Read Zou AMOS 8 Bible Online

AMOS 8 - Zou bible

AMOS 8

¹TOPA Pasien in keima ei lah khu tami ahi hi. Khal singga bawng khat ahi hi.[33]

²Ama in, “Amos aw, bang na mu ei?” ei ci hi. Keima in, “Khal singga bawng khat,” ka ci hi.[34] Tua ciengin TOPA in keima kungah, “Ka mi Israel-te tungah tawpna hun[35] a tung zo hi; amate dan ka pieh ding ka khelkia ngai nawn sih ding hi.

³Tua ni-in biehinn[36] sunga la kisate kaala a suoh ding hi, TOPA Pasien in ci hi; “Misi luong tam ding a, mun zosie-ah kipaithang ding hi. Gamdai un!” a ci hi.

⁴Tasamte tuoncilin gam sung mizawngte a suhsiet sawmte aw,

⁵“I an uh i zua thei nadingin bang hun ciengin hla tha tawp ding a; i mangbu uh i zua thei nadingin bang hun ciengin sabbath tawp ding ahei? Antena ephah neusahin, shekel i golsah ding uhi. A man lo tawisuong tawh i zuou gamtat ding vua,

⁶ngun tawh mizawngte lei-in kedap bukhat tawh tasam liengvaite i lei ding a, a kisu lo mangbu site i zua ding uhi,” a ci note aw, tam thu za vawi un.

⁷Jacob’ kiphatsahna tawh TOPA a kiciem hi: A tahtahin amau’ nasepte ka mangngil ngai sih ding hi.

⁸Tami ziehin lei kiling loin a sunga a teng zosie kapin, tuate a unpi-un Nile gun bangin khang a, tui tungah lam kawikawi-in, Egypt gama Nile gun bangin kiemsuhkia lo ding uh amah?

⁹Khum ni ciengin keima in sunkim laipi-in ni ka tumsah ding a, sunkim laipi ma-in khuo ka mielsah ding hi. TOPA in ci hi.

¹⁰Na biehna pawite uh dana ka suohsah ding a, na lasahte zosie uzong kaana ka suohsah ding hi; mi zosie in a kawng vuah la-ip puon gahsahin, lutang a kici zosie ka heukieusah ding hi; tapa khat neisun a si zieha kikaana ka bangsah ding a, a tawpna khu genthei ni ka hisah ding hi.

¹¹Gam sungah kielpi ka tunsah ding hun ang tung valon ding hi, TOPA Pasien in ci hi; tua khu an le tui dugawna kielpi hi loin, TOPA’ thu zahnopna kielpi hizaw ding hi.

¹²Tuipi khat pan tuipi khat, leilu panin nisuona dong amate a vah kawikawi ding uhi; ahi vangin amate in a mu zo sih ding uhi. TOPA’ thu kanin a tai kawikawi ding vua, ahi vangin amate in a mu sih ding uhi.

¹³Khum ni ciengin ngahnu melhoite le tangvalte dangta-in a husam ding uhi.

¹⁴Samaria’ pasien Ashimah minin kiciem a, “Dan aw, na pasien pen a hing zing ahi ma bangin,” a cite le “Beer-sheba lampi a hing zing ahi ma bangin,” a ci amate a pua ding vua, a thokia nawn sih ding uhi,” a ci hi.