Read Zou JONAH 3 Bible Online

JONAH 3 - Zou bible

JONAH 3

¹Jonah kungah a niveina TOPA’ thu tung a,

²“Tho inlen khuopi lien Nineveh ah pei-in, tua khuopi ah na kunga kang gensa thu va tangko in,” a ci hi.

³Tuaci’n TOPA’ kammal dung zui-in Jonah kuonin Nineveh khuopi ah a pei hi. Nineveh khuo pen khuopi lien mama khat hi a, keng tawh ni thum sung kikantan khop hi.

⁴Khuopi sunga lut dingin Jonah kipan a, ni khat sung lam a pei hi. Tuale ama in, “Ni sawmli zaw ciengin Nineveh khuopi kisusie ding hi,” ci-in a kiko hi.

⁵Tuale Nineveh khuomite in Pasien a um uhi; amate in antan ding thu tangko-in, mi zosie, a neu a lienin la-ip puon a sil uhi.

⁶Nineveh khuo kumpipa in tua thu a zah ciengin a kumpi topha panin dingin a puontuol sutdawh a, ama le ama in la-ip puon silin vut lahah a to hi.

⁷Tua ciengin ama in Nineveh khuopi sungah tangtawhna khat a bawl hi: “Kumpipa le a miliente thukhenna dung zui-in: Mihing ahi a, ganhing ahi zongin, bawnghon ahi a, tuuhon ahi zongin, koima in bangma kici khat zong ciem thei lo ding hi. Amate in an ne loin tui zong a dawn sih ding uhi.

⁸Mihingte le ganhingte in la-ip puon silin Pasien kungah nahpi-in a kiko ding uhi. A gitlo gamtatnate ule a khut utawh a bawl uh tatsietnate panin mi zosie a kihei ding uhi.

⁹Eite i manthai lo nadingin Pasien in a lungsim khelin a lungsona panin a kihei sih ding hi, ci koi in thei ahei?” a ci hi.

¹⁰Amau’ sepnate le a gitlo gamtatnate uh panin a kiheina uh Pasien in a mu bepin, amate tungah a tung dinga a gensa sietna tunsah lo dingin a lungsim a khelkia hi; tuale ama in tua sietna a tungsah nawn sih hi.