Read Zou AMOS 2 Bible Online

AMOS 2 - Zou bible

AMOS 2

¹TOPA in tam bangin ci hi: Moab-te khielna thum le li ziehin, danpiehna[9] ka dawhkia sih ding hi; azieh pen ama in Edom kumpipa’ gute suongkang bangin a haltum hi.

²Tuaci’n Moab tungah meikuong hla-in tua in Kerioth mun muonhuoite katum ding a, gamlumna awging le pengkul ginte lahah Moab-te si ding uhi.

³Tuate laizangah gam uhpa ka sumaimang ding a, ama tawh uliente zosie ka that ding hi, TOPA in ci hi.

⁴TOPA in tam bangin ci hi: Judah khielna thum le li ziehin, danpiehna[10] ka dawhkia sih ding hi; azieh pen amate in TOPA’ thukham a nuol zo vua, a thu kipte zui loin, hinanle amate in a pu a pate’ na zuisa zuouphuonate tawh, amate lam khielsah zo hi.

⁵Tuaci’n Judah tungah meikuong ka hla ding a, tua in Jerusalem mun munhuoite a katum ding hi.

⁶TOPA in tam bangin ci hi: Israel khielna thum le li ziehin, danpiehna[11] ka dawhkia sih ding hi; azieh pen amate in ngun tawh midihte a zua vua, amate in kedap kop tawh mi tasamte a zua uhi.

⁷Amate in mizawngte’ lutang leivui lahah a tuoncil vua, lampi panin mi gentheite a sawnnawp uhi; ka min siengtho a buasah dingin, nungah khat kungah a pa le a tapa a pei uhi;

⁸maitam cinteng tungah a lum vua, vankhap a kila puonte a netpha uhi; amate in a Pasien uh’ inn sungah a mi gapna uh zu a dawn uhi.

⁹Hinanle keima in a mai vuah taamtah sing banga a sang le gangpi sing banga a sah Amor-te ka suhsiet pieh hi; keima in a tunga a ga le a nei-a a huite ka susie hi.

¹⁰Note zong Egypt gam pan kang peipi to a, Amor-te leitang a luo dingin kum sawmli sung senel gamah kang pui hi.

¹¹Na tapate uh pawlkhat kamsangin ka pangsah a, na khangnote uh pawlkhat nazir mi[12] ka hisah hi. Tam bang ma hi lo amah, Israel mite aw, TOPA in ci hi.

¹²Hinanle note in nazir mite[13] zu na dawnsah vua, kamsangte thu pie-in, “Thu phuong sih un,” na ci uhi.

¹³Tuaci’n bulomte[14] a dim ciengin bawngleng a netsuh bangin, keima in na opna mun vuah note kang nensuh ding hi.

¹⁴Tai hatte a suohta sih ding vua, a tha hatte in a hatna uh a zang man sih ding uhi;

¹⁵thaltawite in a do zo sih ding vua, a malgangte amau le amau kihunzo tuom loin, sakol tunga tuongte in a hinna uh a humbih zo sih ding uhi.

¹⁶Khum ni ciengin mihatte lahah a hangsan pente zong a guohtangin taimang ding uhi, TOPA in ci hi.