jezreel kuomah Israel’ thaltang ka hliehtawng ding hi,” a ci hi.

⁶Tua nu gaikia a, tanu khat nei hi. Tua ciengin TOPA in ama kungah, “A min Lo-ruhamah[2] phuoh in, azieh pen Israel innkuonte ka khuotuo nawn sih ding a, a mawna uh ka maisah nawn sih ding hi.

⁷Ahi vangin Judah innkuonte ka khuotuo ding a, thal le namsau, gal simna, sakol le sakol tungtuongte vang tawh hi loin a TOPA Pasien uh’ vang tawh amate ka hundam ding hi,” a ci hi.

⁸Lo-ruhamah in nawi a tansah zaw ciengin tua nu gai-in tapa khat nei hi.

⁹Tua ciengin TOPA in, “Ama’ min Lo-ammi[3] phuoh in, azieh pen note keima’ mite na hi nawn sih vua, kei zong note adingin KEIMA ka hi nawn sih hi,”[4] a ci hi.

¹⁰[5] Hinanle Israel mite pen tezawh lo, simzawh lo za dongin tuipi senel bangin a tam ding vua, “Ka mite hi lo,” ka cisa amate, “A hingzing Pasien’ tate,” kici ta ding hi.

¹¹Judah mite le Israel mite a kigawmkia ding vua, a makai ding uh khat a se ding uhi; tuale amate in gamh a luo ding vua, tua Jezreel hun pen hun thupi mama hi ding hi.