Read Zou JONAH 1 Bible Online

JONAH 1 - Zou bible

JONAH 1

¹Tu-in Amittai’ tapa Jonah kungah TOPA’ thu tung a,

²“A lien mama Nineveh khuopi ah tu mama-in va pei ta’nlen, tua khuopi langkhatah va tangko in; azieh pen ka mai-ah a gitlona uh ang tungto ta hi,” a ci hi.

³Ahi vangin TOPA opna panin Tarshish lamah a taimang dingin Jonah a dingkhie hi. Joppa lamah ama peisuh a, Tarshish a zuon ding tembaw khat mu hi; tuaci’n ama in tembaw sap pie-in a tungah kato a, TOPA kung panin a taimang dingin amate tawh Tarshish khuo ah a pei hi.

⁴Hinanle TOPA in tuipi tungah huipi hat mama khat langsah a, tua a gimnei huipi in tuipi a nawh ziehin tembaw a sie dingin a kisa hi.

⁵Tua ciengin tembaw nasemte zau-in a pasien kung ciet vuah a kiko uhi. Amate in tembaw a zan tuom nadingin tembaw sunga a om vante tuipi sungah a pai uhi. Khum hun laitahin tembaw sung inndan neita penah Jonah kumsuh a, tuale na lumin na kimu hit hiet hi.

⁶Tembaw uhpa pei-in ama kungah, “Bangci banga hici kimut ziuzieu thei na hei? Tho inlen, na pasien kungah thu ngen ven! Tua pasien in eite si loin i suotah thei nadingin ei ngaisutpieh maw lo ding hi,” a ci hi.

⁷Tembaw nasemte[1] in, “Hing pei un, koi zieha tami tuosietna hing tung ahei, ci i thei nadingin ai san vai,” ci-in khatlekhat kiho uhi. Tuaci’n amate in ai a san ule Jonah tung a tu hi.

⁸Tua ciengin amate in a kungah, “Bang zieha tam bang tuosietna eite tunga hing tung ahei, ei gen in. Nang bang sem na hei? Hei pana hing pei na hei? Na gam bang ahei? Nang koi minam na hei?” a ci uhi.

⁹Ama in, “Kei Hebrew mi ka hi a, tuipi le leigaw a bawl vantung’ Pasien ahi TOPA ka bie hi,” ci-in a dawng hi.

¹⁰Tua ciengin tua mite a zau zawkan lai vua, ama kungah, “Ta na bawl khu bang ahei!?” a ci uhi. Bangzieh ahei cile TOPA opna pana a tai ahi lam a gensa ahi ziehin amate in a thei zo ta uhi.

¹¹Tua ciengin amate in ama kungah, “Eite ading tuipi a dai thei nadingin bang kang law ding vuoi?” a ci uhi. Bangzieh ahei cile tuipi ah huipi hat semsem hi.

¹²Ama in amate kungah, “Ei domto unlen tuipi sungah ei pai un; tua ciengin note adingin tuipi ang dai pai ding hi; azieh pen note tungah tami huipi gimnei ang lanna pen keima zieh ahi, ci ka thei hi,” a ci hi.

¹³Ahi vangin tua mite in lei lamah tembaw a kinuale thei nadingin nahpitahin a hot paupau uhi, hizongle amate langkhatah tuihuol hat semsem ahi ziehin a hotzo sih uhi.

¹⁴Tua ciengin amate TOPA kungah kiko-in, “TOPA aw, kang thum uhi, tam mipa sina ziehin kote ei mangthaisah sin, ci-in kang thum uhi. Maw nei lo mi khat’ sisan luonna ziehin mawna ei puosah sin; azieh pen TOPA aw, na lungkimna banga na bawl ahi hi,” a ci uhi.

¹⁵Tuaci’n amate in Jonah domto-in tuipi sungah a khiesuh uhi; tuale tuipi kilawh vapualpi a dai pai lien hi.

¹⁶Tua ciengin mite in TOPA a giing zawkan lai vua, TOPA tungah biehnate pie-in kiciemna a nei uhi.

¹⁷[2] Ahi vangin Jonah valtum dingin TOPA in nga golpi khat a pie hi; tuale ngapi gil sungah Jonah ni thum le zan thum sung a om hi.