Read Zou GAMLAH VANA 12 Bible Online

GAMLAH VANA 12 - Zou bible

GAMLAH VANA 12

¹Hazeroth-ah amate a ten laita hun Moses in Cush numei khat kinunpi ahi ziehin a kinunpi Cush numei tungtangah Miriam le Aaron in ama gensie hi;

²tuale ama gel in, “ Moses tungtawn beha TOPA in thu gen ahi amah? Eite tung zong tawnin thu gen hi lo amah?” a ci uhi. TOPA in tua thu a za hi.

³Tu-in Moses kici pa pen leitunga om mi zosie sangin mi nunnem[40] zaw ahi hi.

⁴TOPA in thakhatthu-in Moses, Aaron le Miriam kungah, “Kikhopna puonbuhah no teng thum hing pei un,” a ci hi. Tuaci’n a thumun a pei uhi.

⁵Tua ciengin meii lahah TOPA kumsuhin kikhopna puonbuh lutna ah dingin Aaron le Miriam hlan hi; tuale ama gel zong mai lamah a pei uhi.

⁶Ama in ama gel kungah, “Ka thugente ngai un: Na lah vuah kamsangte a op ciengin, keima TOPA in mangmunate tawh a tung vuah keima le keima ka kitheisah a; mang sungah zong amate ka hopi hi.

⁷Ka nasem Moses tawh tua bang ahi sih a; ka inn sung thu vannuoi ama ki-ap sieng ahi hi.

⁸Keima in ama tawh kimaituo-in thu ka gen a, a kitel lo kamham tawh hi loin; a kiteltahin ka hopi a, tuaci’n ama in TOPA’ mel a mu hi. Tua ahile bang dinga ka nasempa Moses gensiet ding zau lo na hi uh ahei?” a ci hi.

⁹Ama gel tungah TOPA’ lungthahna kuongin a pei ta hi.

¹⁰Puonbuh tung panin meii a pei ciengin Miriam phah[41] a, vua bangin a ngo hi. Miriam lamah Aaron a kihei leh tua numei a phah lam a mu hi.

¹¹Tua ciengin Aaron in Moses kungah, “Ka pu aw, ka mot gamtat zieh vua ka bawl uh mawna ziehin kote[42] dan ei pie sin.

¹²Ama a nu gilsung pan a suo cienga atel avo alang beisa-a suoh nausen hing bangsah sin,” a ci hi.

¹³Tuale Moses in TOPA kungah, “Ama damsah in, Pasien aw, hing thum ing,” ci-in a kiko hi.

¹⁴Ahi vangin TOPA in Moses kungah, “A pa in tua numei’ maitang cilphit leh tua numei ni sagi sung zumsi lo ding amah? Ni sagi sung giephuol pulamah ama puse inlen, tua zaw ciengin ama kipeipi kia thei ding hi,” a ci hi.

¹⁵Tuaci’n giephuol pulamah ni sagi sung Miriam kipuse hi; tuale Miriam a kipeipi masangsie khuolzin zom dingin mite a dingkhie sih hi.

¹⁶Tua zaw ciengin Hazeroth panin mite a dingkhie vua, Paran gamlahah giephuol a sat uhi.