Read Zou JOEL 3 Bible Online

JOEL 3 - Zou bible

JOEL 3

¹[8] Khum ni le khum hun ciengin Judah le Jerusalem, a nidang hun ka bahsah ciengin,

²keima in minam zosie kaikhawmin Jehoshaphat kuomah ka peipisuh ding a, khum munah ka mite le ka gouluo Israel ziehin amate tungah thu ka khen ding hi, azieh pen amate in minamte lahah Israel a kithezah sah uhi. Amate in ka gam a hawm vua,

³ka mite adingin aisanin a pahtat numeite lei nadingin naupangte, zu lei nadingin nungahte a zua vua, tuale a khamtahun zu a dawn uhi.

⁴Tyre, Sidon, le Philistia gam zosie aw, keima tungah bang bawl sawm na hi uh ahei? Bang khat po zieha ei thuh sawm na hi uh amah? Note in ei thuhkia na hi uleh, ke’n zong na luzang vuah na na sepsate uh kinawtah le gangtahin kang tusahkia ding hi.

⁵Bangzieh ahei cile note in ka ngun le ka kham teng nei lahpieh ta vua, na biehinnpi[9] vuah ka gougil teng na puo sieng ta uhi.

⁶Note in Judah mite, Jerusalem mite, le Greek mite tungah na zua vua, a gamgi panun a gamlapi-ah na hemmang uhi.

⁷Ahi vangin tu-in na zuana uh mun ciet panin amate ka hantawh ding a, na luzang vuah na sepsa teng uh ka tungsahkia ding hi.

⁸Keima in Judah mite khut sungah na tanute ule na tapate uh ka zua ding a, amate in a gamlapi-a om gam khat ahi Sebea-te tungah zuasawn ding uhi; bang ding ahei cile TOPA in a gensa ahi hi.

⁹Minamte tungah tam thu phuongzah un: Galdo[10] dingin kithawi unlen, galhangte hantawh un. Galkapte zosie in naisah unlen, amate hing kuonsah un.

¹⁰Lokaina na tute uh namsau-in kheng unlen, singba heuhna na namkawite uh teipi-in kheng un; a zawngkhal pa in zong, Kei galhang ka hi hi,” ci taheh.

¹¹No a kimvela om minam zosie aw, mallangin[11] hing pei unlen, khum munnah hing kikhawm un. TOPA aw, na galhangte hing peipisuh in.

¹²Minamte, amau le amau hing kihantawh uh hinlen, Jehoshaphat kuomah hing peito ta uheh; bangzieh ahei cile na kimvel vua om minam zosie thu khen dingin khum munah keima ka to ding hi.

¹³An lah hun ta ahi ziehin na phieukawi uh tawi un. Lengga cilna kuong dimin, lenggatui dawna zong dimlet ta ahi ziehin, hing pei unlen hing cil un, bangzieh ahei cile a gitlona uh lien mama hi.

¹⁴Thukhenna kuom sungah mihon tampitah a om hi! Azieh pen thukenna kuom sungah TOPA a nai zo hi.

¹⁵Nipi le hlapi miel zo a, aasite tang nawn lo hi.

¹⁶Zion panin TOPA hawhin, Jerusalem panin awng vapuoh a, vanpi le leipi a kilawh hi. Hinanle mite adingin TOPA pen kibuhna hi a, Israel mite adingin mun muonhuoi ahi hi.

¹⁷Tuaci’n note in keima, ka muol siengtho Zion-a teng TOPA na Pasien uh ka hi lam na thei ta ding uhi. Jerusalem siengtho ding a, minamte in ama sungah lam a hla ngai nawn sih ding uhi.

¹⁸Khum ni ciengin muolsangte panin zuningte ang taasuh ding a, muoltangte ah bawngnawite luongin, Judah gam luidung zosie ah tui luong ding hi; TOPA’ inn panin tuisam khat pul ding a, tua in Shittim kuom teng a nomsah ding hi.

¹⁹Judah mite tungah a tatsiet zieh ule, a gam sung vuah maw nei lote’ sisan a luonsah ziehun, Egypt gam, ten lona gam suohin Edom gam, senel gam a suoh ding hi.

²⁰Ahi vangin Judah gam pen kumtawn tenna-in kinei ding a, Jerusalem pen a khangkhangin tenna-in kinei ding hi.

²¹Keima in amau’ sisan phu la-in, a khielnate uh[12] ka maisah sih ding hi, bangzieh ahei cile Zion ah TOPA a teng hi.