Read Zou AMOS 4 Bible Online

AMOS 4 - Zou bible

AMOS 4

¹Mizawngte nengniemin mi tasamte gawt a, a pasalte kungah, “Ka dawn ding bangkhat ei pie vawi!” ci-in a gen, Samaria Muoltunga a om no Bashan bawngpite aw,” tami thu ngai un.

²A siengthona tawh TOPA Pasien kiciem zo hi: Amate in note siakawi tawh ang kaidawh ding hun ang tung valon ding a, a nukhia pente nangawn ngakuoi tawh ang kai ding uhi.

³Kulvang zui-in na pitdawh ding vua, a mailam vuah mi zosie tangtahin pei ding uhi; Harmon[18] muolah na kisengnawp ding uhi, TOPA in ci hi.

⁴Bethel ah hing pei unlen khielna bawl un; Gilgal ah hing pei unlen, khielna khangsah un; zingmawng sielin na kithoinate uh tawi unlen, nithum sielin na sawm-a-khatte uh tawi un;

⁵tol kisaw lungdamna biehna tawi unlen, na dei dan uh biehnate phuongzahin tuate gen un; bangzieh ahei cile tam banga bawl ding pen na dei dan uh ahi hi, Israel mite aw! TOPA Pasien in ci hi.

⁶Na khuopi zosie vuah ha sienthona kang pie a, na tenna mun zosie vuah neh tasamin kang koi a, hinanle ka kungah nang kilekia tuom sih uhi, TOPA in ci hi.

⁷Ka anlah hun ding hla thum a sap laitahin, note tungah guo a zuh ding ka kham hi; khuopi khatah guo zusahin, adang khatah ka zusah sih hi; lo khat tungah guo zu a, guo zuh lona lo a gawta hi.

⁸Tuaci’n tui sui dingin khuopi ni le thuma mite khuopi khatah a vah kawikawi vua, a tai zo sih uhi; hinanle kei kungah nang kilekia tuom sih uhi, TOPA in ci hi.

⁹Huisapi le maibuoh natna tawh kang sugawp hi; na umte ule na lenggui lote a hawmguohin ka koi hi; kauphe in na theikungte ule na olive kungte uh a netum sieng hi; hinanle ka kungah nang kilekia tuom sih uhi, TOPA in ci hi.

¹⁰Egypt gama ka tunsah dan bangin note lahah pul natna kang tungsah hi; na tangvalte uh namsau tawh ka satlia hi; na sakolte uh[19] kang kaimangpieh hi; na nahhawm sung vuah na giephuol vua sil uite ka lut tosah hi; hinanle kei kungah nang kilekia tuom sih uhi, TOPA in ci hi.

¹¹Pasien in Sodom le Gomorah a lumle bangin mi pawlkhat ka lumlet ding a, meikuong lai-a a kiladawh singthem tawh na kibang ding uhi; hinanle ka kungah nang kilekia tuom sih uhi, TOPA in ci hi.

¹²Tua ahi ziehin Israel aw, nang tungah tam bangin kang bawl ding hi: Na tungah tami hing bawl ding ka hi ziehin, Israel aw! na Pasien tawh a kimu dingin kisakhol in.

¹³Bangzieh ahei cile en in, muolte bawlin huite a siem pa, a ngaisutna mi kunga a pulah pa, zingmawng khuomiel suohsahin leitung munsang teng a tuoncil pa, a min Vanglien Pasien, TOPA ahi hi.