Read Zou JOEL 1 Bible Online

JOEL 1 - Zou bible

JOEL 1

¹Pethuel’ tapa Joel tungah TOPA’ thu a tung hi:

²No upate aw, tami ngai unlen, gam sunga tengte zosie in zong na bil uh daw un! Noma le na pu na pate khangin tam bang thu a pieng ngai amah?

³Tam thu na tate hil unlen, na tate un amau’ tate hilsawn hinlen, a khang a khangin kihil sawn uheh.

⁴A pettan kauphete’ nehmawh teng, kauphe honte in netum a, kauphe honte’ nehmawh teng, a kitom kauphete in ne-in, a kitom kauphe’ nehmawh teng, a susie kauphe in a netum hi.

⁵No zukhamte aw, tho unlen kap un; no lenggazu dawn zosiete aw, thumin tau un, azieh pen na kam sung panun zutuite kikhahtan zo hi.

⁶Azieh pen a thahat, a kisim zo lo minam a tampi khat in ka gam ang sim hi; amau’ ha pen humpi’ ha tawh kibang a, humpi nute’ ha bangin hiem mama hi.

⁷Ka lengguite ei suhsiet pieh vua, ka theikungte zong a sattan uhi; a hawte hawh dawhin a paimang vua, a bate zong khu a kangdang sieng ta hi.

⁸La-ip puon silin a sen lawmpa a kaa nungah nu bangin kap un.

⁹TOPA’ biehinn panin an tawh biehna le dawn thei biehna om nawn lo hi. TOPA’ nasem ahi siempute thumin a tau uhi.

¹⁰Lozaute a kisie sieng ta a, leitangte a kap vangut ta hi; azieh pen ankungte kisusie a, lenggazute gawkangin sathaute tawp sieng ta hi.

¹¹No lohlote aw, da un. No lenggui cingte aw, mangbu le mangbuhamte adingin thumin kap un; bangzieh ahei cile lolai ante kisie ta hi.

¹²Lengguite gawpmang sieng a, theikungte tuolah kunsuh ta hi. Mang kawlsingte, lutu kungte le apple kungte a kipan, lolai-a singkung zosie gawta sieng zo hi; a tahtahin ci leih mite lahah lungnopna kici om nawn lo hi.

¹³No siempute aw, la-ip puon silin kap un; no maitam nasemte aw, thum unlen tau un. No ka Pasien’ nasemte aw, hing pei unlen zan khuovahin la-ip puon silin kap un! TOPA’ inn panin an tawh biehna le dawn thei biehnate kipie nawn lo hi.

¹⁴A siengtho antanna khat bawl unlen, kikhopna thupi khat hlan un. Na TOPA Pasien uh’ biehinn sungah upate le gam sunga tengte zosie, kaikhawm unlen TOPA kungah kiko-in thungen un.

¹⁵Kadeisei, tuami ni khu! Bangzieh ahei cile TOPA’ ni ang nai ta a, Vanglienpa[1] kung pana ang pei sietna bangin ang tung ta hi.

¹⁶Eima’ mitmu-in an neh ding le i Pasien’ biehinn sung panin kipahna le thanopnate kilamang ta hi lo amah?

¹⁷Leikhal[2] nei-ah khaicite gaw sieng a, an kholna innte hawmsuoh ta hi; bu a tun lo ziehin ansalte zong kisie gawp ta hi.

¹⁸Ganhingte cimaw-in tautau uhi! bawng honte a vahthap uhi, bangzieh ahei cile amate adingin lohing om lo hi; tuuhonte nangawn zong cimaw-in a lungdong[3] uhi.

¹⁹TOPA aw, nangma kungah kang kiko hi. Bangzieh ahei cile gamlah lohing zosie mei in hulvam ta a, meikuong in lolai-a singkung zosie a katum sieng ta hi.

²⁰Gamlah lohingte mei in a kahtum sieng ziehin, luidungte kanggaw sieng ta a, gamsate nangawn zong nangma kungah ang kiko uhi.