Read Zou GAMLAH VANA 14 Bible Online

GAMLAH VANA 14 - Zou bible

GAMLAH VANA 14

¹Tua ciengin mihon zosie khum zanin kiko-in a kap vapo uhi.

²Tuale Israel-te zosie in Moses le Aaron a phunsan vua, mihon buppi in a kung vuah, “Egypt gamah kisi dawh ta lei izaw! Ahi sihle tami gamlahah kisi dawh ta lei izaw!

³Bang dinga TOPA in tami gamah namsau-a si dinga ei na peipi a ta diei? Ka zite ule ka nausente uh lah galte’ hingmat ding bep ahi ta uhi; Egypt gamah kilekia uleng hoizaw lo ding amah?” a ci uhi.

⁴Tuaci’n amate khatlekhat a kiho vua, “Makai khat tel vai-in, Egypt-ah kilekia vai,” a kici uhi.

⁵Tua ciengin a kikhawm Israel mihonpi zosie’ mai-ah Moses le Aaron a khupboh uhi.

⁶Tuale gam vante lahah a kihal Nun’ tapa Joshua le Jephunneh’ tapa Caleb in a puonte a botkeh vua,

⁷Israel mihon buppi kungah, “A van dinga ka va peina uh gam pen a hoi mama gam khat ahi hi.

⁸Eite tunga TOPA a lungkim leh bawngnawi le khuoizu luonna khum gamah ei peipi-in khum gam ei pie ding hi.

⁹TOPA langpan sih popo unlen; tua gama mite giing sih un, azieh pen eite dingin amate pen i neh ding uh an ahi bo uhi; a kung panun a kidalna uh kiladawh ahi ta a, TOPA in eite ei ompi hi; amate giing sih un,” a ci uhi.

¹⁰Ahi vangin mihon buppi in suong tawh selia dingin amate a galgih uhi. Tua ciengin kikhopna puonbuh sunga om Israel mi zosie tungah TOPA’ minthanna a kilang hi.

¹¹TOPA in Moses kungah, “Tam mite in bang tanvei kei ei simmaw ding uh ahei? Amate lahah ka bawlsa limte om napi bang tanvei kei ei um lolai ding uh ahei?

¹²Pul natna tawh amate vatmai-in tapa’ za panin ka phiet ding a, amate sanga a lienzaw le a thahatzaw minamin nangma kang bawl ding hi.

¹³Ahi vangin Moses in TOPA kungah, “Tua hi mawh leh Egypt-te in tua thu a na za ding uhi. Azieh pen nangma in amate lah panin na thahatna tawh tam mite na peipi ahi a,

¹⁴amate in tam gam mite kungah tua thu a na gen ding uhi. TOPA aw, amate in tam mite laizangah na om lam za zo uhi; bang ding ahei cile TOPA aw, kimaituo-in nang ang kimu a, amate tungah nangma’ meii zamin sun ciengin meiilumin, zan ciengin meikuongin a masang vuah na pei hi.

¹⁵Tu-in tam mite a unpi-un tha khatin that sieng mawh lacin nangma’ thu a zasa minamte in,

¹⁶‘Amahaw tunga pieh dinga a kamciemsa leitangah TOPA in tam mite tut zo lo ahi ziehin ama in gamlahah amate thatgam ta hi,’ ci ding uhi.

¹⁷Tua ahi ziehin tu-in nangma in hopi-in na kam ciem a,

¹⁸‘TOPA lungthah bai loin, a itna kip kicing a, mawna le khielnate maisahin, hinanle a mawte siengsah loin, pate’ mawna tate tungah, khang thum khang lina dongin thuh hi,’ na ci ciengin TOPA a vang lien taheh.

¹⁹Egypt gama a peikhiet vua kipan tu dong nangawnin tam mite’ khielna na maisah ma bangin a lien mama na itna kip dung zui-in tam mite’ khielna maisah in,” a ci hi.

²⁰Tua ciengin TOPA in, “Na nget bangin ka maisah hi;

²¹hinanle - kei ka nungta a, TOPA’ minthanna khu leitung kidim ding ahi ma bangin-

²²Egypt le gamlahah ka bawlsa ka vanglietna le ka limte mu zo napi-in keima sawmvei ei ze-etin ka aw a ngai lo mite in,

²³a pate uh tunga pieh dinga ka ciem leitang koima in a mu sih ding uhi; keima ei simmaw mi koima khat beh in tua leitang a mu sih ding uhi.

