Read Zou GAMLAH VANA 1 Bible Online

GAMLAH VANA 1 - Zou bible

GAMLAH VANA 1

¹Amate, Egypt gam pan a pei zaw uh a kum nina, a hla nina a ni masa ni-in, Sinai senel gam kikhopna puonbuh sungah TOPA in Moses hopi-in tam bangin a gen hi:

²Israel mihon buppi, a be a phung sung vuah pupa innkuon zui-a min om bangin pasal poma a milipin a phaza sim in;

³Israel sungah kum sawmni pan a tungsie paltan tum thei ding mi poma a phaza sim in. Nang le Aaron in a pawlpawlin a min uh na khum ding uhi.

⁴A minam ciet panin pasal khat ciet, a pupa innkuon lutang pen ciet in ang hu ding uhi.

⁵Note ang hu dingte’ min tam teng ahi hi: Reuben panin, Shedeur’ tapa Elizur;

⁶Simeon panin, Zurishaddai’ tapa Shelumiel;

⁷Judah panin, Amminadab’ tapa Nahshon;

⁸Issachar panin, Zuar’ tapa Nethanel;

⁹Zebulun panin, Helon’ tapa Eliab;

¹⁰Joseph’ tapate: Ephraim panin, Ammihud’ tapa Elishama; Manasseh panin, Pedahzur’ tapa Gamaliel;

¹¹Benjamin panin, Gideoni’ tapa Abidan;

¹²Dan panin, Ammishaddai’ tapa Ahiezer;

¹³Asher panin, Ochran’ tapa Pagiel;

¹⁴Gad panin, Deuel’ tapa Eliasaph;

¹⁵Naphtali panin, Enan’ tapa Ahira ahi hi,” a ci hi.

¹⁶Tam teng pen mihonpi sung pana a kiteel amau’ be lutangte, a pawlpawla a kikhen Israel-te lutangte ahi hi.

¹⁷Moses le Aaron in a min kilosa tam mite a zawpi vua,

¹⁸a hla nina, a ni masa ni-in Israel mihonte a kaikhawm uhi. Amate in a be sung vuah a pupa innkuon zui-a min om bangin a milipin kum sawmni pana tungsie mite’ min a khum vua,

¹⁹TOPA in Moses a thupieh bangin ama in Sinai senel gamah amate a phaza a sim hi.

²⁰Israel’ tapa tapen Reuben’ suonlehlahte panin amau’ pienna gui, amau’ be sungah amau’ pupa innkuon zui-a min om bangin a milipin kum sawmni pan a tungsie paltan tum thei ding pasal poma:

²¹Reuben’ minam lahah a kiciemte mi phaza pen tul sawmli le tulguh le zanga ahi hi.

²²Simeon’ suonlehlahte panin amau’ pienna gui, amau’ be sungah amau’ pupa innkuon zui-a min om bangin a milipin kum sawmni pan a tungsie paltan tum thei ding pasal poma:

²³Simeon’ minam lahah a kiciemte mi phaza pen tul sawmnga le tulkuo le zathum ahi hi.

²⁴Gad’ suonlehlahte panin amau’ pienna gui, amau’ be sungah amau’ pupa innkuon zui-a min om bangin a milipin kum sawmni pan a tungsie paltan tum thei ding pasal poma:

²⁵Gad minam lahah a kiciemte mi phaza pen tul sawmli le tulnga le zaguh sawmnga ahi hi.

²⁶Judah’ suonlehlahte panin amau’ pienna gui, amau’ be sungah amau’ pupa innkuon zui-a min om bangin a milipin kum sawmni pan a tungsie paltan thum thei ding pasal poma:

²⁷Judah minam lahah a kiciemte mi phaza pen tul sawmsagi le tulli le zaguh ahi hi.

²⁸Issachar’ suonlehlahte panin amau’ pienna gui, amau’ be sungah a pupa innkuon zui-a min om bangin a milipin kum sawmni pan a tungsie paltan tum thei ding pasal poma:

²⁹Isaachar’ minam lahah a kiciemte mi phaza pen tul sawmnga le tulli le zali ahi hi.

