Read Zou GAMLAH VANA 17 Bible Online

GAMLAH VANA 17 - Zou bible

GAMLAH VANA 17

¹[50] TOPA in Moses hopi-in tam bangin a gen hi:

²Israel-te hopi inlen amau’ pupa innkuon sunga makai zosie tung panin amau’ pupa innkuon khat ciet dingin ciengkhut khat, ciengkhut sawm le ni la inlen, a ciengkhut ciet vuah a min ciet uh giel in.

³Levi’ ciengkhut tungah Aaron’ min giel in. Azieh pen a pupa innkuon lutang khat adingin ciengkhut khat ciet om ding hi.

⁴Kikhopna puonbuh sung, thuciemna[51] mai, nangma kang kimupina munah tuate koi in.

⁵Ka teel mipa’ ciengkhut ang meng ding hi; tua bangin na tung vua Israel-te’ phun mielmuolna teng ka tawpsah ding hi.

⁶Moses in Israel-te a hopi hi; makaite zosie in a pupate’ innkuon zui-in makai khat ciengin khat ta, ama tungah ciengkhut sawm le ni a pie vua, Aaron’ ciengkhut zong amau’ ciengkhut lahah a om hi.

⁷Tuaci’n thuciemna[52] puonbuh sung TOPA mai-ah Moses in tua ciengkhutte a koi hi.

⁸A zing ciengin thuciemna[53] puonbuh sungah Moses a lut ciengin Levi innkuon adingin Aaron ciengkhut mengin na ngumin na pallun a, almond min ga na ga hi.

⁹Tua ciengin Moses in TOPA mai panin Israel zosie kungah ciengkhut zosie a peipi a, amate in enin a ciengkhut ciet uh a la uhi.

¹⁰Tuale TOPA in Moses kungah, “A ledo mite tungah hilkholna ahi ding le kei nei phunsan uh na tawp nadingun thuciemna[54] mai-ah Aaron’ ciengkhut koikia un. Tua ahi sihle amate a si ding uhi,” a ci hi.

¹¹Tua bangin Moses in a bawl hi; TOPA thupieh bang lien ma-in ama in a bawl hi.

¹²Israel-te in Moses kungah, “A sigam ding ka hi ta uhi; kote a mangthai ding ka hi ta uhi; ka unpi-un a mangthai hi ta ung!

¹³TOPA’ biehbuh nai-a a pei poma a si ding hi. Tuale kote ka unpi vua sigam ding ka hi ta uh amah?” a ci uhi.