Read Zou HOSEA 10 Bible Online

HOSEA 10 - Zou bible

HOSEA 10

¹Israel pen lenggui phung pha ahi a, ama in ga tampi a ga hi. A lengga ga semsem a, ama in maitam lam semsem hi; a gam khantona tawh kizui-in biehna songte bawl bebe hi.

²A lungtang uh a man sih hi; tu-in amau’ khielna paat a puo ding uhi. TOPA [44] in a maitam uh satguoi-in a biehna songte uh a susie ding hi.

³Azieh pen tu-in amate in, “TOPA ka zatah lo ziehun kumpi zong ka nei ta sih uhi, ama in kote adingin bang ei seppieh thei ding ahei?” a ci ding uhi.

⁴Amate in thu ginalo po a gen vua, a kampi utawh kiciemin thuciemnate a bawl uhi; Tuaci’n lolai tuma kuohte lahah a po a gunei lopate bangin kiheh kibalna dim hi.

⁵Beth-aven khuo-a bawngno[45] lim ziehin Samaria-a tengte zau-in a citun uhi. Tami ziehin a mite a kap ding vua, tami thu ziehin milim a bie siempute thumin tau[46] ding uhi. Amate in tua pana a kilamang ama’ vang a kaapi ding uhi.

⁶Assyria kumpi lienpa[47] kungah sieh le kaih a pieh dingin tuami kipuo ding hi. Ephraim kimaizumsah ding a, a milim ziehin Israel maizum ding hi.

⁷Tui maitanga a lam tuiphuon bangin Samaria kumpipa a kisie ding hi.

⁸Israel’ mawna ahi Aven munsangte kisusie ding a, a maitamte uh tungah ling le khaute a po ding hi. Amate in muolsangte kungah, kote ei khusuh un, a ci ding vua, muolte kungah, kote tungah hing kiesuh ta un, a ci ding uhi.

⁹Israel aw, Gibeah hun peh panin nang na maw zo ta bo hi; amate in khum munah mawna a bawl lai uhi. Gal in Gibeah ah amate nuaphah lo ding amah?

¹⁰Thu manglo mite langkhatah dan pie dingin kang pei ding[48] a, khielna nam ni a bawl ziehun amate dan[49] ka pieh ciengin, amate langkhatah minamte ang kikhawm ding uhi.

¹¹Ephraim pen hoitaha a kisin ancil ding a thanuom bawnglaa ahi a, keima in a zol sipsep a ngawng ah kol ka na bul sih hi; Hinanle Ephraim pen lei ka kalsah ding hi. Judah in lo a kaih lo phamaw ding a, Jacob in ama adingin lo a hlo ding hi.

¹²Noma adingin dihna khaici tu un; itna kip at unlen a kihlo nai lo lote kalkang un. Azieh pen ama ang pei-in note tungah thumana guo ang zuhsah thei nadingin TOPA sui hun ahi hi.

¹³Note in lo kaih bangin gitlona lo na kai vua, bu at bangin thutang lo na at zo uhi; note in zuou phuona ga zong na ne zo ta uhi. Azieh pen note in thahatna na suong vua, na galhang honpite na ngam seng uhi.

¹⁴Tua ahi ziehin gal a kido ni-in Shalman in Beth-arbel a suhsiet bangin, a tate utawh nute tuol dena-a a kinei hun lai-a bangin, na mite langkhatah gal dona husa om ding a, na kulpi zosie uh a kisusie ding hi.

¹⁵Bethel aw, na gitlona a gol ziehin nang tungah tua bangin ang kibawl ding hi. Khuovah ciengin Israel’ kumpipa kisumaimang ding hi.