³⁰Zebulun’ suonlehlahte panin amau’ pienna gui, amau’ be sungah amau’ pupa innkuon zui-a min om bangin a milipin kum sawmni pan a tungsie paltan tum thei ding pasal poma:

³¹Zebulun’ minam lahah a kiciemte mi phaza pen tul sawmnga le tulsagi le zali ahi hi.

³²Joseph’ suonlehlahte panin amau’ pienna gui, amau’ be sungah amau’ pupa innkuon zui-a min om bangin a milipin kum sawmni pan a tungsie paltan tum thei ding pasal poma:

³³Joseph’ minam lahah a kiciemte mi phaza pen tul sawmli le zanga ahi hi.

³⁴Manasseh’ suonlehlahte panin amau’ pienna gui, amau’ be sungah amau’ pupa innkuon zui-a min om bangin a milipin kum sawmni pan a tungsie paltan tum thei ding pasal poma:

³⁵Manasseh’ minam lahah a kiciemte mi phaza pen tul sawmthum le tul ni le zani ahi hi.

³⁶Benjamin’ suonlehlahte panin amau’ pienna gui, amau’ be sungah amau’ pupa innkuon zui-a min om bangin a milipin kum sawmni pan a tungsie paltan tum thei ding poma:

³⁷Benjamin’ minam lahah a kiciemte mi phaza pen tul sawmthum le tul nga le zali ahi hi.

³⁸Dan’ suonlehlahte panin amau’ pienna gui, amau’ be sungah amau’ pupa innkuon zui-a min om bangin a milipin kum sawmni pan a tungsie paltan tum thei ding pasal poma:

³⁹Dan’ minam lahah a kiciemte mi phaza pen tul sawmguh le tul ni le zasagi ahi hi.

⁴⁰Asher’ suonlehlahte panin amau’ pienna gui, amau’ be sungah amau’ pupa innkuon zui-a min om bangin a milipin kum sawmni pan a tungsie paltan tum thei ding pasal poma:

⁴¹Asher’ minam lahah a kiciemte mi phaza pen tul sawmli le tulkhat le zanga ahi hi.

⁴²Naphtali’ suonlehlahte panin amau’ pienna gui, amau’ be sungah amau’ pupa innkuon zui-a min om bangin a milipin kum sawmni pan a tungsie paltan tum thei ding pasal poma:

⁴³Naphtali’ minam lahah a a kiciemte mi phaza pen tul sawmnga le tul thum le zali ahi hi.

⁴⁴Tam teng pen Israel’ makai sawm le nite panpina tawh Moses le Aaron in amau’ innkuon ciet tanga a na sim uh mite ahi hi.

⁴⁵Tuaci’n Israel gam sungah amau’ pupa innkuon zui-a kum sawmni pan a tungsie paltan kuon thei ding Israel-te mi phaza buppi-

⁴⁶tul zaguh le tulthum le zanga le sawmnga ahi hi.

⁴⁷Hinanle amau’ pupa minam min zui-in Levi-te pen amate tawh kisimton lo hi.

⁴⁸TOPA in Moses kungah a gen zo hi:

⁴⁹Levi minamte beh na ciemte sih ding a, amate pen adang Israel-te tawh na simton sih ding hi.

⁵⁰Thuciemna[1] biehbuh le a sunga vanzah zosie, le tua tawh kisai na zosie a uh dingin Levi-te na sezaw ding hi; amate in biehbuh le a sunga vanzah zosie puo-in biehbuh kemcingin, biehbuh kimvelah phuol sat ding uhi.

⁵¹Biehbuh a kituo ding ciengin Levi-te in a phet ding uhi; biehbuh a kilam ding ciengin zong Levi-te ma in lam ding uhi. A kunga a pei a pulam mi khat popo kithat ding hi.

⁵²Adang Israel-te pen amau’ galphuol cietah a pawlpawlin phuol sat ding uhi;

⁵³hinanle Israel mihonpite tungah lungthahna a tun lo nadingin Levi-te in thuciemna[2] biehbuh kimkotah phuolsat ding uhi; tuale Levi-te in thuciemna[3] biehbuh cin ding tavuon la ding uhi.

⁵⁴Tua bangin Israel-te a gamta uhi; amate in TOPA in Moses a thupieh bangin a sem uhi.