Read Zou HOSEA 4 Bible Online

HOSEA 4 - Zou bible

HOSEA 4

¹Israel mite aw, TOPA’ thugen ngai un; azieh pen TOPA in gam sunga a tengte mawmatna khat nei hi. Gam sungah citahna, dihna le Pasien theina om lo hi.

²Kiciemna, kisolna, tuolthana, guhtatna le angkawmnate om a, sisan luonnate khat zaw khat a om hi.

³Tua ahi ziehin leitang tau-in a sunga teng zosie a mau uhi; vana a leng vate, gamsate le tuipi ngasate nangawn tawh a maimangtha ding hi.

⁴Hinanle koima kisel da hinlen, koima kimawsah sih heh. Azieh pen siempu pa[20] aw, ka kiselpi pa nangma na hi hi.

⁵Sun lai-in na kipal ding a, zan lai-in nang tawh kamsangpa a puaton ding hi. Tuale keima in na nu ka sumaimang ding hi.

⁶Theina a kitasap ziehin ka mite a kisie uhi; nang in theina na nual ziehin ka siempu dingin nang kang nuol hi. Note in na Pasien uh’ thukham na mangngil ziehun, keima in zong na tate uh ka mangngil ding hi.

⁷Amate tam semsem leh, kei tunga a mawna uh a tam semsem hi; amate in a minthanna uh maizumna tawh a khel[21] uhi.

⁸Amate in ka mite’ mawna kivana’n a nei uhi; ka mite a khiel semsem ding a dei uhi.

⁹Mite tunga a tun bangin siempute tungah zong tung ding hi; amau’ tot lampi bangin amate dan pie-in, amau’ gamtat bangin ka thuhkia ding hi.

¹⁰Amate in nene napi a taizo sih ding uhi; patatna tawh kidim napi a pung sih ding uhi; bangzieh ahei cile amate in pahtatna nuadelin TOPA a taisan uhi.

¹¹Lenggazu lui le lenggazu a tha in theitelna a lahmang pieh hi.

¹²Ka mite in sing milim po thu a kuppi vua, a ciengkhut un amate tungah thuphuon a gen hi. Bangzieh ahei cile pahtat nopna lungsim in amate lam khielsah a, Pasien taisanin numei pahtat bangin amate a gamta uhi.

¹³Amate in muolsang dawn tengah kithoina nei-in, muol tunga gangpi kung, popler kung le terebinth kungte nei-ah biehnate a pie uhi. Bangzieh ahei cile tua sing hlimte nuom mama hi. Tua ahi ziehin na tanute in pahtatna a bawl vua, na monute un zong ang a kawm uhi.

¹⁴Na tanute a pahtat cieng ule, na monute in ang a kawm ciengun, dan ka pie sih ding hi; azieh pen pasalte mama a pahtatte tawh kithuo-in, biehinnpi-a numei pahtatte tawh biehpiehna a bawlton uhi. Tam bangin theitelna nei lo mite a kisie ding uhi.

¹⁵Israel aw, na pahtat vangin Judah in khielna bawlsah sin. Gilgal ah lut sin len, Beth-aven ah peito sin. “TOPA a nungta ahi ma bangin,” ci-in zong kiciem sin.

¹⁶Bawnglaa lungkhau bangin Israel zong a lungkhau hi; TOPA in lonona gam lienpi ah a tuunote a vah bangin ama in amate a vah zo ding amah?

¹⁷Milimte tawh Ephraim kizom hi, ama guohin om taheh.

¹⁸A zu dawn zaw ciengun nu le pa mawna bawlin amate a thangtat vua, a vangphatna[22] ding uh sangin zumhuoina lam a deizaw uhi.

¹⁹Huipi in amate[23] a hlakui-in zielmang a, amau’ maitamte[24] ziehin a maizum ding uhi.