Read Zou GAMLAH VANA 19 Bible Online

GAMLAH VANA 19 - Zou bible

GAMLAH VANA 19

¹TOPA in Moses le Aaron hopi-in tam bangin a gen hi:

²TOPA’ thupieh thukham le ngainate tam bang ahi hi: Na kung vuah poina a nei lo, nuol a baang lo, a tunga hahkol kivaw nai lo, bawnglaa a san khat ang peipi nadingun Israel-te kungah gen un.

³Siempu Eleazar tungah tua khu na pie ding vua, giephuol pulamah kikai-in ama’ mai-ah kigo ding hi.

⁴Siempu Eleazar in a khutme tawh a si kimkhat la ding a, kikhopna puonbuh mai lamah tua a si sagivei the ding hi.

⁵Tua ciengin a muna-ah tua bawnglaa kihal dinghi; a vun, a tel, le a site, a eh tawh kihaltha ding hi.

⁶Siempu pa in taamtah sing le hyssop le puon ausan khat la-in bawngla kihalna munah sepsuh ding hi.

⁷Tua ciengin siempu pa in a puonte sawpin tui sungah kipumsil ding a, tua zaw ciengin giephuolah pei thei ding hi; ahi vangin nitah dongin siempu pa abua hi ding hi.

⁸Bawnglaa[57] a hal mipa in a puonte tui sungah sawpin tui sungah kipumsil ding hi; nitah dongin ama abua hi ding hi.

⁹Tua ciengin a siengtho mi khat in tua bawnglaa kihalna vutvam khawmin giephuol pulam a sieng mun khatah khol ding hi; Israel mihonpite’ kisiensuona tui-a zah dingin kikoicing ding hi. Tam pen siensuo biehna ahi hi.

¹⁰Bawnglaa kihalna vutvam khawm pa in a puonte sawp ding a, nitah dongin abua hi ding hi. Tam pen Israel-te le amate lahah a teng pemtate tungah kumtawn ngaina khat hi ding hi.

¹¹Misi luong khatpo a thamkha mite ni sagi sung abua hi ding hi.

¹²A ni thum ni le a ni sagi ni-in tui tawh kisiensuo-in, tuaci’n amate a siengtho hi ding hi; ahi vangin a ni thum ni le a ni sagi ni-in a kisiensuo sih uleh, a sieng suoh thei lo ding uhi.

¹³Misi khat thamkha poma le a sisate’ luong a thamkha a kisiensuo lo poma TOPA’ biehbuh a buasah ahi hi; Israel lah panin tua bang mite kihemkhie ding hi. Amate tungah siensuona tui kithe lo ahi ziehin abua-in a om suoh ding uhi; amau’ sienlona pen a tung vuah a baang lai hi.

¹⁴Tam khu puonbuh sunga mi khat a si cienga zah ding thukham ahi hi: Puonbuh sunga a tum zosie le puonbuh sunga om mi zosie ni sagi sung abua hi ding uhi.

¹⁵A tunga asin kikhu lo umlebeel poma a sieng lo ahi hi.

¹⁶Namsau tawh gamlaha kithat mi ahi a, ahi sihle si ngaina-a si[58] ahi zongin, misi gu ahi a, ahi sihle han ahi zongin a thamkha poma ni sagi sung abua hi ding hi.

¹⁷Abua mipa adingin a kihal siensuo biehna vutvamte la-in beel sung khatah tui luonglai tawh hal ding uhi;

¹⁸tua ciengin a sieng mi khat in hyssop la-in tui sungah die ding a, puonbuh tung, vanzah zosie tung, tua sunga om mi zosie tung le misi gu, a kithat mi, misi, ahi sihle han ahi zongin a tham mi poma tungah the ding hi.

¹⁹A ni thum ni le a ni sagi ni-in a sieng mipa in a sieng lo mipa tungah the ding a, tua bangin a ni sagi ni-in amate siensuo ding hi. Tua ciengin a puonte uh sawpin tui sungah a kipumsil ding vua, nitah ciengin a sieng ahi ding uhi.

²⁰Abua hi napi amau le amau a kisiensuo lo mite pen TOPA’ mun siengtho a buasah ahi ziehun mihonpi lah panin tua mite kihemkhie ding hi. A tung vuah siensuona tui kithe lo ahi ziehin abua ahi uhi.

²¹Tua khu amate dingin kumtawna kizang ding thukham khat hi ding hi. Siensuona tui a the pa in a puonte sawp ding a, tua siensuona tui a thamkha poma nitah dongin abua hi ding hi.

²²Abua mipa’ thamkhah na khat popo abua hi ding a, tua na a thamkha mi popo zong nitah dongin abua hi ding hi.