Read Zou JONAH 2 Bible Online

JONAH 2 - Zou bible

JONAH 2

¹Tua ciengin Jonah in ngapi gil sung panin TOPA a Pasien kungah thu ngen a,

²ama in “Ka cimawna panin TOPA ka hlan a, ama in kei ei dawng hi; Misikhuo’ gilpi sung panin ka kiko a, ama in ka aw ei za hi.

³Tuipi thuh a laikim tahah kei nei sepdawh a, tuikhang in kei ei kimkot hi; na tuihuol zosiete le na tui kilawhte in ka tungah ei viel hi.

⁴Tua ciengin keima in, ‘Na opna panin ei kinotmang hi; na biehinn siengtho kang bangci[3] nua-etkia thei ding ahei?’ ka ci hi.

⁵Ka tungah tui in ei tuomcip hi; tuili thuh in ei imtawm hi; ka lu kimvelah tuipi lopate in kei ei vielcip ta hi.

⁶Muolsang bulte ah ka kumsuh a, kumtawnin kot ei khalu thei kotgolh a nei gam sungah ka va kumsuh ta hi; hizongle TOPA ka Pasien aw, tua Leihawmpi sung panin nang in ka hinna nei hunkhie hi.

⁷Ka lung a kieh ciengin TOPA ka phawh hi; tuale na biehinn siengtho sung nangma kungah ka thungetna ang tung hi.

⁸Kimanna a nei lo milim biete in amau’ dihtatna a nuasie uhi.

⁹Ahi vangin keima lungdam kona tawh nangma kungah biehpiehnate ka pie ding hi; ka kiciemnasa ka tangtun ding hi. Tatkhietna TOPA-a’ ahi hi!” a ci hi.

¹⁰Tua ciengin TOPA in ngapi hopi a, tuale ama in leigaw tungah Jonah a luokhie hi.