Read Zou AMOS 1 Bible Online

AMOS 1 - Zou bible

AMOS 1

¹Judah Kumpipa Uzziah le Israel Kumpipa Joash’ tapa Kumpi Jeroboam khan sung, zillin masang kum ni hun lai-in[1] Israel tawh kisai Tekoa tuucingte lahah Amos thugen tam bang ahi hi.

²Ama in tam bangin ci hi: Zion panin TOPA hawhsuh a, Jerusalem khuopi panin ang awng vapuoh hi; tuucingte’ lohingte vulnangin, Carmel muolvum gausan sieng hi.

³TOPA in tam bangin ci hi: Damascus’ khielna thum le li ziehin, ka danpiehna[2] ka dawhkia sih ding hi; azieh pen amate in sia-ha a nei an gawina tawh Gilead a gawt guoi uhi.

⁴Tuaci’n Hazael inn sungah meikuong ka hla ding a, tua in Ben-hadad mun muonhuoite a katum sieng ding hi.

⁵Damascus khuopi tunkot zawlte ka hliehtawng ding a, Aven Kuoma a teng mite le Beth-eden pana kumpi ciengkhut a tawipa ka sumaimang ding hi; keima in Kir ah Aram-te salin kipeipi ding hi, TOPA in ci hi.

⁶TOPA in tam bangin ci hi: Gaza thupalsatna thum le li ziehin, danpiehna[3] ka dawhkia sih ding hi; azieh pen amate in Edom tunga ap dingin minambup salin a kai uhi.

⁷Tuaci’n keima in Gaza kulbangah meikuong ka hla ding a, tua meikuong in a mun muonhuoite a katum ding hi.

⁸Ashdod-a tengte le Ashkelon panin kumpi ciengkhut a tawi pa ka sumaimang ding hi; Ekron khuopi langkhatah ka khut ka hlang ding a, Philistia-te a omlai teng a sigam ding uhi, TOPA Pasien in ci hi.

⁹TOPA in tam bangin ci hi: Tyre’ khielna thum le li ziehin, danpiehna[4] ka dawhkia sih ding hi; azieh pen amate in Edom-te tungah minambup a ap vua, unau hina dinga thuciemna a phawh kha ta sih uhi.

¹⁰Tuaci’n keima in Tyre kulbangah meikuong ka hla ding a, tua meikuong in a mun muonhuoite a katum sieng ding hi.

¹¹TOPA in tam bangin ci hi: Edom-te khielna thum le li ziehin, danpiehna[5] ka dawhkia sih ding hi; azieh pen ama in namsau tawh a sanggampa del a, khuotuona lungsim nei lo hi; a tawntungin[6] ama lungthah a, a thangpaina[7] a kem zing hi.

¹²Tuaci’n Teman ah meikuong ka hla ding a, tua in Bozrah mun muonhuoite a katum ding hi.

¹³TOPA in tam bangin ci hi: Ammon-te khielna thum le li ziehin, danpiehna[8] ka dawhkia sih ding hi; azieh pen a gam uh a golkeh nadingun, Gilead-a numei gaite’ gil a kuikehpieh uhi.

¹⁴Tuaci’n Rabbah kul tungah mei ka tawkuong ding a, gal kido ni-a kikona le pumpei kipei ni-a huipi tawh tua meikuong in a mun muonhuoite uh katum ding hi;

¹⁵tua ciengin a uliente le a kumpipa uh salin a pei ding uhi, TOPA in ci hi.