Read Zou AMOS 6 Bible Online

AMOS 6 - Zou bible

AMOS 6

¹Zion ah nuomtaha a tengte, Samaria Muol tungah lungmuonga a omte, minamte’ ulien pente, Israel innkuonte’ muon le suonte, gimna thuoh man va uciei!

²Calneh ah galkai-in va en ta un; khum panin khuopi lien Hamath ah va pei un; tua ciengin Philistia gam Gath ah peisuh un. Tua kumpi gamte sangin note na hoizaw[22] uh amah? Ahi sihle note’[23] leitang sangin amau’[24] leitang a hoizaw amah?

³Sietna ni ang tun ding gamlapi-a a khinto note aw, tatsietna ang tun ding hun na naisah uh amah?

⁴Saiha lupna tunga a lum, a lupna tung vua a lum hit hiette, tuuhon lahah tuuno sa le bawnghon lahah bawngno sa deih zaza a ne mite;

⁵David bangin tumging tumin, harp tawh langui a sa mite;

⁶nohai golpite tawh zu dawn a, sathau hoipente tawh amau le amau kinoi-in, hizongle Joseph’ kisietna thu-ah a dapi lo note in gimna thuoh man va uciei!

⁷Tua ahi ziehin tu-in amate khu sala pei masa pente ahi ding vua, a thada mite’ guolnopna a tawpmang ta ding hi.

⁸TOPA Pasien ama le ama kiciem zo hi, (TOPA, Vanglien Pasien in tam bangin ci hi): Keima in Jacob’ kiphatsahna ka huo a, a mun muonhuoite ka muda hi; tua khuopi le a sunga om zosie mi khut sungah ka pie ding hi.

⁹Inn khat sungah mi sawm a op lai uleh amate a si ding uhi.

¹⁰Tuale misi[25] a hal a sanggam pa khat in inn sung panin tua siluong ladawhin puo ding a, inn dan sungta pena a om pa khat kungah, “Na oppi uh midang a om lai ei?” ci ding a, “Om sih,” ci-in kidawng ding hi. Tua ciengin tua a sanggam pa[26] in, “Ham sih vawi! Eite in TOPA’ min lo kha vawt sih vai,” a ci ding hi.

¹¹En un, TOPA in thu pie a, inn golpi kisatguoi-in inn neute kisatzan ding hi.

¹²Suong tungah sakolte a tai ngel amah? Mi khat in bawngtangte[27] tawh tuipi a hlo amah? Hinanle note in thutang, gu na suohsah ta vua, dihna, gamsai na suohsah ta uhi.

¹³Lo-debar khuo[28] ah guolnuomin, “Eite in eima adingin i thahatna utawh Karnaim[29] i lah uh hi lo amah?” a ci uhi.

¹⁴Israel innkuonte aw, ang do dingin minam khat ka khangsah valon ding hi, Vanglien Pasien, TOPA in ci hi. Amate in Lebo-hamath panin Arabah Lui dongin note ang gawt ding uhi.