Read Zou HOSEA 8 Bible Online

HOSEA 8 - Zou bible

HOSEA 8

¹Na pengkul na nephu tawh tuo in! Langta[37] tawh a kibang khat TOPA’ inn tungah a om hi, azieh pen amate in ka thuciemna a susie zo ta vua, ka thukham a palsat zo ta uhi.

²Ka kungah Israel-te ang kiko vua, “Ka Pasien aw, - koma Israel- in nang kang thei uhi!” a ci uhi.

³Israel in na hoite pai zo hi; galte in ama a del ding hi.

⁴Amate in kei tungtawn loin kumpite koi uhi; amate in kei thei loin uliente zong a koi uhi. Amau’ siet nadingin a ngun le a kham utawh milimte a bawl uh hi.

⁵Samaria aw, na bawngno kinuol hi. Amate tungah ka sin a so hi. Amate bang tanvei maw nei loin om thei ding uh ahei?

⁶Azieh pen tua bawngno khu Israel sung panin khut siem khat’ bawl hi a, Pasien ahi sih hi. Samaria bawngno pen a phalphalin keh ding hi.[38]

⁷Azieh pen hui khaici a vaw ziehun amate in pumpei a at ding uhi. Bukungte in vui nei lo a, buvuite in neh ding piengsah lo ding hi; piengsah ma nanleh gamdang mite in netum ding hi.

⁸Israel a kipumval ahi ta hi; tu-in kimanna a nei lo beel bangin minamte lahah ama a om hi.

⁹Gam-laa a tang tat bangin Assyria ah amate a peito uhi; Ephraim in a lawm ngaite tawh a thaman ding kiho uhi.

¹⁰Amate in minamte tawh a guoi man ding kiho nan ule, keima in amate tu-in ka kaikhawm ding hi. Kumpite le uliente’ suon vangih nei-ah amate a kilawmlia ding uhi.

¹¹Ephraim in maw mai nadingin maitam a tam bawl ciengin, tua maitam te ama adingin mawna maitam a suoh hi.

¹²Ama adingin keima in thuhilna tampi giel nanleng, tuate pen sil lamdang khat bangin kingaisun lel hi.

¹³Deiteel biehpiehnate[39] lui-in sa a neh vangun, TOPA in amate sang lo hi. Tu-in ama in amau’ khielna ciemte ding a, a mawnate uh dan a pie ding hi; amate Egypt ah kilekia ding uhi.

¹⁴Israel in a Bawlpa mangngilin kumpi innte a lam bebe hi. Judah in kul a nei khuopite a lam bebe hi. Ahi vangin a khuopite tungah mei ka sawl ding a, tua mei in ama’ mun muonhuoite a katum ding hi.