Read Zou GAMLAH VANA 10 Bible Online

GAMLAH VANA 10 - Zou bible

GAMLAH VANA 10

¹TOPA in Moses hopi-in tam bangin a gen hi:

²Ngun pengkul ni bawl in; tuate na bawl ciengin na kheng ding a, mipite khop nading le giephuol phel nadingin tuate na zang ding hi.

³A ni-in a kimuton ciengin kikhopna puonbuh lutna nangma mai-ah mihon buppi kikhawm ding uhi.

⁴Hinanle khat beh a kimut leh nangma mai-ah Israel minamte’ lutang ahi makaite kikhawm ding uhi.

⁵Patau pengkul na mut ciengin nisuona lam panga giephuol-ate dingkhie-in;

⁶patau pengkul a ni veina na mut ciengin leitaw lama giephuol-ate dingkhie ding uhi. Amate a dinkhiet ding poma ciengun patau pengkul kimut ding hi.

⁷Ahi vangin mihonpi a kikaikhop ding ciengin pengkul na mut ding a, hizongle patau pengkul na mut sih ding hi.

⁸Aaron’ tapa siempute in pengkul a mut ding uhi; tami khu note dinga na khang tawntung vua a kipden ngaina khat hi ding hi.

⁹Na gam sung vuah note ang gawt na galte do dinga na kuon ciengun, TOPA na Pasien uh mai-ah ang kiphaw nadingin pengkulte tawh patauna aw na gingsah ding vua, tuaci’n na galte khut uh sung panin ang kihundam ding hi.

¹⁰Na lungdam hun uh, a kise na pawi hunte uh, na hla kipat hunte uh, na meihal biehnate ule na thunuom biehpiehnate vuah zong pengkulte na tum ding uhi; tuate pen na Pasien uh mai-ah note phawna-in kimang ding hi: Keima TOPA na Pasien uh ka hi hi.

¹¹A kum nina, a hla nina, a ni sawmnina ni-in thuciemna[33] biehbuh tung son panin meii kilato hi.

¹²Tua ciengin Sinai senel gam panin phuol khat pan phuol khatah Israel-te a dingkhie vua, tuaci’n Paran gamlahah meii a khawl hi.

¹³Moses tungtawnin TOPA’ thupiehna tawh amate a khat veina khuolzin a kipan uhi.

¹⁴Judah giephuol dielkhai neite a pawlpawlin a dingkhie masa vua, Amminadab’ tapa Nahshon in mihon buppi a makai hi.

¹⁵Zuar’ tapa Nethanel in Issachar minam honpite makai hi;

¹⁶Helon’ tapa Eliab in Zebulun minam honpite makai hi.

¹⁷Biehbuh a kiphel ciengin biehbuh a puo Gershon-te le Merari-te a dingkhie uhi.

¹⁸A zomah Reuben-te’ giephuol dielkhai neite a pawlpawlin a dingkhie uhi; tuale Shedeur’ tapa Elizur in tua mihon buppi a makai hi.

¹⁹Zurishaddai’ tapa Shelumiel in Simeon minam honpite a makai a,

²⁰Deuel’ tapa Eliasaph in Gad minam honpite a makai hi.

²¹Tua ciengin a siengtho nate a puo Kohath-te a dingkhie uhi; amate tun masangin biehbuh na kiphut zo hi.

²²A zomah Ephraim-te’ giephuol dielkhai neite a pawlpawlin a dingkhie vua, Ammihud’ tapa Elishama in tua mihon buppi a makai hi.

²³Pedahzur’ tapa Gamaliel in Manasseh minam honpite a makai a,

²⁴Gideoni’ tapa Abidan in Benjamin minam honpite a makai hi.

²⁵Tua ciengin giephuol zosie’ nuadala a pang Dan mite’ giephuol dielkhai neite a pawlpawlin a dingkhie vua, Ammishaddai’ tapa Ahiezer in tua minam honpite a makai hi.

²⁶Ochran’ tapa Pagiel in Asher minam honpite a makai a,

²⁷Enan’ tapa Ahira in Naphtali minam honpite a makai hi.

²⁸Tam pen Israel-te a dinkhiet cieng vua a pawlpawla a pei dan uh ahi hi.

²⁹Moses in a sungpa Midian mi Reuel’ tapa Hobab kungah, “TOPA in, ‘Na tung vuah kang pie ding hi,’ a cina mun zuona pei ding ka hi uhi. Hing pei inlen ko tawh zawhton vai, nang kang limbawl ding uhi; azieh pen TOPA in Israel-te tungah sil hoi pieh ding ei kamciem zo hi,” a ci hi.

³⁰Ahi vangin ama in, “Kang pei sih ding hi. Ka leitang le ka tanaute kungah ka pei zaw ding hi,” a ci hi.

³¹Ama in, “Kote ei taisan sin. Azieh pen gamlahah giephuol sat nading mun na thei ziehin ka lampu ding uh na hibo hi,” a ci hi.

³²Tua banah kote ei zui lacin, TOPA in ka tung vua a sep sil hoi poma kote tawh kibangin kang bawlpieh ding uhi,” a ci hi.

³³Tuaci’n TOPA’ muol panin amate dingkhie-in ni thum peina khuol a zin vua, khawl mun sui dingin a masang vuah TOPA’ thuciemna singkuong, nithum lam na peikhol hi.

³⁴Giephuol pan amate a dinkhiet ciengun sunin a tung vuah TOPA’ meii a om hi.

³⁵Singkuong a dinkhiet popo ciengin Moses in, “TOPA aw, tho-in, na galte kithezah hinlen, nang ang mudate na mai panin taimang ta uheh,” a ci hi.

³⁶A khawl popo ciengin ama in, “TOPA aw, Israel a tul a tul sawmte kungah hing kinuale in,” a ci hi.[34]