²⁴Ahi vangin ka nasempa Caleb in lungsim tuom a puo a, lungsim tahpi tawh keima ei zui ahi ziehin a va peina gamah ama ka peipi ding a, a suonlehlahte in tua gam a luo ding uhi.

²⁵Tu-in khum kuom tengah Amalek-te le Canaan-te a ten ziehun zing ciengin kihei-in San Tuipi[44] zotna lampi zui-in gamlahah pei un,” a ci hi.

²⁶TOPA in Moses le Aaron hopi-in ama gel kungah tam bangin a gen hi:

²⁷“Tam a gilo mihonte in bang tanvei kei ei mawsah ding uh ahei? Keima in Israel-te’ ei mawsahna ka za zo hi.

²⁸Amate kungah gen in: TOPA in, “Kei a nungta ka hi ma bangin tua na thugente ma uh na tung vuah kang bawl ding hi,” ci hi.

²⁹Tami gamah na luonghawmte uh lum ding hi; na mi phaza zosie uh, mi kisimna sunga kihal teng, pasal kum sawmni pana tungsie, kei ei phunsante,

³⁰Jephunneh’ tapa Caleb le Nun’ tapa Joshua simlo, na tenna ding vua ka kiciemna leitangah khat beh na tung sih ding uhi.

³¹Ahi vangin galte mat ding na ci uh na tasente uh ka peipi ding a, amate in na thusim lo uh leitang a thei ding uhi.

³²Ahi vangin note na hi uleh tami gamlahah na luong uh a lum ding hi.

³³Anukhia pen gamlahah na luonghawm uh a kisiel masang, gamlahah na tate uh kum sawmli sung tuucing ahi ding vua, na up lona ziehun amate in gimna a thuoh ding uhi.

³⁴Note in na gam van sung ni phaza tawh kizui-in ni sawmli, ni khat ciengin kum khat, na khielna uh kum sawmli sung na thuoh ding vua, ka lungkimlona na thei ding uhi,’ a ci hi.

³⁵Keima TOPA in ka gen zo hi; kei ei do dinga kikhawm tam a gilo mihon zosie tungah tam bangin ka bawl valon ding hi; tam gamlah ah mangthai-in khum munah a si gam ding uhi.

³⁶Gam van dinga Moses in a sawl mite kilekia-in a gam thu a sielamin a tut ziehun mihonte TOPA a phunsansah,

³⁷khum gam tungtang a sielama a gen tua mite, TOPA mai-ah gimna tawh a sigam uhi.

³⁸Ahi vangin gam van dinga a kuonte lahah Nun’ tapa Joshua le Jephunneh’ tapa Caleb tegel beh hing lai uhi.

³⁹Moses in Israel-te zosie tungah tami thute a gen ciengin nahpitahin mite a kap uhi.

⁴⁰Zingmawng phalvah tahin tho-in muoltung gam muolsang dawnah a peito vua, “Eite tanah i om uhi. TOPA’ ciemsa munah i peito ding uhi. Bang ding ahei cile eite i maw zo ta hi,” a ci uhi.

⁴¹Ahi vangin Moses in, “Bang dinga TOPA’ thupiehna na palsat uh ahei? Tua khu a tangtung sih ding hi.

⁴²Note lahah TOPA om lo ahi ziehin peito sih unlen, na galte in kisatlia sah sih un.

⁴³Amalek-te le Canaan-te in khum munah hing do ding ahi ziehin namsau tawh na sigam ding uhi; bang ding ahei cile TOPA nua na zuina panun kilekia na hi ziehun TOPA in note ang ompi ta sih ding hi,” a ci hi.

⁴⁴Ahi vangin TOPA’ thuciemna singkuong le Moses in giephuol nuasie lo napi amate in muoltung gam muolsang dawn kato ding a ngaisun veve uhi.

⁴⁵Tua ciengin muoltung gama a teng Amalek-te le Canaan-te kumsuhin amate a zo gawp vua, Hormah cieng dong a nuadel uhi.