Read Zou AMOS 5 Bible Online

AMOS 5 - Zou bible

AMOS 5

¹Israel innkuonte aw, kaateng lo kawmin na kung vuah kang gen tam thu khu ngai un:

²Israel ngahnu pua a, a thokia nawn sih hi; a gam sungah kipampai a, a phongto ding koima om lo hi.

³Azieh pen TOPA Pasien in tam bangin ci hi: Mi tulkhat a kuonsah khuopi ah mi zakhat hing lai ding a, mi zakhat a kuonsah khuopi ah mi sawm hing lai ding hi.[20]

⁴Azieh pen TOPA in Israel innkuon tungah tam bang ci hi: Keima ei sui unlen hing un;

⁵hinanle Bethel sui sih unlen, Gilgal ah lut loin, Beer-sheba ah zong galkai sih un; azieh pen salin Gilgal pei valon ding a, Bethel zong bangma lo a suoh ding hi.

⁶TOPA sui un, tua hile na hing ding uhi. na sui sih uleh Joseph innkuon tungah mei bangin ang kuong ding a, tua mei in Bethel katumin koima in a phel zo sih ding hi.

⁷Thutang lumletin aicim kha suohsah a, thudih tuol denna a nei note in gimna thuoh man va uciei!

⁸Bawmluoi le Zawlzawng a bawl, khuomiel zingmawng a suohsah, sunlai zan banga a mielsah, tuipi panin tuite hlanin lei maitanga tua tuite a sungsuh pa, ama’ min TOPA ahi hi.

⁹Mihatte suhsiet nadingin mallang mama a, tuaci’n kulpi tungah sietna a tungsah hi.

¹⁰Amate in tunkota thuhil pa a muda vua, amate in thuman gente a huo uhi.

¹¹Tua ahi zehin mizawngte tuoncilin, amau kung panin ankaihte na lah ziehun, suong kilem innte lam nan locin a sungah na tengkha sih ding uhi; a dei huoi lengga lote bawl nan locin lenggazu na dawn kha sih ding uhi.

¹²Bangzieh ahei cile na khielna za ule na mawnate uh a liet lam ka thei a, midihte genthei bawlin guhgol na la vua, khuopi tunkot ah mi tasamte na sawnpua uhi.

¹³Tua ahi ziehin tam bang hun ciengin, mi pilvangte a sip khinkhian ding uhi; bangzieh ahei cile tua hun pen hunsie ahi hi.

¹⁴Na hin thei nadingun hoina sui un, gitlona sui sih un; na gensa bangun Vanglien TOPA Pasien in note ang ompi ding hi.

¹⁵Gitlona muda-in thu hoi dei unlen, khuopi tunkot ah thutang sukip un; Joseph minam a omlai teng, TOPA, Vanglien Pasien in ang lainat kha thei ding hi.

¹⁶Tua ahi ziehin TOPA, Vanglien Pasien in tam bangin ci hi: Khuolai mun-awng zosie ah kaa le mau om ding hi; amate in lamdung zosie ah, “Kadeisei! kadeisei!” a ci ding uhi. Amate in a kap dingin lohlote a ciel ding vua, a thum a mau dingin kaateng law siemte a ciel ding uhi.

¹⁷Na laikim vuah kang kansan ding ziehin, lengga lo zosie ah kaana le mauna om ding hi, TOPA in ci hi.

¹⁸Azieh pen TOPA’ ni ang tun ding a lunggul note in gimna na thuoh ding uhi! TOPA’ ni bang dinga na lunggul uh ahei? Tua ni pen khuomiel hi a, khuovah hi lo hi;

¹⁹Humpi kung pana a tai, vompi khat tawh kituoh mi khat tawh kibang ding hi; ahi sihle a inn sungah lutin kawma khut a ngap ciengin gul in a tuh mipa tawh kibang ding hi.

²⁰TOPA’ ni pen khuovah hi loin khuomiel ni hi a, a sungah a tang a om lo khuomiel ni hi lo amah?

²¹Na biehna pawite uh ka muda a, ka thupisim sih hi, na khawmpi bawlte un ka lung a kimsah sih hi.

²²Keima kungah na meihal biehnate ule an tawh biehnate nang tawi vangun, tuate ka sang sih ding hi; thunuom biehna dinga nang peipi uh na ganthaute uzong etin ka nei vet sih ding hi.

²³Na lasah gamlumnate uh khawl un; na harp lasahna tumgingte uh ka ngai vawt sih ding hi.

²⁴Thutang, tui bangin luongsah unlen, dihna, a kang ngai lo luitui bangin luongsah un.

²⁵Israel innkuonte aw, senel gamah kum sawmli na op sungun keima kungah biehpiehnate le biehnate nang tawi uh amah?

²⁶Note in noma dinga na bawltawm uh na kumpipa uh Sakkuth le na aasi-pasien uh ahi na milimte[21] uh na puo ding uhi.

²⁷Tua ahi ziehin Damascus galkhatah sal dingin kang kai ding hi, ama’ min Vanglien Pasien TOPA in ci hi.