Read Zou AMOS 3 Bible Online

AMOS 3 - Zou bible

AMOS 3

¹Israel mite aw, Egypt gam pana kang peipi innkuonte zosie, note langkhatah TOPA thugen za un:

²Leitung innkuon zosie lahah no beh kang thei ahi bo hi; tua ahi ziehin keima in na khielna zosie ziehun dan kang pie ding hi.

³Kiciemkholna om loin mi ni a zawhton thei amah?

⁴A samat ding a nei lo ciengin gamlah ah humpi a mawh hawh amah? Samat bangma a nei lo ciengin a kuo sungah humpi khanglai a mawh ham amah?

⁵Thang-anta a op sih le lei lahah a kisie thangah vata a mawh aw amah? Bangma awh lopi-in leilah panin thang a kimawh sai amah?

⁶Khuopi sungah pengkul a kimut ciengin mite a zau sih uh amah? TOPA’ tunsah lo pi-in khuopi sungah gimna a tung amah?

⁷A tahtahin TOPA in ama’ nasem kamsangte tungah a thusim gen lopi-in na sem lo hi.

⁸Humpi hawh zo hi; koi ahiei a giing lo ding? TOPA in gen zo hi; koi ahiei a thu phuong ding?

⁹Ashod mun muonhuoite le Egypt gama mun muonhuoite-ah phuongzah inlen, “Samaria Muol[15] ah kikhawm unlen, a sunga buoina lienpite en un. Tua khuopi laikima a om bawlsietnate hing en un,” ci un.

¹⁰Amate in a mana gamtat ding a thei sih vua, mun muonhuoite sungah tatsietna le guhtatna a khol uhi, TOPA in ci hi.

¹¹Tua ahi ziehin TOPA Pasien in tam bangin gen hi: Galte in tua gam kuikhumin, na kihunna uh a la ding uhi; na mun muonhuoite uzong kibulu ding hi.

¹²TOPA in tam bangin ci hi: Tuucing pa in humpi kamhawm panin tuu keng ni, ahi sihle a bil themkhat a hunkhiet ma bangin topha nip ningkiu khat le lupna themkhat[16] tunga a to Samaria khuo sunga a teng Israel mite kihunkhie ding hi.

¹³Vanglien Pasien ahi, TOPA Pasien in ci hi: Za unlen Jacob innkuonte langah teci pang un.

¹⁴A khielna ziehin Israel dan ka pieh ni-in, Bethel maitam dan ka pie ding a, maitam kite tawngsanin tuolah a kiesuh ding hi.

¹⁵Phalbi inn le khal inn ka phel ding a, saiha innte kisie-in inn thupite[17] tawpmang ding hi, TOPA in ci hi.