Read Zou JONAH 4 Bible Online

JONAH 4 - Zou bible

JONAH 4

¹Ahi vangin tam thu in Jonah lungkimsah lo a, ama a lungthah hi.

²Ama in TOPA kungah thungen a, “Aw TOPA! Ka gama ka oplai-a ka thugen tami hi lo amah? A kipat cil panin Tarshish khuopi-a ka taisimna zong tami zieh ma ahi hi. Bangzieh ahei cile nang pen mi hepi thei le mi khuotuo siem, a lungduoi, le itna kip tawh a kidim, dan pieh lo nading lungsim khelin a baisa-a a om Pasien na hi, ci kang thei hi.

³Tu-in, “TOPA aw, keima kung panin ka hinna ei la ta’n, azieh pen ka hin sangin si leng kei adingin a phazaw hi,” a ci hi.

⁴Tuale TOPA in, “Na lungthah khu man na sah ma amah?” a ci hi.

⁵Tua ciengin khuopi pulamah Jonah pusuohin ama adingin tua munah buhno khat a lam hi. Tua khuopi bang ang ci mawngmawng ei mah, ci-in a en dingin tua buh hlim nei-ah ama to-in a ngah hi.

⁶TOPA Pasien in sawlbawh[4] khat bawl a, a lutunga a hlim ding, a lungkhamna a damsah dingin tua sawlbawh in Jonah lutung a khusah hi; tuaci’n khumi sawlbawh ziehin Jonah a lungdam mama hi.

⁷Ahi vangin zingmawng khuo a vah ciengin Pasien in tua sawlbawh a vulgawp nadingin lungno khat in a susiesah hi.

⁸Ni a suo ciengin Pasien in nisuona lam huisa langsah a, ni in Jonah’ luzang a kapsuh ziehin basamin si ding a ngen hi. Ama in, “Ka hin sangin si leng kei adingin pha tazaw va,” a ci hi.

⁹Ahi vangin Pasien in Jonah kungah, “Sawlbawh tungtang na lungthah khu man na sa amah?” a ci hi. Tuale ama in, “Man sa na’ng, si nading khopin ka lungthah hi,” a ci hi.

¹⁰Tua ciengin TOPA in, “Na gimpi vawt lo le na khansah thei vawt lo, zankhat thu-a ang po, zan khat thu ma-a a mangthaikia tua sawlbawh khat pamai nasa hi.

¹¹Tuale keima in a sunga a zietlam le a veilam zong a khen thei lo mi tulza le tul sawmni val a opna le ganhing tampite a opna Nineveh khuopi lien khu pamaisa loin ka om ding amah?” a ci hi.